ʻOku Totonu Nai Ke Hokohoko Atu ʻEku Laukongá?
ʻI he taʻu kuo ʻosí ne u fili ai ha tohi mei he laipelí ne fekauʻaki mo ha taʻahine naʻá ne kamataʻi ha tohinoa ʻi he ʻinitanetí (blog). Ne u fakakaukau ko ha tohi fakalata ia he ne u toʻu au mo e niʻihi ʻi he talanoá, pea ko ʻeku faʻeé ko ha tokotaha tohinoa ʻinitaneti ia (blogger). Pea naʻá ku fakakaukau ko ha tohi ia ʻe ala ʻaonga kiate au.
Naʻá ku kamata lau pē ʻa e tohí ʻo aʻu ki he taimi naʻe takuanoa ai ʻe he taʻahiné ʻa e huafa ʻo e ʻEikí. Ne ʻikai ke u loko fiefia ʻi he hili ʻeku lau ʻa e konga ko iá. Ka naʻe hoko atu pē ʻeku laukongá mo e fakaʻamu ʻe tuʻo taha pē ʻene hokó. Ne hili ʻeku lau ha ʻū peesi ʻe niʻihi, naʻá ne toe lea ʻaki e meʻa tatau.
Naʻá ku ʻalu ʻo tala ki heʻeku fineʻeikí ʻa e meʻa naʻá ku maʻú. Naʻe ʻikai ke u ʻiloʻi pe ʻoku totonu ke kei hoko atu nai ʻeku laukongá pe ʻikai. Naʻe talamai ʻe heʻeku fineʻeikí ko e filí ʻoku ʻaʻaku pē. Ka naʻá ne pehē mahalo ʻoku ʻikai ko ha meʻa lelei ia ke kei hoko atu e laukongá kapau naʻe lea ʻaki ʻe he taʻahiné ha ngaahi meʻa ʻoku tau ʻiloʻi ʻoku hala. Naʻe talamai ʻe heʻeku fineʻeikí naʻe tautautefito ʻene koví kapau naʻe takuanoa ʻe he taʻahiné ʻa e huafa ʻo e ʻEikí.
Naʻá ku fakakaukau ke u vakaiʻi angé pe ʻoku tuʻo lahi ange ʻene hokó, ko ia ne u huke fakavave leva ʻa e tohí. Naʻá ku ʻiloʻi ta ko hono takuanoa e huafa ʻo e ʻEikí ko e founga lea angamaheni pē ia ʻa e taʻahiné. Naʻá ku fakakaukau ke u fakafoki ʻa e tohí ki he laipelí ʻo ʻikai toe hoko atu ʻeku laukongá.
Naʻá ku ongoʻi loto-mamahi ʻi he takuanoa ʻe he tokotaha faʻu tohí e huafa ʻo e ʻEikí. Ka ʻi he hili ʻeku fakafoki ʻa e tohí ki he laipelí, naʻá ku fiefia ʻi heʻeku fai e fili totonú. Naʻá ku ʻiloʻi naʻá ku muimui ʻi he “Ko ʻEku Ngaahi Tuʻunga Moʻui ʻo e Ongoongoleleí” mei heʻeku tohi Tui ki he ʻOtuá ʻa ia ʻoku pehē, “Te u lautohi mo sio pē ʻi he ngaahi meʻa ʻoku fakahōifua ki he Tamai Hēvaní.” ʻOku ou ʻiloʻi ʻoku totonu ke tau toki fakaʻaongaʻi pē ʻa e huafa ʻo e Tamai Hēvaní mo Sīsū ʻi he loto-ʻapasia mo e fakaʻapaʻapa.