Ang Katapusang Pulong
Pagpaminaw sa Tingog sa Ginoo sa Kinatibuk-ang Komperensya
Ni Elder Neil L. Andersen
Sa Korum sa Napulog Duha ka mga Apostoles
Gikan sa usa ka pakigpulong sa Oktubre 2017 nga kinatibuk-ang komperensya.
Elder Neil L. Andersen
Mosaksi ako ninyo nga si Jesus mao ang Kristo, nga naggiya Siya sa kalihokan niining sagrado nga buhat, ug nga ang kinatibuk-ang komperensya mao ang usa sa pinakaimportante nga panahon nga Siya mohatag og direksyon sa Iyang Simbahan ug ngari nato sa personal nga paagi.
Samtang kita mangandam sa pagpundok ubos sa direksyon ni Presidente Russell M. Nelson, makapaabut kita nga madungog “ang kabubut-on sa Ginoo, … ang hunahuna sa Ginoo, … ang tingog sa Ginoo, ug ang gahum sa Dios ngadto sa kaluwasan.” (Doktrina ug mga Pakigsaad 68:4). Misalig kita sa saad sa Ginoo: “Bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra.” (Doktrina ug mga Pakigsaad 1:38).
Sa kaguliyang ug kalibog sa atong moderno nga kalibutan, ang pagsalig ug pagtuo sa mga pulong sa Unang Kapangulohan ug sa Korum sa Napulog Duha ka mga Apostoles importante sa atong espirituhanon nga pagtubo ug paglahutay.
Mianhi ta sa kinatibuk-ang komperensya nga nag-ampo ug nag-andam. Daghan nato, dunay mga kabalaka ug sinsero nga mga pangutana. Gusto kitang mobag-o sa atong pagtuo sa atong Manluluwas, nga si Jesukristo, ug mopalig-on sa atong abilidad sa pagbatok sa tintasyon ug paglikay sa mga kaguliyang. Mianhi ta aron matudloan gikan sa Kahitas-an.
Mosaad ko nga kon andamon ninyo ang inyong espritu, ug moanhi nga magpaabut nga makadungog sa tingog sa Ginoo, ang mga hunahuna ug pagbati moabut sa inyong hunahuna nga gihimo alang gyud kaninyo.
Adunay kaban sa bahandi sa langitnong direksyon nga naghulat sa inyong pagdiskobre sa mga mensahe sa kinatibuk-ang komperensya. Ang matag usa nato nga pagsulay gihimo sa pagsuta kon unsay atong reaksyon sa atong nadungog, nabasa, ug gibati.
Mosaad ko kaninyo kon paminawon ninyo ang tingog sa Ginoo pinaagi sa mga pagtulun-an niining kinatibuk-ang komperensya, ug dayon mosunod niadtong mga pag-aghat, mabati ninyo ang impluwensya sa langit, ug ang mga kinabuhi sa naglibut kaninyo mapanalanginan.