Ngaahi Tefitoʻi Moʻoni ʻo e Ngāue Fakaetauhí

ʻOkú Ke Liʻaki Nai e Konga Mahuʻinga Ko ʻEni ʻo e Ngāue Fakaetauhí?

Ko e ngāue fakaetauhí ko e “fiefia mo kinautolu ʻoku fiefiá” ʻo tatau pē mo e “tangi mo kinautolu ʻoku tangí” (Loma 12:15).

Tā Fakatātā ʻa Augusto Zambonato

Ko e taimi ʻoku tau fakakaukau ai ki he ngāue fakaetauhí, ʻoku faingofua ke tau fakakaukau ke tokoniʻi ʻa kinautolu ʻoku faingataʻaʻiá. ʻOku tau talanoa fekauʻaki mo e huo e ngoue ʻa e uitoú, ʻomi ha meʻatokoni efiafi maʻá e mahakí, pe foaki ki he faingataʻaʻiá. ʻOku tau manatuʻi ʻa e akonaki ʻa Paula ke “tangi mo kinautolu ʻoku tangí,” ka ʻoku tau tokanga feʻunga nai ki he konga ʻuluaki ʻo e veesi ko iá—ke “fiefia mo kinautolu ʻoku fiefiá”? (Loma 12:15). Ko e fiefia fakataha mo kinautolu ʻoku tau ngāue fakaetauhi ki aí—ʻo tatau ai pē pe ʻoku ʻuhinga ia ke tau fakafiefiaʻi ʻenau lavameʻá pe tokoniʻi ke nau fiefia ʻi he taimi faingataʻá—ko ha konga mahuʻinga ia ʻo e ngāue fakaetauhi ʻo hangē ko e Fakamoʻuí.

Ko e ngaahi fakakaukau ʻeni ʻe tolu ʻe ala tokoni (pea mo e taha ke fakaʻehiʻehi mei ai) ʻi heʻetau feinga ke tokanga ki he lelei ʻoku ʻomi ʻe he ʻOtuá ki heʻetau moʻuí.

1. Ke Ke Tokanga

ʻOku tokoni ʻa Poni H. Kōtoni, Palesiteni Lahi ʻo e Kau Finemuí, ke mahino kiate kitautolu ʻoku fie maʻu ke tau ʻiloʻi ʻa kinautolu ʻoku tau ngāue fakaetauhi ki aí—ke ʻiloʻi ʻo ʻikai ngata pē ʻi heʻenau ngaahi kavengá mo e faingataʻaʻiá kae pehē foki ki honau mālohingá, talēnití, mo e lavameʻá. Naʻá ne pehē ʻoku fie maʻu ke tau hoko “ko ha helo mo ha falalaʻanga koe—ko ha taha ʻokú ne ʻilo honau tūkungá mo poupouʻi kinautolu ʻi heʻenau fakaʻānauá mo e fakaʻamú.”¹

ʻI he talanoa fakatātā ki he sipí mo e fanga kosí, naʻe folofola ʻe he Fakamoʻuí ko kinautolu ʻe ʻi Hono toʻukupu toʻomataʻú te nau fehuʻi ʻo pehē: “ʻEiki, naʻa mau mamata kiate koe ʻanefē ʻokú ke fiekaia, pea mau fafangaʻi koé? pea fieinua, pea mau foaki ʻa e inu kiate koé?

“Naʻa mau mamata kiate koe ʻanefē ko e muli, pea mau fakaafeʻi koe?” (Mātiu 25:37–38).

