Ko e hā e fakakaukau ʻa e Siasí ki he ʻātakaí?

Ko e foʻi lea mahuʻinga ke mahino ʻetau fakakaukau ki he ʻātakaí ko e fatongia tauhi. ʻOku ʻikai ke ʻuhinga ʻa hono maʻu ʻe he kakaí ʻa e māmaní ke nau fakaʻaongaʻi tavale ia, ka ʻoku ʻekeʻi meiate kitautolu ʻa e founga ʻoku tau fakaʻaongaʻi ai hono ngaahi koloa fakaenatulá (vakai, Tokāteline mo e Ngaahi Fuakava 104:13–15). Neongo “ʻoku ʻi ai ha ngaahi meʻa feʻunga pea hulu ange” (Tokāteline mo e Ngaahi Fuakava 104:17), ka ʻoku finangalo ʻa e ʻOtuá ke tau fakaʻaongaʻi fakapotopoto ʻa e ngaahi koloa fakaenatula ʻo e māmaní (vakai, Tokāteline mo e Ngaahi Fuakava 59:20).

Naʻe fakatupu ʻe he ʻOtuá ʻa e māmaní peá Ne fakahā ʻoku “lelei ʻaupito” ʻEne ngāué (vakai, Sēnesi 1:1, 31). Naʻe fakatupu ʻa e māmaní ke nofo ai e fānau ʻa e ʻOtuá ko ha konga ʻo ʻEne palani ʻo e fakamoʻuí. ʻE fakamaʻa ʻa e māmaní pea te ne maʻu ʻa e nāunau fakasilesitialé (vakai, Tokāteline mo e Ngaahi Fuakava 88:18–19).

Naʻe fakatupu ʻe he ʻOtuá ʻa e māmaní ke ʻikai ngata pē ʻi heʻene ʻaongá kae fakaʻofoʻofa foki. Ko e ngaahi meʻa ʻo e māmaní “kuo ngaohi ia ke ʻaonga pea fakaʻaongaʻi ʻe he faʻahinga ʻo e tangatá, ke fakamānako ki he matá pea fakafiefia foki ki he lotó,” kae pehē foki ke ne “fakaake ʻa e laumālié” (Tokāteline mo e Ngaahi Fuakava 59:18–19).

ʻOku totonu ke tau fakaʻapaʻapa ki he ʻOtuá ʻaki ʻetau houngaʻia ʻi Heʻene ngaahi fakatupú, fakahaaʻi ʻetau fakamālō koeʻuhí ko kinautolu, pea feinga ke tauhi ke nau fakaʻofoʻofa. ʻOku totonu ke tau tauhi ke tolonga ʻa e koloa fakaenatulá, maluʻi ʻa natula, pea fakaʻehiʻehi mei hono ʻuliʻí mo e fakavevé.