Itulau o le lotoifale

“O le mea lea, ou te fai atu ai ia te outou, ia taumamafa fiafia i afioga a Keriso”

O savali o le faatuatua ma le faamoemoe mai la tatou autalavou.

Ia Outou Atoatoa

Saunia e Lenora, 13, Pesega, Samoa

“O lea ou te manao ia outou atoatoa e pei lava o a’u, po o lo outou Tamā o le o i le lagi e atoatoa” (3 Nifae 12:48).

O le faitauina o lenei fuaitau laitiiti ae loloto, e tatau ona tatou fesili ifo ai ia i tatou lava, “o le a le uiga?” O lenei mau o se valaaulia ia i tatou uma, e le na o tagata o le Ekalesia. E mafai ona tatou vaai atu faapea o loo valaaulia e le Alii Ana fanau uma ia o mai ia te Ia ma ia atoatoa ia te Ia. E le gata o se valaaulia lenei mea ae o se poloaiga foi ia avea ai faapei o Iesu Keriso ma le Tama Faalelagi o e atoatoa. Ou te iloa e le o se galuega faigofie le avea ai faapei o le Faaola, ae ua ia i tatou se tiutetauave o e mulimuli ma ni soo o Iesu Keriso ia avea faapei o Ia i mea uma tatou te faia ma upu tatou tautatala ai a’o tatou auauna atu i isi. Ou te iloa o le auala lea o loo finagalo le Alii ia tatou ola ai i o tatou olaga. Ou te iloa e mafai ona tatou mauaina le atoatoa o Lona olioli ma le alofa pe afai tatou te tausia Ana poloaiga.

Filifili le Mea Faigata e Sa’o Nai Lo le Mea Faigofie e Sese

Saunia e Keith, 15, Pesega, Samoa

Ua faamanuiaina i tatou taitoatasi i le meaalofa o le faitalia. E ala atu i lenei meaalofa e mafai ai ona tatou faia a tatou lava filifiliga i o tatou olaga i aso uma. Ua tumu lenei lalolagi i le amioleaga ma le pouliuli, ae ua tuuina mai ia i tatou pe tatou te filifili e mulimuli i aoaoga sese a le lalolagi pe liliu atu i le Alii.

E tatau ona tatou filifili i le mea sa’o e tusa lava pe foliga faigata. E le tatau ona tatou faia ni filifiliga sese ona e faigofie ma e lē foliga mai e sese i le taimi nei.

I le Tusi a Mamona, tatou te faitau ai i aoaoga a le perofeta o Samuelu:

“E, outou e le tupulaga amioleaga ma faapiopio; outou e tagata maaa ma ua maaa, o le a ea le umi tou te manatu o le a onosaia ai outou e le Alii? Ioe, o le a ea le umi tou te tuu ai outou lava e taitaiina e taitai valelea ma tauaso? Ioe, o le a ea le umi tou te filifili ai le pouliuli nai lo le malamalama?” (Helamana 13:29).

A’u uo e, o le a le umi o le a tatou filifili ai le pouliuli nai lo le malamalama? O le a le umi o le a tatou filifili ai le mea sese nai lo le mea sa’o? E tatau ona tatou filifili i le lelei nai lo le amioleaga. E tatau ona tatou filifili i le mea faigata e sa’o nai lo le mea faigofie e sese. Ou te iloa afai tatou te faia o le a faamanuiaina moni o tatou olaga.

O Uo

Saunia e Caroline, 15, Pesega, Samoa

E manaomia e tagata uma ni uo lelei ma faamaoni; o i latou o se malosiaga ma faamanuiaga maoae. Latou te fesoasoani mai ia i tatou i auala e tatau ona tatou mafaufau ai, auala e tatau ona tatou amio ai ma fesoasoani e mamanuina i tatou i le tagata e tatau ona tatou avea ai. E pei o le sailia o ni uo lelei e tatau foi ona avea i tatou ma ni uo lelei. Ou te faaalia i a’u uo lo’u popole e ala i le faanoanoa faatasi ma i latou ma faaalia lo’u popole mo i latou pe a i ai ni o latou luitau. Ou te faaali atu ia i latou le faamaoni, faaaloalo ma aloese mai le faamasinoina o i latou. Ina ia mafai ona i ai ni uo lelei, e tatau ona avea muamua a’u ma se uo lelei. E taumafai o’u matua e aoao a’u i le auala e avea ai ma se uo faaKeriso.

E masani ona fai mai lo’u tinā, “O au filifiliga e faafiafiaina ai oe, o au filifiliga foi e te faanoanoa ai.”

E masani foi ona fai mai tamā, “E lelei le taua ae sili atu ona taua le lelei.”

Ua uma ona faataatia e Iesu Keriso le faataitaiga atoatoa o le faauooga. O Ia o la tatou uo mamae. Na Ia aoao mai ia i tatou pe a avea i tatou ma se uo lelei i se isi o Ana fanau ua avea i tatou ma se uo lelei ia te Ia, na Ia fetalai mai ai:

“Ona tali atu lea o le Tupu, e faapea atu ia te i latou, E moni, ou te fai atu ia te outou, aua na faia e outou i le tasi o e aupito itiiti o o’u uso nei, o a’u lea na outou faia i ai” (Mataio 25:40).

Lototele ma le Fefe

Saunia e Filoisainaloto, 15, Pesega, Samoa

O le mauaina o le lototele e amata i le mauaina o le malosi. O le malosi o lona uiga tatou te le o tuuina i tatou i lalo, ae o le maua o ni manatu lelei e uiga ia i tatou lava i taimi uma. E le o le mitamita i lo tatou lava malosi ae ia iloa o le Atua e mafai ai ona tatou faia mea faigata. O le fefe o le leai lea o se faatuatua i le malosi o le Atua. O se vaivaiga lea e mafai ona avea ma amioga masani pe a tatou faatagaina. Ina ia aveesea mai le fefe ia i tatou, e tatau ona tatou faatuatua i le Alii o Iesu Keriso. Ao tatou faaauau atu i la tatou faigamalaga i le olaga, e tatau ona tatou faalagolago atu e le aunoa i le Alii ma Ana aoaoga. A tatou maua le faatuatua, o le a tupu ae le lototele i totonu o i tatou, lea o le a mafua ai ona tatou faia mea lelei e aunoa ma le fefe. O le i ai o le faatuatua ma le lototele o le a tatou maua ai le faamautinoaga matagofie o le a i ai iina le Tama Faalelagi mo i tatou i laasaga uma o le ala. I nisi taimi o le a i ai ni o tatou masalosaloga; o nei masalosaloga atonu e mafua ai ona tatou fefefe. Ou te iloa ao tatou saili mo tali i nei masalosaloga, ma faalagolago i le Alii, o le a Ia tali mai i a tatou tatalo. Ou te uunaia outou, au uo e, ina ia faatuatua pea e le aunoa i le Alii o Iesu Keriso. O lena faatuatua o le a taitai atu ai i le lototele ma o le a lafoaiina o tatou popolega. Aua tatou te fefefe aua o loo faatasi pea le Alii lo tatou Atua ma i tatou i soo se mea tatou te ono i ai.