Naʻe pehē ʻe Sisitā Kōtoni, “Kāinga ko e foʻi lea mahuʻingá ko e mamata. Ne mamata ʻa e kau māʻoniʻoní ki he kau paeá koeʻuhí he naʻa nau vakaiʻi mo tokangaʻi. Te tau lava foki mo kitautolu ʻo maʻu ha mata tokanga ke tokoni mo fakafiemālieʻi, ke fakamanatua pea naʻa mo ha fakaʻānaua.”²

2. Fekumi ki ha Ngaahi ʻUhinga ke Fakafiefiaʻi

Fakafiefiaʻi ʻa e ngaahi lavameʻá ʻo tatau ai pē pe ʻoku lalahi pe siʻisiʻi. ʻE malava pē ko e fakaakeake mei he kanisaá pe kātakiʻi e loto-mamahi ʻo e ʻosi mo e kaumeʻá, fekumi ki ha ngāue foʻou pe fakasio ha sū naʻe mole, feinga ke hoko atu e moʻuí ʻi ha māhina ʻe taha hili e mālōlō ʻo ha ʻofaʻanga pe makātakiʻi ha uike kakato ʻe taha ʻo e taʻekai meʻa melié.

Tā telefoni ʻo pōpoaki talamonū, ʻoange ha kaati, pe ʻalu ʻo maʻu meʻatokoni hoʻatā mo ia. ʻI heʻetau fevahevaheʻaki ʻetau ngaahi tāpuakí, moʻui ʻaki ʻa e loto-houngaʻiá, mo e fakafiefiaʻi e ngaahi tāpuaki mo e lavameʻa ʻa e niʻihi kehé, ʻoku tau “maʻu ʻa e nēkeneka ʻi he fiefia ʻa [hotau] kāingá” (ʻAlamā 30:34).

3. ʻIloʻi ʻa e Toʻukupu ʻo e ʻEikí

Ko e taimi e niʻihi ʻoku ʻuhinga ʻa e fiefia fakataha mo e niʻihi kehé ke tokoniʻi kinautolu ke nau ʻiloʻi ʻa e ngaahi ʻuhinga ke nau fiefia aí—ʻo tatau ai pē pe ko e hā e ngaahi faingataʻa pe fakafiefia ʻoku hoko ʻi heʻetau moʻuí. Ko e moʻoni mahinongofua ko ia ʻoku ʻafioʻi kitautolu ʻe he Tamai Hēvaní mo mateuteu ke Ne hiki hake kitautolú ko ha maʻuʻanga fiefia fakaofo ia.

Te ke lava ʻo tokoniʻi ʻa e niʻihi kehé ke nau ʻiloʻi ʻa e toʻukupu ʻo e ʻEikí ʻi heʻenau moʻuí, ʻaki hoʻo vahevahe ʻa e founga kuó ke ʻiloʻi ai ia ʻi hoʻo moʻuí. ʻAi ke ke ongoʻingofua feʻunga ke ke vahevahe ʻa e founga kuo tokonia ai koe ʻe he Tamai Hēvaní ʻi hoʻo ngaahi faingataʻá. ʻE ala tokoni ʻa e fakamoʻoni ko ʻení ke ʻiloʻi mo fakahaaʻi ai ʻe he niʻihi kehé ʻa e founga kuó Ne tokoniʻi kinautolú (vakai, Mōsaia 24:14).

4. ʻOua Naʻa Fakangatangata ʻa Hoʻo Malava ke Fiefiá

Ko e meʻapangó, ʻoku tau faʻa fakangatangata he taimi ʻe niʻihi ʻetau malava ke fiefia mo e niʻihi kehé, tautautefito ki he taimi ʻoku tau ongoʻi veiveiua ai ki he meʻa ke tau foakí pe ko hotau tūkunga ʻi he moʻuí. ʻOku tau tō ʻi he tauhele ʻo e fakatauhoá, kae ʻikai ke tau nekeneka ʻi he fiefia ʻa e niʻihi kehé. Pea hangē ko e akoʻi ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá: “Ko hono fakatauhoa ko ia ʻo e ngaahi tāpuakí ʻokú ne faʻa tuli ʻa e fiefiá. He ʻikai lava ke tau fiefia mo meheka he taimi pē ʻe taha.”³

Naʻe fehuʻi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē, “Te tau ikunaʻi fēfē ʻa e fakahehema angamaheni ko ia ʻoku maʻu ʻe he tokotaha kotoa peé? … Te tau lava ʻo lau hotau tāpuakí mo fakahikihikiʻi e ngaahi lavameʻa ʻa e niʻihi kehé. Ko e mahuʻinga tahá, te tau lava ʻo tokoni ki he niʻihi kehé, ko e ngāue ʻaonga taha ia ke fakatupulaki ha manavaʻofa ki he niʻihi kehé.⁴ Te tau lava ʻo vikia ʻa kinautolu ʻoku tau ngāue fakaetauhi ki aí, kae ʻikai ko e fakatauhoa. Vahevahe tauʻatāina ʻa e meʻa ʻokú ke houngaʻia ai ʻiate kinautolu pe ko e kau mēmipa honau fāmilí.

