Ngaahi Peesi Fakalotofonuá
“Pea Kuo Pau Ke Ke Fakaava Ho Ngutú ʻi he Taimi Kotoa Pē”
ʻI heʻemau ō hengihengia atu ʻo ngāue fakahaofi ʻi ha taha ʻo e ngaahi ʻēlia ʻo e Uooti Namipauaní ʻi he Siteiki Pooti Vila, Vanuatú, ne mau aʻu atu ki ha feituʻu ne tatali ai e kakaí ke ō pasi ki he ngāué, akó, pe māketí.
Naʻá ma ʻilo ai ʻa Peti Tamata, ko ha mēmipa ʻo e Siasi Pelesipiteliané ʻi ha falelotu ne langa ʻe hono tuongaʻané, ko ha Palēmia mālōlō ʻo Vanuatu, ʻo fakahingoa pē ki ai. ʻI ha lau sekoni pē kimuʻa peá ne heka ki he pasí ke ʻalú, ne ma manatuʻi ha fekau toputapu “. . . kuo pau ke ke fakaava ho ngutú ʻi he taimi kotoa pē, ʻo fakahā ʻa ʻeku ongoongoleleí ʻaki ʻa e leʻo ʻo e fiefia” (Tokāteline mo e Ngaahi Fuakava 28:16). Ne ma ngāue leva ki ai mo hoku hoá.
“Peti, te ke loto nai ke ma haʻu ha taimi ʻo vahevahe mo koe e pōpoaki ʻo e ongoongolelei kuo fakafoki mai ʻo Sīsū Kalaisí?”
Naʻá ne pehē mai, “ʻOku ou ngāue he 7:30 pongipongi peá u foki poʻuli mai he ʻaho kotoa.”
“ʻE lava nai ke ma ʻalu atu he 6:00 pongipongi?” ko ʻema fehuʻí ange ia.
Naʻá ne pehē mai, “Sai ia.”
Ko ha fepōtalanoa ʻaki faingofua ia ne iku ki ha ola liliu moʻui.
ʻI he 5:30 pongipongi pē he ʻaho ʻe tahá, ne ma ʻi ai ʻo tatali ki heʻema taimi akoʻi mo Petí. Naʻe ongo moʻoni kiate ia hili ʻene ʻiloʻi ʻema feinga pongipongia ke tali kiate iá peá ne fakatukupaaʻi ia ke ne ʻi ai maʻu pē he 6. Naʻá ne lotu, lau e Tohi ʻa Molomoná, mo ako e naunau naʻá ma ʻoange kiate iá. Ne ʻi ai maʻu pē haʻane ngaahi fehuʻi ʻi heʻema ʻaʻahí takitaha. Naʻá ne faʻa fetuʻutaki mai he taimi ʻe niʻihi ke ma ʻalu ange ʻo akoʻi lahi ange ia kapau he ʻikai ke ngāue.
ʻI hono faʻa fehuʻia ʻe he kakaí ʻa Peti ki he ʻuhinga naʻá ne fie hoko ai ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, naʻá ne tali ange, “Koeʻuhí he ko e Siasi ia ʻo Sīsū Kalaisí, pea ʻoku nau moʻui ʻaki e meʻa ʻoku nau akoʻí.”
ʻOku loʻimataʻia maʻu pē ʻa Peti ʻi heʻene vahevahe ʻene ongo kau ki he ngaahi akonaki ʻo e ongoongoleleí. Naʻá ne ongoʻi māfana pehē pē ʻi he loto vai papitaisó. Ne ʻalu noa pē hono loʻimatá ʻi heʻene fakahaaʻi ʻene ongoʻi fiefia mo e houngaʻia ʻi heʻene fili ke fakatomala, muimui kia Sīsū Kalaisi mo papitaisó.
Ko e taimi ʻoku ʻomi ai ha fekau mei he ʻEikí ki hotau ʻatamaí pea ki hotau lotó, kuo pau ke tau ngāue ki ai ʻi he tui. Ko ʻema fili faingofua mo vave ke muimui ki ha ueʻi fakalaumālie mo lea kia Peti kimuʻa peá ne heka ki he pasí, ne iku ia ki ha ngaahi meʻa maʻongoʻonga moʻoni. Ne faifai pea iku e fili ʻa Peti ke muimui ki he ngaahi ueʻi ne fakafonu ʻi hono lotó ʻi heʻene ako ki he Siasi ʻo Sīsū Kalaisi kuo fakafoki maí, ki he efiafi Tokonaki fakaʻofoʻofa ko ia ʻi Fepueli 2019, ʻi heʻeku maʻu mo hoku hoá ha faingamālie ke fakamoʻoni ki heʻene fakahoko e ngaahi fuakava toputapu ko iá ʻi he vai ʻo e papitaisó. Ko ha ʻaho ia ʻo e fiefia ʻi he langí pea ʻi māmani pea naʻe kamataʻi ia ʻe he ngāue faingofua ko hono fakaava homa ngutú.