Pagtuga [Endowment] sa Templo P&T

Pagpangandam alang sa tuga sa templo? Ang mga lider sa Simbahan mohatag og mga tubag sa pipila ka komon nga mga pangutana.

Unsaon nako sa pagpangandam sa pagdawat sa akong kaugalingong tuga?

“Tungod kay ang templo sagrado, ang Ginoo nagsugo nga kini panalipdan nga dili mapasipad-an. Bisan kinsa nga matinguhaong mangandam alang niana nga kahigayunan mahimong makasulod. …

“… Mangandam kamo sa pisikal nga paagi pinaagi sa pagsinina og tarung sa pag-adto sa templo. Dili kini usa ka dapit alang sa ordinaryong sininaan. Ang mga propeta sa ulahing mga adlaw mihatag og gibug-aton sa pagtahud sa kaugalingon alang sa atong pisikal nga mga lawas. Kana nga pagtahud kinahanglang sundon ilabi na niadtong kinsa mosulod sa balaan nga templo.”¹

“Ang mga pagtulun-an sa templo yano sa matahum nga paagi ug sa yanong paagi matahum. Masabtan kini sa mapainubsanon, apan kini makapaikag sa salabutan sa labing maalamon nga mga huhahuna. “Ang espirituhanong pagpangandam mapalambo pinaagi sa pagtuon. Gusto ko nga morekomendar nga ang mga miyembro nga moadto sa templo sa unang higayon mobasa og mubo nga pamahayag sa Giya ngadto sa mga Kasulatan, gilista ubos sa mga hilisgutan: ‘Dihog,’ ‘Pag-ula,’ ‘Kristo,’ ‘Pakigsaad,’ ‘Pagkapukan ni Adan,’ ‘Sakripisyo, mga,’ ug ‘Templo.’ Ang pagbuhat sa ingon makahatag og lig-on nga pundasyon.”²

––Presidente Russell M. Nelson

Dugang nga mga kapanguhaan nga tingali makatabang sa pagpangandam sa pagdawat sa tuga maglakip sa:

Russell M. Nelson, “Personal nga Pagpangandam alang sa mga Panalangin sa Templo,” Liahona, Hulyo 2001, 37–40.

Samtang mangandam kamo sa pagdawat sa inyong tuga, kinahanglang mobati kamo nga komportable nga makigsulti mahitungod sa templo uban sa pamilya, mga higala, ug mga lider sa Simbahan. Ang mga leksyon sa inyong klase sa pagpangandam sa templo makahatag og daghang makatabang nga impormasyon ug panudlo.

Unsa ang mahitabo atol sa seremonya sa tuga sa templo?

“Ang tuga sa templo … madawat sa duha ka bahin:

“Sa unang bahin, kamo pribado ug indibidwal nga makadawat sa pasiunang ordinansa nga gitawag nga ang ordinansa sa initiatory. Ang ordinansa sa initiatory naglakip sa espesyal nga mga panalangin kabahin sa inyong balaan nga panulundon ug potensyal.

“Sa ikaduhang bahin, madawat ninyo ang nahibilin sa inyong tuga nga apil sa usa ka grupo kauban sa uban kinsa nagtambong sa templo. Niining bahina, ang plano sa kaluwasan gipresentar, lakip sa Paglalang sa kalibutan, sa Pagkapukan ni Adan ug Eva, sa Pag-ula, sa Apostasiya, ug ang Pagpahiuli, ingon man usab sa panudlo kon sa unsa nga paagi ang tanang mga tawo makabalik ngadto sa presensya sa Ginoo. Ang uban sa tuga gipresentar pinaagi sa video ug ang uban pinaagi sa mga tigpasiugda sa templo.

“Agig sumpay niini nga mga ordinansa, kamo dapiton sa paghimo og piho nga mga pakigsaad uban sa Ginoo. Kini nga mga pakigsaad naglakip sa pagsunod sa Dios ug pagtuman sa Iyang mga sugo, pagsunod sa ebanghelyo ni Jesukristo, sa paghimo sa inyong kaugalingon nga putli ug mahiyason sa moral nga paagi, ug pagpahinungod sa inyong panahon ug mga talento ngadto sa pag-alagad sa Ginoo. Agig balus, ang Dios nagsaad og talasaong mga panalangin niini nga kinabuhi ug sa oportunidad sa pagbalik pagpuyo uban Kaniya sa kahangturan.

“Sa katapusan sa tuga, ang mga partisipante sa simbolo nga paagi mosulod ngadto sa presensya sa Ginoo samtang mosulod sila sa celestial nga kwarto. Didto kamo makagahin og panahon sa pagpamalandong, pag-ampo, pagpahulay, pagbasa sa mga kasulatan, o hilum nga maghisgot sa inyong mga kasinatian uban sa pamilya ug mga higala. Dapit kini sa kalinaw, diin usab makakita kamo og kahupayan ug balaan nga direksyon.”³

Makahisgot ba kita sa tuga sa gawas sa templo?

