Ngaahi Peesi Fakalotofonuá
Ko ha Laka ʻo e Tuí, ʻi he ʻOtuá pea ʻiate Kimaua
Ne lava pē ke u ongoʻi hono tō e tengaʻi ʻakau ʻo e tuí ʻi homa lotó. Ne ʻikai fiefia hoku husepānití ʻi heʻene ngāue maʻuʻanga moʻuí. Naʻá ne ongoʻi ko e ngaahi tōʻonga ne fie maʻu ke ne fakahaaʻi ki he kakaí ʻi he tuʻunga pule ngāue naʻá ne ʻi aí, ne ʻikai tatau ia mo hono ngaahi tuʻunga ʻulungāngá. Ne u toki kamata pē e kalasi ʻkamataʻi mo fakatupulaki ʻeku pisinisí’ ʻo fakafou ʻi he Siasí. Naʻá ku vēkeveke moʻoni ki he meʻá ni pea ne u faʻu ha ʻū kaati pisinisi he taimi ko iá ki heʻeku tukupā ke ʻkamataʻi’ e pisinisí.
Ne fakakaukau hoku husepānití ʻi heʻene hohaʻa mo fie maʻu ha liliú, ke ne fakatau ha pisinisi fakafonua ngoue matalaʻiʻakau. ʻOku fakanatula pē kiate kimau e ngāue ki he ngoue matalaʻiʻakaú. Naʻá ma fakakaukau ʻi he taʻu ʻe 28 ʻo ʻema tupu hake ʻi Haʻamoá mahalo ko e faingamālie eni ke ma kamataʻi ai ha hala foʻou, ka ne matuʻaki fuʻu mamafa ʻaupito ke fakatau e pisinisí. Ko ha meʻa lahi moʻoni ia ke fakakaukauʻi, ʻa e fuofua totongi ke ʻavé, ko e hokohoko fakamāhina atu ʻo e ʻū meʻa ke totongí, ko hono totongi kapau ʻe ʻomi ha kakai ʻe ha niʻihi, mo e totongi mamafa ʻaupito ki he ngaahi fiemaʻu fakaakó. Naʻá ma fakakaukau ke taʻofi peá ma lotua ia ʻi he ʻamanaki ke totongi ʻe hoku husepānití ʻene tikite ki Melipoane ke kamata e ako fakapisinisí. Ko e hala totonu nai eni kiate kimauá? Kuó u ʻosi maʻu ha kau kasitomā ʻe toko fitu kuo nau kole mai ke u ngāue ki heʻenau ngoue matalaʻiʻakaú. Ne toe ʻi ai nai ha founga lelei ange ki he moʻui fakafalala pē kiate kitá ʻe kehe mei ha pisinisi totongi mamafa? Naʻá ma ʻiloʻi kapau te ma falala ki he ʻEikí, he ʻikai ke ma fehalaaki, ko ia ai naʻá ma lotu fakamaatoato he efiafi ko iá ki ha fakahinohino. ʻI he pongipongi pē hono hokó, ne ma ʻā hake ʻo fesiofaki peá ma pehē, “He ʻikai fakatau e pisinisí!”
Ka naʻe ueʻi kimaua ke ma kamataʻi fakataha pē haʻama pisinisi ngoue matalaʻiʻakau. Ne mahutafea e ngaahi maná mo e ngaahi tāpuakí. ʻI ha uike pē ʻe ono, ne ma totongi ʻosi e fakamole ki hono kamata e pisinisí. Ne fiemālie ʻema fakakaukaú ʻa ia ne ʻikai ke mei pehē kapau naʻá ma fai e totongi fakamāhina ki he pisinisi ne teu ke ma fakataú. Ne hokohoko atu ʻeku kalasi pisinisí ʻo fakaʻaongaʻi e ngaahi taukei mo e meʻa ne mahino kiate au ʻi heʻeku tokoni ki hoku husepānití ke ola lelei ʻema pisinisí.
Ne ʻomi kiate kimaua ha lavameʻa fakapalōfesinale ʻi heʻema hoko pē ko ha ongo mēmipa lelei ʻo e Siasí. Koeʻuhí ko ʻema tui ki he faitotonú, fakaʻatuʻí, mo e moʻui angatonú, kuo lahi ha ngaahi pisinisi ʻoku toutou omi mo ha niʻihi ʻoku fou mai ʻi ha kakai kehe ʻa ia ne mei totongi lahi ange ia kapau naʻá ma fakatau e pisinisí.
ʻI heʻema mātā e toʻukupu ʻo e ʻEikí ʻi heʻema ngaahi lavameʻá, kuó ma ongoʻi ai e holi ke fai pehē ki he niʻihi kehé. ʻOkú ma palani ke toutou fakahoko ha ngaahi ngāue taʻetotongi ki he niʻihi faingataʻaʻiá ʻi heʻema ʻiloʻi kuo pau ke ma foaki he kuo foaki lahi mai kiate kimaua. ʻOku haohaoa e founga ʻa e ʻEikí. ʻOkú Ne ʻomi ha ngaahi fekau kiate kitautolu ʻo hangē ko e moʻui angatonú, ʻa ia ʻokú ne ʻai kitautolu ke tau koloaʻia kae lava ke tau tokoni ki he niʻihi kehé.
ʻOku ou fakalotolahiʻi e kau mēmipa kotoa pē ke nau fakaʻaongaʻi e ngaahi kalasi moʻui fakafalala pē kiate kita ʻoku ʻoatu ʻe he Siasí. Te nau tokoni atu ke mou lava ʻo mamata ki he ngaahi meʻa ʻoku mou malavá mo fakahaaʻi atu e hala ke aʻusia e meʻa ko iá. ʻOku mahino ʻaupito kiate au e finangalo ʻa e Tamai Hēvaní ke ʻomi kiate kitautolu e meʻa kotoa pē ʻoku tau fie maʻú kapau te tau maʻu e tui feʻunga ke muimui ki heʻene ngaahi fakahinohinó. Kuó u mamata ki ha ngaahi mana ʻi hono fakahoko e meʻa kuó u ako ʻi he kalasi ko ʻení. Ko ha ngāue lahi ia kiate au mo hoku husepānití, ka ʻokú ma fiefia ʻi heʻema ʻiloʻi ʻokú ma fai pē e meʻa ʻoku finangalo ki ai e ʻEikí.