Dili Kini Mahitungod sa mga Lingkuranan
Janessa Orgill
Iowa, USA
Paghulagway pinaagi ni Dan Burr
Wala pay tawo sa simbahan sa dihang, isip presidente sa Young Women, miabut ko aron ipahimutang ang mga lingkuranan sa cultural hall sa gabii sa dili pa ang kalihokan sa Young Women. Pito ka bulan ko nga mabdos, ug akong ipahimutang ang mga lingkuranan nga halos ako ra. Apan sa wala madugay miabut ang akong secretary ug usa sa magtatambag ug mitabang nako nga mahuman kini. Dayon gisugdan namo ang pagbitay sa mga dekorasyon.
Sa dihang usa ka babaye mili-li. “Pasayloa ko,” miingon siya, “apan ang Relief Society mipareserba niini nga kwarto alang sa among klase sa yoga karong gabii.”
Nangutana mi kon duna bay laing kwarto nga ilang magamit, apan ang ubang mga kwarto okupado usab. Mao nga gibuhat lang namo ang bugtong butang nga among mahimo: gipanguha namo ang mga lingkuranan. Mipauli ko nianang gabhiona nga gibati og kakapoy, nakahibalo nga sa pagkabuntag kinahanglan nga akong ipahimutang pag-usab ang mga lingkuranan.
Usahay ang kinabuhi ingon niini. Uban sa bag-ong bata ug upat ka gagmay nga mga anak, gibati nako nga gikapoy nga walay nahimo sa tibuok adlaw ug dayon momata nga mobuhat sa samang butang pagkasunod adlaw. Sa bisan unsa nga piho nga panahon, adunay mga bata nga pakan-on ug daghang mga sinina nga ihapnig, mga dulaan, ug mga plato nga hipuson—akong gipahimutang ang mga lingkuranan ug gihipos kini. Mao kana ang akong kinabuhi.
Apan kini mahitungod ba sa mga lingkuranan? Samtang nanghipos ko sa mga lingkuranan human sa kalihokan sa Young Women, wala nako tuyua nga makapahiyum samtang naghunahuna ko sa kalingawan ug katalagsaon sa batan-ong mga babaye nga akong gimahal pag-ayo. Mapasalamaton ko sa panahon nga akong gigahin uban kanila.
Mao ra sad kini sa balay. Dili kini mahitugod sa mga lama sa pagkaon nga anaa sa lingkuranan o sa mga medyas nga wala magkapares. Mahitungod kini sa akong gamay nga pamilya, kinsa nakahatag kanako og kalipay.
Ang Ginoo miingon: “Busa, ayaw pagluya diha sa maayo nga buhat, kay kamo nagpahimutang sa tukuranan sa usa ka mahinungdanon nga buhat. Ug gikan sa gagmay nga mga butang magagikan ang mga dagko” (Doktrina ug mga Pakigsaad 64:33).
Ang gagmay nga mga butang miabut nga gimahal kaayo nako: ang mga gakus, hinimo-himo nga mga kanta, mga drowing sa krayola, paglukso-lukso padulong sa sudlanan sa sulat ug balik, ug pagkaon sa sunog nga pan tungod kay kini gihimo nila alang gyud kanako.
Gihimo nato ang makalaay nga mga butang kada adlaw, sama sa pagpahimutang sa mga lingkuranan ug paghipos niini pag-usab. Apan dili kini mahitungod sa mga lingkuranan—mahitungod kini sa mga tawo nga atong gimahal kinsa molingkod diha niini. Dili kini mahitungod sa buluhaton—mahitungod kini sa mga tawo nga atong giserbisyuhan. Kon ako maghunahuna kanila ug kon unsa ka dako sa akong gugma kanila, nagpasalamat ako sa Ginoo sa katahum sa kinabuhi ug alang sa umaabut, kon ako mobangon ug ipahimutang pag-usab kadto nga mga lingkuranan.