Itulau o le lotoifale
“Tinā Sau!”
Ou te talitonu o le toatele o i tatou, ua maua’a o tatou popolega i o tatou manaoga loloto. O le mea moni lava lea mo a’u, ae pe ana ou le tuua le YSA ou te le iloaina le loloto o lo’u naunau ia maua se tane ma maua se fanau, ma le faateleina o lo’u fefe i le le mafai ona tupu lenei miti.
Sa ou fiafia i lo’u taimi i le YSA peitai sa ou siitia atu i le au matutua nofofua ma ua mafatia i lagona o le toilalo ma le faanoanoa. A’o ou i ai i le YSA, sa ou faatagaina lo’u fefe e taitaia lo’u ala ma talitonu ai o loo o’u puipuia a’u lava mai le le fiafia. I le toe tepa i tua, ua ou iloa ai o lo’u fefe sa lei puipuia a’u, ae sa faatamaia o’u avanoa i le ausiaina o la’u sini. O lenei ua ou le mautonu pe o le a i ai ea so’u lava aiga. Na faaauau pea lo’u tuputupu ae seia oo ina ou feagai ma le amataga o se isi tausaga e aunoa ma se aiga sa ou moomoo i ai.
O le savalisopi i le Motu o Rangitoto ua avea ma se tu masani fou mo a’u. O le savalisopo ua avea ma faatusa o tofotofoga ma luitau lea e mautinoa lava o le a oo mai ma se Tausaga Fou ma o se avanoa e ausia ai se mea faigata ma toe faamanatu maia ia te a’u faapea soo se mea lava e ono luitauina ai a’u i lena tausaga e mafai ona faatoilaloina.
O lenei tausaga ou te lei lagona tele se uunaiga. Na tatoso o’u vae i le tele o le ala e agai atu i luga o le mauga mu ma tu mo le tele o taimi ma le manatu e lafoaia. Na mavae atu le isi tausaga, ma e lei tele se alualu i luma i la’u sini. Na foliga mai ua faaipoipo tagata uma ae o loo o’u i ai pea iinei. O le latalata ona matou oo atu i le tumutumu, o le tele foi lea o le faalotovaivaia o o’u mafaufau na oo mai.
E lima minute mai lo matou taunuuga, na ou tu ai. Sa le mafai ona faaauau la’u savaliga. Sa ou tagi iina i luga o le mauga i le faamutaina o lo’u gafatia e ausia ai [le tumutumu]. Sa ou tauina ia te a’u lava ia ua lava lea mea ma filifili ai loa e faamuta. E pei lava ona oo mai lena manatu i lo’u mafaufau, na pueina e la’u vaaiga se mea i o’u mata. Na faliu atu lo’u ulu ma ou vaaia ai se tamaitiiti o tu mamao ese atu i le auala pefu. Sa ou iloa o ia o se agaga. Na faaloaloa mai lona lima e ta’u mai ia te a’u ou te alu atu ia te ia ma sa ia fai mai i se leo na vave ona ou iloaina, “Tinā Sau!”
Na matuai lofituina o’u lagona i lena taimi. O ia o la’u tama; na ou iloaina o ia. Na ou fuafua lava i taimi uma e faaigoa la’u tama tama muamua ia Nifae ma e ui sa na o sina taimi na ou vaai ai ia te ia ae sa ou iloaina vave o ia o la’u “pepe o Nifae.”
Na faafuasei lava ona ia mouese atu a’o agai mai se aiga i le tulimanu, ae sa ou iloaina le mea na ou vaai i ai. Sa ou iloa ua tuuina mai e le Atua ia te a’u lenei aafiaga faapitoa ina ia ou iloa ai Na te silafia o’u tiga ma e Na te lei faagaloina a’u. Sa ou faatopetope atu i le tumutumu ma se malosiaga ma se naunautaiga ua faafouina e faia soo se mea ia ausia ai la’u sini.
O le tulaga faaletinā e le amataina i le fanauina mai o se pepe. Ua manaomia a’u e la’u fanau i le taimi nei! Latou te manaomia a’u ia faaauau pea, ia tumau faamaoni ma ia saunia se aiga mo i latou e faafaileleina ai pe a oo mai lo latou taimi i le lalolagi. E silafia i tatou e le Atua. E faafofoga mai o Ia i a tatou tatalo. Na te silafia faamoemoega o o tatou loto ma afai tatou te faatagaina o Ia e taitaiina i tatou i Lana lava taimi ma i Lana lava ala, o le a tatou ausia na manaoga amiotonu ua tatou maua.