Kabahin sa rason nga dili kita makahisgot kanunay sa tuga sa detalye diha sa gawas sa templo naggikan sa panudlo sa Ginoo nga “[dili] ayaw pagtiaw-tiaw sa sagrado nga mga butang” (Doktrina ug mga Pakigsaad 6:12). Makapasalamat kita nga ang Ginoo nagtudlo nato sa “pagtulun-an human sa usa ka pagtulun-an” (2 Nephi 28:30) ug mohatag lamang nato unsay andam natong dawaton, nianang higayuna. Ang Ginoo nagdapit sa tanan sa pag-adto sa Iyang balay, apan ang paglaum mao nga kadtong kinsa modawat niining sagrado nga gasa ug responsibilidad andam na.

Adunay daghang mga bahin, lakip sa mga pakigsaad sa templo, nga mahimo ug kinahanglang hisgutan sa dili pa kita moadto sa templo sa unang higayon. Adunay pipila ka aspeto, piho ngadto sa mga ordinansa, nga hisgutan lamang nato sa templo. Ang mga ordinansa ug mga seremonya sa templo personal ug sagrado, ug kabahin sa unsay nakapahimo niini nga espesyal mao kon unsa kita nga may balaang pagtahud, mapanagan-on, ug mabinantayon sa paghisgot niini.

“Ang mainampingong pagbasa sa mga kasulatan nagpadayag nga ang Ginoo dili mosulti sa tanang mga butang ngadto sa tanang mga tawo. Adunay pipila ka mga kwalipikasyon nga gihan-ay nga gikinahanglan sa dili pa modawat sa sagrado nga impormasyon. Ang mga tulumanon sa templo anaa sa sulod niini nga kategoriya.

“Dili nato hisgutan ang mga ordinansa sa templo sa gawas sa mga templo. Dili gayud tuyo nga ang kahibalo mahitungod niining mga tulumanon sa templo mahimong limitado lamang ngadto sa pipila nga pinili kinsa obligado sa pagsiguro nga ang uban dili gayud makahibalo niini. Sukwahi kini, sa tinuoray. Uban sa dakong paningkamot kita nag-awhag sa matag kalag nga magmahimong sarang ug mangandam alang sa kasinatian sa templo.”⁴

—Presidente Boyd K. Packer (1924–2015), Presidente sa Korum sa Napulog Duha ka mga Apostoles

Ngano nga ang pagdawat sa akong tuga importante kaayo?

Ang mga ordinansa ug mga pakigsaad sa templo importante tungod kay kini naggiya ngadto sa labing dakong mga panalangin nga alang sa mga anak sa Langitnong Amahan karon ug sa kahangturan. Si Elder Robert D. Hales (1932–2017) sa Korum sa Napulog Duha ka mga Apostoles mipahayag, “Ang nag-unang katuyoan sa templo mao ang pagsangkap og mga kinahanglanon nga mga ordinansa alang sa atong kahimayaan sa celestial nga gingharian.”⁵ Ang tuga sa templo nagtabang nato nga makasarang, pinaagi sa Pag-ula ni Jesukristo, alang sa kinabuhing dayon. Apan makatabang usab kini kanato sa atong inadlaw-adlaw nga mga kinabuhi. Ang mga pakigsaad ug mga ordinansa sa tuga mopanalangin nato karon uban sa gahum, proteksyon, ug katuyoan ug motabang nato nga mahimo unsay gusto sa Dios nga kita mahimo.

Ang mga propeta karon nagpahinumdom nato nga kita makadawat niini nga mga panalangin pinaagi sa templo. Si Presidente Boyd K. Packer miingon, “Ang atong mga gipangtrabaho diha sa templo motabon kanato og usa ka taming ug usa ka panalipod, sa indibidwal nga paagi ug isip usa ka katawhan.”⁶

Unsay akong mahimo nga mas makasabut sa pagtuga sa templo ug sa mga pakigsaad nga akong gihimo didto?

Tutuki ang mga pagtulun-an ug mga pakigsaad sa templo sa inyong personal nga pagtuon. Pangita sa mga pakisayran sa mga baruganan ug mga pakigsaad sa tuga nga makita sa mga kasulatan, mga pakigpulong sa kinatibuk-ang komperensya, ug sa ubang mga materyal sa Simbahan. Ang pagribyu niini nga mga kamatuoran sa inyong personal nga pagtuon makatabang ninyo nga motubo ang inyong pagsabut sa mga ordinansa ug mga pakigsaad sa templo. Kon magtuon sa balaod sa kaputli, pananglitan, sa unsa nga paagi nga ang kaligdong ni Jose sa dihang gitintal sa asawa ni Potiphar makapanalangin sa inyong pasalig sa pagsunod niini nga balaod? (tan-awa sa Genesis 39). Sa unsa nga paagi nga ang pasalig ni Nephi sa pagsunod sa mga sugo sa Dios magamit sa paagi sa inyong paghimo sa inyong calling? (tan-awa sa 1 Nephi 3:7).

Balik ngadto sa templo kutob sa itugot sa inyong personal nga mga sirkumstansya.