Hangē ko ia ʻoku fakamanatu mai ʻe Paulá, ʻoku tau kau kotoa pē ʻi he sino ʻo Kalaisí, pea “ka fakahikihiki ʻa e kupu ʻe taha, ʻoku fiefia mo ia ʻa e kupu kotoa pē” (1 Kolinitō 12:26). ʻI he tokoni ʻa e Tamai Hēvaní, te tau lava ʻo ʻiloʻi ʻa e ngaahi aʻusia ʻa e niʻihi kehé, fakafiefiaʻi e ngaahi lavameʻá ʻo tatau pē lalahi mo e iiki, tokoni ke nau ʻiloʻi ʻa e toʻukupu ʻo e ʻEikí, pea ikunaʻi ʻa e loto-meheká koeʻuhí ke tau fiefia moʻoni ʻi he ngaahi tāpuaki, talēniti, mo e fiefia ʻa e niʻihi kehé.

Maʻuʻanga Fakamatalá

1. Bonnie H. Cordon, “Ko e Hoko ko ha Tauhisipí,” Liahona, Nōv. 2018, 75.

2. Bonnie H. Cordon, “Ko e Hoko ko ha Tauhisipí,” 75.

3. Quentin L. Cook, “Rejoice!” Ensign, Nov. 1996, 30.

4. Jeffrey R. Holland, “The Other Prodigal,” Liahona, May 2002, 64.

Ko e Sīpinga ʻa e Fakamoʻuí

Naʻe faʻa nekeneka ʻa Sīsū Kalaisi ʻi he fiefia ʻa e ni’ihi kehé. Naʻá Ne ʻafio ʻi he taʻane ʻi Kená, ʻa ia naʻe ʻikai ngata pē ʻi Heʻene fakafiefiaʻi ʻa e kātoangá ka naʻá Ne liliu ʻa e vaí ki he uaine (vakai, Sione 2:1–11). Te tau lava foki ʻo feinga ke ʻalu ki he ngaahi polokalama mahuʻinga ʻoku hoko ʻi he moʻui ʻo e niʻihi ʻoku tau ngāue fakaetauhi ki aí.

ʻOku tau mamata foki ki hono fakafiefiaʻi ʻe he Fakamoʻuí ʻa e angamāʻoniʻoni ʻa e niʻihi kehé. Ko e taimi naʻá Ne ʻaʻahi ai ki he kakai Nīfaí, naʻá Ne folofola ange ʻo pehē, “ʻOku mou monūʻia koeʻuhi ko hoʻomou tuí. Pea ko ʻeni vakai, ʻoku kakato ʻa ʻeku fiefiá” (3 Nīfai 17:20).

Fakaafe ke Ngāue

Fakakaukau ki he niʻihi ʻokú ke ngāue fakaetauhi ki aí. Ko e hā ha ngaahi talēniti mo e mālohinga ʻoku nau maʻu? Ko e hā ha ngaahi faingamālie pe lavameʻa kuo nau aʻusia? Ko e hā ha founga te ke fiefia ai mo kinautolu, fakavikivikiʻi kinautolu, pe poupouʻi kinautolu?

Vahevahe Hoʻo Ngaahi Aʻusiá

ʻOmi hoʻo ngaahi aʻusiá ʻi hoʻo ngāue fakaetauhi ki he niʻihi kehé pe ʻi heʻenau ngāue fakaetauhi atu kiate koé. ʻAlu ki he liahona.ChurchofJesusChrist.org pea lomiʻi ʻi he “Submit an Article or Feedback.”