Fakakomipiuta Pē: Kakai Lalahi Kei Talavoú
Laka Ki Muʻa hili ʻEku ʻIlo ʻOku Fakaʻaongaʻi ʻe he Tokotaha Ne u Teu Mali Mo Iá e Ponokalafí
Naʻe faifai pea talamai ʻe he talavou ne ma teu malí ʻoku fefaʻuhi mo e ponokalafí. Te u kei lava nai ʻo mali mo ia?
ʻOku nofo ʻa e tokotaha naʻá ne faʻú ʻi Tahiti.
Ne u fetaulaki mo hoku husepānití ʻi he taimi ne ma fakatou hoko ai ko ha ongo tokoni ki he EFY. Ne u saiʻia ʻi heʻene maʻu ha fakamoʻoni mālohí pea mo e founga naʻá ne akoʻi mo feohi ai mo e toʻu tupú.
ʻI he kamata ke ma teití, ne ma ongoʻi ʻoku ʻi ai e finangalo e ʻEikí ki homa vā fetuʻutakí. Ka, ʻi he tupulaki homa vā fetuʻutakí, naʻe fakaʻau ke tōtuʻa ange e founga naʻá ne fakahaaʻi ai ʻene ʻofá. Ne kamata ke u fakakaukau ʻoku fefaʻuhi mo e ponokalafí, ka ʻi he taimi ne ma talanoa ai ki aí, naʻá ne fakaʻikaiʻi ʻoku ʻi ai haʻane palopalema fekauʻaki mo ia.
Ne kamata ke ma fokotuʻu ha ngaahi lao mamafa ange ke maluʻi kimaua. ʻI he taimi naʻá ne kole mali mai aí, ne u tali ia pea fakaʻau ke toe lelei ange—ka ʻi ha ʻaho ʻe taha, ne toe kamata ʻene holi ke fakahaaʻi mai ʻene ʻofá ʻi ha ngaahi founga ne u ongoʻi taʻefiemālie ai.
Ne u kei huʻuhuʻu pē fekauʻaki mo ʻene fakaʻaongaʻi e ponokalafí, ko ia ai ʻi ha ʻaho ʻe taha ne u fakamatala ange fekauʻaki mo ha taha ʻo hoku ngaahi hoa fakafaifekau ne fefaʻuhi mo e ponokalafí kimuʻa pea toki ngāue fakafaifekaú. Ne u feinga hoku lelei tahá ke ʻiloʻi ʻoku mahino kiate au hono tūkungá, ʻoku ou maʻu ha ʻofa mo ʻikai loto fakamaau, koeʻuhí ko ha tokotaha lelei moʻoni ia. Ne u fehuʻi ange leva pe ʻoku maʻunimā ia ʻe he ponokalafí, pea faifai pē ʻo ne talamai ko e moʻoni.
Mamahí mo e Fakaakeaké
Naʻe faingataʻa kiate au ke u talanoa mo sio hangatonu ki hono fofongá ʻi he kamataʻangá. Ne ʻikai ke u mei lava ʻo kātekina e ngaahi ongo ne u maʻú koeʻuhí ne u ongoʻi kuo fakahā mai ʻe he ʻEikí ʻe lava ke hoko e tangata ko ʻení ko hoku hoa taʻengatá. Ka neongo ʻeku lotomamahí, ne u ʻiloʻi ne fie maʻu ke u feinga ke fakamolemoleʻi ia, pea ne u ongoʻi hano ueʻi au ke ʻoua naʻá ku loto foʻi ʻi homa vā fetuʻutakí.
Ne u faʻa lotu mo ako e ngaahi lea fekauʻaki mo e faʻa fakamolemolé mo e fakaʻaongaʻi ʻo e ponokalafí. Ne u lau ha ngaahi fakamatala mo ha ngaahi fakamoʻoni lahi ʻa ha kakai mali naʻe fefaʻuhi honau ngaahi hoá mo e meʻa fakakona ko ʻení. ʻI heʻeku lau iá, ne u ongoʻi e ʻofa ʻa e Fakamoʻuí kiate au mo e tangata ne u teu mali mo iá, pea ne u maʻu ha toe fakamoʻoni ʻe taha ko e tangatá ni ko hoku hoa taʻengata moʻoní ia. Ne u ʻilo foki ai ha fakakaukau kehe fekauʻaki mo e Fakalelei ʻa e Fakamoʻuí—founga te Ne lava ʻo fakamoʻui ai ha laumālie fakatomala (ʻa e laumālie ʻo e tangata ne u teu mali mo iá) mo ha loto ʻoku mamahi (ʻoʻokú).
