ʻOku ʻIkai Ke U Fie Makehe!
ʻOku nofo ʻa e tokotaha naʻá ne faʻú ʻi ʻIutā, USA.
“ʻOku mahuʻinga lahi ʻa e ngaahi laumālié ʻi he ʻao ʻo e ʻOtuá” (Tokāteline mo e Ngaahi Fuakava 18:10).
Naʻe fakatuʻamelie maʻu pē ʻa Mika ki he kalasi tauʻolungá. Naʻá ne manako ke fanongo ki he mūsiká. Naʻá ne manako ke fakaangaanga ʻene haka fakamanupuná mo feinga ke tonu ʻaupito. Pea naʻá ne manako taha pē he taimi ne haka fakataha ai ʻa e kalasí. ʻI heʻenau fai iá, naʻe hangē naʻe tatau kotoa pē ʻa e kau tauʻolungá. Naʻá ne ongoʻi ʻo hangē naʻe ʻikai ko ia pē naʻe ʻi ai hono Faingataʻaʻia fakaesinó.
ʻI he ʻaho ní ne nau ako ai ha haka foʻou. Naʻe siofi ʻe Mika ʻa e tau haka ʻene faiakó ʻi he ʻeá. Naʻá ne siofi e feinga ʻa e tamaiki fefine kehé ke faʻifaʻitakí. Naʻe lava ʻe ha niʻihi ʻo maʻu ia he taimi pē ko iá. Ne toe kiʻi ʻahiʻahi fakahoko tuʻo lahi ia ʻe ha niʻihi. Naʻe toutou feinga ʻa Mika, ka naʻe ʻikai pē ke tonu.
“Te ke tokoni mai faiako?” Ko e fehuʻi ange ia ʻa Miká.
Naʻe sio atu e taʻahine hono tafaʻakí kia Mika. Naʻá ne fakaofi atu leva ki hono kaungāmeʻá. Peá ne fanafana ange, “Ko e hā ʻoku pehē ai ʻene leá?” Naʻe fakatou tafoki ʻa e ongo tamaiki fefiné ʻo sio kia Mika.
ʻI he foki ʻa Mika ki ʻapi mei he kalasí, naʻá ne fakalongolongo pē he halá.
ʻI heʻenau aʻu ki ʻapí, naʻe kei natu ʻe he Fineʻeikí ha tou ʻi peito. Naʻe pani mahoaʻa hono kouʻahé. Naʻe faʻa kataʻi ia ʻe Mika he taimi ʻe niʻihi. Ka ko e ʻaho ní naʻá ne lī pē ʻene kató he falikí peá ne tangutu ʻi ha sea he veʻe tēpilé.
“Naʻe fēfē ʻa e tauʻolungá?” Ko e fehuʻi ange ia ʻa e Fineʻeikí.
Naʻe pehē ange ʻe Mika, “Kovi ʻaupito. Naʻá ku kole tokoni, pea naʻe pehē ʻe ha taʻahine ʻoku fakaoli ʻeku leá. ʻOsi pē ko iá peá ne siofi ʻe ia au.” Naʻe sio pē ʻa Mika ki lalo. “ʻOku ʻikai ke u toe fie ʻalu au ki he tauʻolungá.”
“ʻOiauē, Mika!” Ko e tali ange ia ʻa e Fineʻeikí. “Fakamolemole. ʻOkú ma saiʻia mo e tangataʻeikí he sio ki hoʻo tauʻolungá. ʻOkú ma polepole ʻi hoʻo ngāue mālohí!”
Naʻe ongoʻi ʻe Mika e kamata ke ne fakatē loʻimatá. “ʻOku ʻikai ke u saiʻia ʻi hoku Faingataʻaʻia fakaesinó. ʻOku ʻikai ke u saiʻia ʻi he kehe hoku fofongá. ʻOku ou fakaʻamu ne ʻikai faingataʻa ke u ako e ngaahi meʻa foʻoú. Naʻa mo e leá kuo pau ke u fakaangaanga ia!”
