Ngaahi Peesi Fakalotofonuá
Tataki ʻe ha Hoa Mali Tonga ʻe Ono e Ngaahi Misiona ʻa e Siasí ʻi he Pasifiki Sauté mo ʻAfilika
ʻOku fakafuofua ki ha kau mēmipa ʻe toko 65,000 ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he Puleʻanga Tongá, ʻa ia ʻoku siʻi hifo ia ʻi he vaeua ʻo e peseti ʻe tahá ʻi he kau mēmipa fakamāmanilahi ʻe toko 16 miliona tupu ʻo e Siasí.
Ka ʻi hono fakafehoanakí ʻoku ʻi ai ha kau palesiteni fakamisiona tokolahi mei ai ʻoku nau ngāue ʻi he funga ʻo e māmaní.
ʻI he taimi ní, ʻoku laka hake ʻi ha kau palesiteni misiona ʻe 400 ʻoku nau lolotonga ngāue fakataha mo honau ngaahi uaifí. Ko e ngaahi hoa mali ʻe tolu ai ko e kau Tonga.
ʻE fakaʻosi ʻenau ngāue fakafaifekaú ʻi Siulai, pea ʻe fetongi kinautolu ʻe ha ngaahi hoa mali foʻou ʻe tolu, ʻa ia ʻoku nau toe haʻu pē mei Tonga.
Sione Fifita Tuiʻone mo Moala Feʻaomoe Lupe Sika Tuiʻone. ʻOku lolotonga ngāue ʻa Palesiteni mo Sisitā Tuiʻone ʻi he Misiona Nukuʻalofa Tongá. Ne fanauʻi mo ohi kinaua ʻi Tonga. ʻOku ʻi ai haʻana fānau ʻe toko nima. Kimuʻa pea uiuiʻi ia ko ha palesiteni fakamisioná, ne hoko ʻa Palesiteni Tuiʻone ko ha pīsope mo ha palesiteni siteiki ʻi he Siteiki Manukau ʻOkalani Nuʻu Silá. Ne ngāue ʻa Sisitā Tuiʻone ʻi ha ngaahi uiuiʻi lahi ʻo kau ai e tokoni ki he kau palesiteni palaimeli ʻo e siteikí.
Sitiveni Feʻaomoehala Fehoko mo Kilisitina Tuʻitama Langi Fehoko. ʻOku lolotonga ngāue ʻa Palesiteni mo Sisitā Fehoko ʻi he Misiona Lei, Pāpua Niu Kiní. Ne fanauʻi mo ohi kinaua ʻi Tonga. ʻOku ʻi ai haʻana fānau ʻe toko fitu. Kimuʻa peá ne hoko ko ha palesiteni fakamisioná, ne hoko ʻa Palesiteni Fehoko ko ha pīsope mo ha palesiteni siteiki fakataha mo ha ngaahi uiuiʻi kehe pē. Ne hoko ʻa Sisitā Fehoko ko ha palesiteni Palaimeli ʻi he siteikí mo e uōtí, pea mo ha palesiteni Fineʻofa ʻi he siteikí mo e uōtí.
ʻĪnoke Fotu Kupu mo Moana M. Fatani Kupu. ʻOku lolotonga ngāue ʻa Palesiteni mo Sisitā Kupu ʻi he Misiona Lusaka, Semipiá. Ne fanauʻi mo ohi kinaua ʻi Tonga. ʻOku ʻi ai haʻana fānau ʻe toko fā. Kimuʻa peá ne hoko ko ha palesiteni fakamisioná, ne hoko ʻa Palesiteni Kupu ko ha pīsope mo ha palesiteni siteiki fakataha mo ha ngaahi uiuiʻi kehe pē. Ne hoko ʻa Sisitā Kupu ko ha faiako ʻi he ngaahi tokāteline ʻo e ongoongoleleí peá ne hoko foki kimuʻa ko ha palesiteni Finemui ʻa e siteikí mo e palesiteni Fineʻofa ʻi he uōtí.
ʻIsileli T. Fatani mo Milika M. Fatani. ʻE kamata ngāue ʻa Palesiteni mo Sisitā Fatani ʻi he Misiona Lei, Pāpua Niu Kiní ʻi Siulai ʻo e 2019. Ne fanauʻi mo ohi kinaua ʻi Tonga. ʻOku ʻi ai haʻana fānau ʻe toko nima. Kimuʻa peá ne hoko ko ha palesiteni fakamisioná, ne hoko ʻa Palesiteni Fatani ko ha pīsope, tokoni ʻi he kau palesitenisī fakasiteikí, pea mo ha tokoni ʻi he kau palesitenisī fakamisioná. Ne hoko ʻa Sisitā Fatani ko ha palesiteni Finemui ʻo e uōtí.
Hakeai V. Piutau and ‘Ana Seini Folau Piutau. ʻE kamata ngāue ʻa Palesiteni mo Sisitā Piutau ʻi hona fatongia he Misiona Nukuʻalofa Tongá ʻi Siulai ʻo e taʻu ní. Ne fanauʻi mo ohi kinaua ʻi Tonga. ʻOku ʻi ai haʻana fānau ʻe toko nima. Kimuʻa pea uiuiʻi ia ko ha palesiteni misioná, ne hoko ʻa Palesiteni Piutau ko ha pīsope mo ha palesiteni siteiki. Kuo fua ʻe Sisitā Piutau ha ngaahi fatongia lahi ʻo kau ai e palesiteni Palaimeli ʻi he siteikí mo e uōtí fakatouʻosi.
Palesiteni ʻAlavini L. Sika mo Sisitā H. Mokiana Sika. Kuo uiuiʻi ʻa Palesiteni mo Sisitā Sika ke na ngāue ʻi he Misiona Lusaka Semipiá ʻo kamata ʻi Siulai ʻo e taʻu ní. Ne fanauʻi mo ohi kinaua ʻi Tonga. ʻOku ʻi ai haʻana fānau ʻe toko ua. Kimuʻa pea uiuiʻi ia ko ha palesiteni fakamisioná, ne hoko ʻa Palesiteni Sika ko ha pīsope mo ha palesiteni siteiki. Kuo fua ʻe Sisitā Sika ha ngaahi fatongia lahi ʻo kau ai e palesiteni Palaimeli mo e Fineʻofa ʻo e siteikí.