Ngaahi Peesi Fakalotofonuá
Foaki Meʻaʻofa ha ʻKau ʻĀngelo’ ki ha Ako Tokamuʻa ʻi Talau, Tonga
Lolotonga ha fakataha ʻa e ʻapiakó kimuí ni mai he Ako Tokamuʻa Faka-Kalisitiane Hōseá, ne talaange ai ʻe he puleako ko Tolofī Nauanitalatalá ki he fānaú kuo “omi ha kau ʻāngelo he hoʻataá ni pea kuo nau ʻomi ha fuʻu meʻaʻofa lahi maʻamoutolu!”
Ne ʻikai mapukepuke e fiefia mo e fieʻilo ʻa e fānaú, ʻi hono fakahifo atu ʻe ha taki fakalotofonua ʻo e Kau Māʻoniʻoni ʻi he Ngaahi ʻAho Kimui Ní ko Palesiteni Saipaʻia, mo e kau taki fakalotofonua kehe ʻo e Siasí ha ʻū loli naunau.
Ne fengāueʻaki fakataha e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mo e Talāsiti Tokoni ʻOfa Naunau Fale Maʻá e Ngaahi Akó, ke ʻoatu ha ʻū tēpile mo e sea maʻá e fānau akó mo e kau faiakó, kae pehē foki ki ha ngaahi naunau kehe mo e ʻū meʻavaʻinga.
Ne fakamamafaʻi ʻe Palesiteni Saipaʻia ʻi heʻene leá e mahuʻinga ʻo e akó mo e fiefia ʻa e kau mēmipa ʻo e Siasí ke tokoni ki he fānaú.
Ne fakahoko ʻe Mīsisi Fetutuki, ko ha taha ʻo e kau faiako he ʻapiakó e lea tukú, ʻo fakamālō ai ki he Siasí mo e kau fakafofonga ʻo e Naunau Fale Maʻá e Ngaahi Akó, ki he ngaahi tokoní mo palōmesi ange “ʻe fakaʻaongaʻi lelei kinautolu ʻe he fānau akó mo e kau faiakó.”