Leksyon samtang Nagdrayb

Julio Meza Michel

Chihuahua, Mexico

Gibati nako nga relaks ug wala magdali samtang nagdrayb pauli. Dayon, sa kalit, nakadungog ko sige og sirbato nga sakyanan.

Nagdrayb ko pauli gikan sa usa ka miting sa young-adult sa maanindot nga kahapunon sa Dominggo. Gibati nako nga relaks ug wala magdali samtang naghunahuna ko sa mga mensahe nga akong nadungog mahitungod sa pagpalambo sa atong potensyal isip mga anak sa Dios. Gipangutana nako ang akong kaugalingon unsay akong mahimo sa pagpalambo sa potensyal nga ania kanako.

Ang akong rota pauli moagi sa pig-ot nga duha ka lane nga dalan. Taas nga linya sa mga sakyanan ang anaa gikan sa pikas nga direksyon, apan walay usa sa akong luyo. Dayon, sa kalit, nakadungog ko sige og sirbato nga sakyanan. Diha nay dryaber sa akong luyo. Iyang gipalong-palong ang suga ug misinggit nako nga mohawa sa agianan. Ingon og gusto siya nga magpakusog.

Naghunahuna ko nga kini nga tawo kinahanglan nga makat-on og pasensya ug motahud sa uban, mao nga mipahinay ko. Samtang nagpadayon mi sa pagdagan, nagpadayon siya nga pagsirbato ug pagpalong-palong sa iyang suga. Dayon siya mipadaplin ug mihunong. Mitan-aw ko sa samin nga para sa luyo aron makita ang iyang reaksyon nga wala makahimo sa pagpakusog. Mibati ko og nindot nga nakatudlo niya og leksyon.

Sa kalit, ang drayber migawas sa iyang sakyanan ug miable sa pultahan sa pasahero. Usa ka babaye kalit nga migawas nga dunay gikugos nga bata. Mitan-aw ko kon asa sila paingon. Sa distansya, nakita nako ang mga letra nga nakasulat: “Hospital Emergency Room.”

“Unsa man ang akong nabuhat?” Nangutana ko sa akong kaugalingon. Pag-abut sa balay, miluhod ko, ug naghilak, mihangyo ko sa Dios sa pagpasaylo nako.

Nianang adlawa nakat-on ko nga ang mga aksyon niadtong anaa sa atong palibut mahimong tungod sa mga butang nga dili nato kanunay makita o masabtan. Karon, kon ako makakita og tawo nga dunay gibuhat nga sayop nakong nahukman, mas gusto ko nga maghunahuna nga ako wala kaayo makasabut unsay ilang giagian. Maningkamot ko sa pagpakita og gugma ug kalooy nga gisugo ni Jesukristo kanato nga ipakita ngadto sa uban ug sa pagtutok sa pagsabut ug pagtabang niadtong anaa sa atong palibut.

Unsaon nako sa pagpalambo sa akong potensyal isip usa ka anak sa Dios? Makatubag ko sa mga aksyon sa ubang tawo uban sa gugma ug pagsabut. Ang pagbuhat sa ingon makapahimo nako nga mobati sa gugma sa Manluluwas sa akong kaugalingong kinabuhi ug makapahimo sa uban nga mobati sa akong gugma alang kanila.