Ko e meʻa mahuʻinga ʻi heʻema fonongá ko ʻema talanoa mo e pīsope ʻa e tokotaha ne u teu mali mo iá. Naʻe tokonia kimaua ʻe heʻene ngaahi fakahinohinó ke ma vāofi ange ko ha ongomeʻa mali. ̄Naʻá ne maʻu ha kātaki lahi ʻi he taimi ne toe foki ai hoku husepānití ki he meʻa kimuʻá, pea naʻe ueʻi mo tokonia au ʻe heʻene ʻofa faka-Kalaisí, mo e sīpinga ʻofá ke u fakamolemoleʻi mo ikuʻi e palopalema ko ʻení mo e tokotaha ne u teu mali mo iá.
ʻI ha kiʻi taimi siʻi, naʻe fuʻu faingataʻaʻia ʻaupito ʻa e tangata naʻá ku teu mali mo iá ke sio ki heʻeku faingataʻaʻiá koeʻuhí ko ʻene ngaahi filí ʻo ʻikai ai ke ne toe fie mali mo au! Kae hili ʻema ngāue fakataha ʻi ha ngaahi māhina lahi koeʻuhí ke fakahaohaoaʻi iá, naʻe faifai peá ne ongoʻi kuo fakamolemoleʻi ia ʻe he ʻEikí peá mo au.
Naʻe faifai peá ma mali, pea kuo mālohi ange homa vā fetuʻutakí he taimí ni ʻi ha toe taimi kimuʻa. Kuo tokonia kimaua ʻe he aʻusia ko ʻení ke ʻoua naʻá ma mā ke fefakahaaʻiʻaki ʻema ngaahi palopalemá. Pea neongo ʻoku ʻikai toe maʻunimā ia ʻe he ponokalafí, ka ʻokú ma kei tokanga lahi mo fetaliuiʻaki pē kiate kimaua.
ʻE Lava ke Ngāue Lelei Ho Mo Vā Fetuʻutakí
Kapau ʻoku veuki ʻe he ngaahi nunuʻa ʻo e ponokalafí ho mo vā fetuʻutakí, ʻiloʻi ʻe lava pē ke ke maʻu ha loto faʻa fakamolemole. ʻE lava ke kei hokohoko atu hoʻomo feʻofaʻakí mo e fengāueʻaki fakatahá ke maʻu ha founga ke ikunaʻi ai ia. ʻOku tau maʻu kotoa ha totonu ki he fakamoʻui ʻo e Fakalelei ʻa e Fakamoʻuí. Kuo pau ke tau ʻiloʻi ʻoku tau loto mamahi pea te tau toki maʻu pē ʻa e fakamoʻui kakató ʻi he tokoni ʻa e Fakamoʻuí.
ʻOku makehe e talanoa ʻa e tokotaha kotoa pē, pea ʻoku makehe ʻa e vā fetuʻutaki kotoa pē. ʻOku ʻi ai ha niʻihi ko e meʻa totonu ke nau faí ko hono fakangata e vā fetuʻutakí. Ka ʻoku ou fakatauange pē ʻe lava ke tokoni ʻema talanoá ki ha niʻihi kehe ʻoku ʻi ha ngaahi tūkunga tatau. Koeʻuhí ne u maʻu e fakapapau ko iá mei he Laumālie Māʻoniʻoní, pea ʻi he tokoni ʻa e Fakamoʻuí mo ʻEne Fakaleleí, ne u lava ai ʻo fakamolemoleʻi e tokotaha ne u teu mali mo iá pea hoko atu homa vā fetuʻutakí. ʻOku ou ʻilo ko e fili totonu ia kiate aú.
Kapau ʻokú ke fekuki mo ha tūkunga tatau, fakakaukau ki ho ngaahi tūkunga lolotongá mo ia ʻe lava aʻusia he kahaʻú ʻi he faʻa lotu. Kapau ʻokú ke maʻu ha fakapapau mei he Laumālié ko e meʻa totonú ke hokohoko atu pē ho mo vā fetuʻutakí pea ʻokú ke maʻu ha loto-falala, ʻiloʻi ʻe lava ke lelei ho mo vā fetuʻutakí ʻi hoʻomo fengāueʻaki fakatahá mo hoʻomo falala ki he Tamai Hēvaní.
Ko ha tangata lelei hoku husepānití, pea ʻoku ou ʻofa lahi ʻiate ia ʻi ha toe taimi ange! He ʻikai feʻunga ʻeku fakamālōʻia ʻa e ʻEikí ʻi Heʻene tokonia kimaua ke ma fakaakeake mo malava ke ma malí. Kuo tokonia kimaua ʻe he ʻEikí ke ma tupulaki fakataha ko ha ongomeʻa mali kuo mateuteu ke fehangahangai mo ha meʻa pē kuó Ne palani ki heʻema moʻui fakatahá.