Itulau o le lotoifale
Na Te Faatuatuaina i Tatou i Mea Faigata, Ia Faatuatua La ia te Ia ma Faatino
Ou te lei mafaufauina lava e amataina se pisinisi. Sa ou vaai ia te a’u lava o se tagata lagolago talenia mo i latou e i ai manatu nai lo se tasi e taitaiina le ala. E le o se taimi muamua lea na ou talitonu ai sa le mafai ona ou faia se mea na uunaia ai a’u e le Alii e fai. O le faatolu ona tauina mai ia te a’u ou te toe foi i le iunivesite lea na faatoa ou faalogo ai. E lei pasi ni nai pepa i le taimi ua mavae, lea na ou lagona ai le pei o le suesue e le mo a’u.
Sa ou ola ae i le Ekalesia a Iesu Keriso o le Au Paia o Aso e Gata Ai. Na avea a’u ma tagata o le Ekalesia i lo’u olaga atoa ma sa aoaoina a’u mai lo’u talavou ina ia ou talitonu pea, ma galue, i le taitaiga a le Alii.
O se mamanu lea o lo’u olaga. Ou te lei faamoemoe e alu i se misiona, ae ina ua oo mai se faaaliga, sa ou alu. Ou te lei manao e toe foi i le iunivesite ae peitai o le faatauanau agamalu mai o le Alii na iu lava ina ou usitaia. Ou te matua le talitonu o le a ou amataina se pisinisi mo a’u lava ia, ae ona o fatu o musumusuga na totoina ma le tausiaina lelei o le eleele i luga o lea laina i luga o lea laina o faaaliga, na ou mauaina ai lou toe faia o se mea ou te lei mafaufauina ou te faia.
E oo mai faaaliga ia i tatou taitoatasi i ni auala uigaese: i nisi o se lagona mafanafana o le filemu, i isi o se manatu po o se aitia e le aluese ae i isi o se leo manino lea e tautala mai i o latou mafaufau. Mo a’u o faaaliga na oo mai i lea taimi ma lea taimi. O taimi taitasi o musumusuga, na amata ai ona manino mai le sini o la’u pisinisi: ia faafesootai kamupani i le alalafaga e ala i polokalama ma fuafuaga e taulai atu ai i le faia o ni suiga moni.
Na ou aoaoina i lo’u olaga atoa o le faalagolago atu i le taitaiga a le Alii e sili atu nai lo le na o le fai atu “Ioe, o le a ou usitai.” E tatau ona tatou galulue, ma e masani lava o le mea e tatau ona tatou faia e faigata tele. Na muai faia e Nifae ana lava meafaigaluega ae na te lei mulimuli i poloaiga a le Alii e fau se vaa. Na auina atu a’u e le Alii i se misiona ona ou toe foi ai lea i le iunivesite ina ia mafai ona ou atiinae ni meafaigaluega ou te manaomia e amata ai lenei pisinisi.
I la’u misiona sa ou aoao ai ia alofa atu i fanau uma a le Atua. Sa ou matauina ma mafaufau loloto i manaoga sili o Ana mamoe ma le auala e mafai ai ona ausia na manaoga i se fuataga tele. I le iunivesite sa ou aoao ai e uiga i mea tau pisinisi. Sa ou aoao ia sili atu ona mataalia, fatufatuai, naunau ma malosi. I lalo o lana taitaiga faifai pea sa ou i ai i le tele o suesuega ma galuega faavae lea na taitai atu ai i tagata na manaomia ona ou feiloai i ai ma aoao mai ai. Sa ou auai i le kosi o le “Amataina ma le Faaolaina o la’u Pisinisi” mo se lagolagosua faaopoopo. Sa ou tatalo malosi mo laasaga uma ae sa le faigofie le auala, ma sa lei manino pea le auala i taimi uma.
I le tausaga ua te’a, na ou oo ai i se tulaga sili ona maualalo o la’u faigamalaga. Sa ou galue malosi ae sa ou lagona le pei ou te le o agai i luma. Ao lei amataina aloaia le pisinisi, sa ou tatalo i le Atua ma faasoa atu i ai o’u lagona moni sa i ai. Ao o’u tatalo, sa oo mai se savali ia te a’u e ala i le Agaga Paia: Ua silafia e le Atua o le a e faia pea mea e finagalo ai o Ia ia te oe, Na te faatuatuaina oe. Soo se taimi lava ou te feagai ai ma taimi faigata, e faamanatu mai pea ia te a’u lenei taimi ma iloa ai e tatau ona ou tulei pea i luma e ui lava e faigata. O lenei savali talafeagai na aumaia ia te a’u le mea na ou manaomia ia faaauau ai pea i luma. Mulimuli ane sa mafai ona ou toe tepa i tua i na taimi faigata ma vaai i le atamai atoatoa o Lana faagasologa ma Lana taimi. Na te silafia mea tatou te manaomia ma le taimi tatou te saunia ai mo na mea.
O loo umi pea se auala e uia ae ou te iloa o lo’u faalagolago atu i le Alii ma Lona faatuatuaina o a’u o le a mafai ai ona ausia lenei faigamalaga. Ou te lei talitonu o le iunivesite e mo a’u, ae ua maua nei sa’u faailoga i mea tau Faatufugaga ma Fefaatauaiga. Ou te lei fuafua e auauna atu i se misiona ae peitai ua avea ma se tasi o aafiaga silisili o lo’u olaga. Pe a talosagaina oe e le Alii e fai se mea faigata, ia faia loa! O le a e ofo i mea e mafai ona e faia i lalo o Lana taitaiga ma Lona alofa mutimutivale atoatoa.