Naʻe tangutu hifo ʻa e Tangataʻeikí ʻi he tafaʻaki ʻo Miká peá ne puke mai ia. “Mika, ʻokú ma ʻofa lahi ʻiate koe. He ʻikai ke ma liliu ha meʻa ʻe taha fekauʻaki mo koe.”
Ka naʻe kalokalo pē ʻa Mika mo fakapuliki ʻaki hono nimá ʻa hono fofongá. “ʻOku ʻikai ke u fie makehe au. ʻOku ou fie maʻu ke toʻo hoku Faingataʻaʻia fakesinó meiate au!”
Naʻe fakalongolongo ʻa e Fineʻeikí mo e Tangataʻeikí ʻi ha kiʻi taimi siʻi.
Naʻe pehē ange ʻe he Fineʻeikí, “ʻOku ʻi ai ʻeku fakakaukau.” Naʻe fakasiosio hake ʻa Mika mei hono nimá. “Ko e hā ʻoku ʻikai te ke lotu ai ʻo kole ki he Tamai Hēvaní pe ko e hā ʻEne ongo fekauʻaki mo koé?”
Naʻe kiʻi fakakaukau ki ai ʻa Mika. Naʻá ne saiʻia he lotú. Naʻá ne kamokamo māmālie pē. “Te ke lava ʻo hiki mai ʻa e fehuʻí ke u manatuʻi ʻa e meʻa ke ʻeké?”
Naʻe hiki ʻe he Fineʻeikí ʻa e fehuʻí. Naʻe toʻo leva ʻe Mika ʻa e laʻipepá peá ne ʻalu ki hono lokí ke lotu.
ʻI heʻene foki mai ki peito hili ha ngaahi miniti siʻi mei aí, naʻá ne fofonga malimali mo fiefia ʻaupito. Naʻá ne pehē mai, “Naʻe tali mai ʻe he Tamai Hēvaní!”
“Ko e hā ʻEne folofola maí?” Ko e fehuʻi ange ia ʻa e Fineʻeikí.
“Naʻá Ne pehē mai, ‘Mika, ʻoku Ou ʻofa ʻiate koe ʻi he tuʻunga pē ʻokú ke ʻi aí,’ ko ʻene talí ange ia. “Pea naʻá Ne folofola ʻaki ia ʻi ha LEʻO LAHI!”
ʻI he ako tauʻolunga he uike hokó, naʻe ʻikai ke tokanga ʻa Mika ki he fakakaukau ʻa e tamaiki kehé fekauʻaki mo hono Faingataʻaʻia fakaesinó. Ka naʻá ne fakatokangaʻi ha taʻahine ʻe taha, ko Sala, naʻá ne mata mamahi. Naʻe faingataʻaʻia foki mo Sala ʻi hono ako e niʻihi ʻo e ʻū haka foʻoú.
ʻI he aʻu ʻa Mika ki ʻapí, naʻá ne fakakaukau ke fai haʻane kiʻi tohi kia Sala. Naʻá ne tā ha ngaahi foʻi haati lahi. Naʻe tokoniʻi ia ʻe he Fineʻeikí ʻi hono sipela e ngaahi foʻi leá.
Naʻe tohi ʻe Mika ʻo pehē, “ʻAlā siʻi Sala, Ko ha tokotaha tauʻolunga lelei koe. ʻOku ou fie hoko ko ho kaungāmeʻa. ʻOku ou fiefia ʻi heʻeta kalasi tauʻolunga fakatahá.”
Naʻe ʻikai faʻa tatali ʻa Mika ke ʻave ʻa e tohí kia Sala. Naʻá ne fakaʻamu ke ongoʻi ʻe Sala ʻokú ne fiefia mo ʻofaʻi foki ia ʻi he kalasi tauʻolungá.