Ngaahi Peesi Fakalotofonuá
Maʻa e Kolomuʻa ʻo Vavaʻú he Ngāue ʻa e Kau Māʻoniʻoni ʻi he Ngaahi ʻAho Kimui Ní mo e Ngaahi Kaungāmeʻá
Kuo toe fakalahi atu e ngāue ʻa Kalaisí ʻe he kau mēmipa mo e ngaahi kaungāmeʻa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi Neiafú, ʻa e kolomuʻa ʻo Vavaʻú, ko e taha ʻo e ngaahi ʻotu motu ʻo Tongá, ʻaki e ngāue tokoni ʻi he komiunitií.
Ne pehē ʻe he taki fakalotofonua ʻo e Siasí ko Palesiteni Saipaʻia, “Naʻa mau fiefia ke sio ki he vekeveke mo e loto fiemālie hotau kāingalotú fakataha mo e kau ʻōfisa kolo ʻo Neiafu mo e kāinga ʻi he komiunitií, ke tokoniʻi e niʻihi kehé ʻi heʻenau ngāué.”
Naʻá ne pehē ne tuku taha e ngāue ʻa e kāingalotú mo e niʻihi kehe ʻi he komiunitií ʻi he ngaahi ʻēlia ʻoku faʻa lahi ʻaʻahi ki ai e kakaí, hangē ko e Falemahaki Pilinisi Uelingatoni Nguú mo e ngaahi feituʻu kehe ʻi he kolomuʻá.
Ne fakahaaʻi ʻe he ʻŌfisa Kolo ʻo Neiafú ko Vava Lapota, ʻa ʻene houngaʻia he kau mēmipa fakalotofonua ʻo e Siasí ʻi heʻenau ngāue kafakafá.
Naʻá ne pehē, “Ko ha meʻa lelei ʻaupito ia ke ngāue fakataha mo kimoutolu; he toki ngāue fakaʻofoʻofa moʻoni naʻa mou faí.
ʻOku taimi lelei ʻaupito foki he ʻoku tau teuteu atu ki he ʻaʻahi fakavāhengá ʻa ia ʻe taki ʻe Kōvana ʻEiki Fakatulolo mo ʻene timí ke tuʻuaki ha Vavaʻu ʻoku maʻá.”
Ne fakamatalaʻi foki ʻe he niʻihi he komiunitií ʻoku nau nofo ofi ki he ngaahi ʻēlia mo e ʻū ʻapi ne fai ki ai e ngāué, ʻenau fiefia ʻi he ngāue tokoní he naʻa nau kau atu ai pē ki ai.