Ko e Pole ʻo e Temipalé
Fai ʻe Sisitā Joy D. Jones
Palesiteni Lahi ʻo e Palaimelí
“ʻE liliu ʻa e loto ʻo e fānaú ki heʻenau ngaahi tamaí” (Tokāteline mo e Ngaahi Fuakava 2:2).
ʻI ha ʻaho Sāpate ʻe taha naʻá ku ʻaʻahi mo hoku ongo tokoní ki ha fakataha ʻa e Siasí. Naʻa mau lea fekauʻaki mo e temipalé pea mo e ngaahi meʻa mahuʻinga ʻoku hoko ʻi lotó. Hili ʻa e fakatahá, naʻe haʻu ha kiʻi tamasiʻi taʻu 12 ko hono hingoá ko Kolopi ʻo lulululu mai kiate au. Naʻá ma talanoa fekauʻaki mo e temipalé. Hili iá, ne u fakatukupaaʻi ia ke ne fekumi ki ha hingoa ʻi hono fāmilí ke ʻave ki he temipalé.
Hili pē ha taimi nounou mei ai, ne u maʻu ha tohi meia Kolopi. Ko e meʻa ʻeni naʻe talamai ʻe Kolopí:
“Naʻá ku foki ki ʻapi peá u maʻu ha hingoa foʻou. Naʻá ku toki ʻiloʻi hake ta ko ʻeku kuitangata hono tolú ia!
“Ne hili ha taimi nounou mei ai naʻá ku ʻalu ki he temipalé peá u papitaiso maʻana. Naʻe matuʻaki makehe he ko hoku tokouá naʻá ne papitaiso aú pea ko ʻeku tangataʻeikí naʻá ne hilifakinima aú.
“Ne u ongoʻi loto-māfana pea naʻá ne ʻomi ʻa e loto-nonga. Naʻá ku ongoʻi fiefia ʻi heʻeku meʻa naʻe fai ki heʻeku kui tangatá he koeʻuhí te ne lava he taimí ni ʻo ʻalu ki he puleʻanga fakasilesitialé ʻo nofo ai mo hono fāmilí. ʻI he toenga ʻo e ʻaho ko iá, naʻá ku ongoʻi fiefia ʻaupito.
“Naʻá ku toe ʻiloʻi foki ʻoku ʻikai ke ʻilo ʻe ha taha pe ko hai e ongomātuʻa ʻo ʻeku kui tangata hono tolú, ko ia te u lava leva ʻo fekumi ki hona hingoá pea ʻave foki mo ia ki he temipalé!”
He toki tā sīpinga fisifisimuʻa ne fai ʻe Kolopí! ʻOku tatau ai pē pe ko e hā ho taʻu motuʻá, te ke lava pē ʻo hoko ko ha faʻifaʻitakiʻanga ki ho fāmilí mo e ngaahi kaungāmeʻá. Te ke lava pē ʻo vahevahe ʻa e ongoongoleleí ki he tokotaha kotoa pē ʻokú ke maheni mo iá—ʻo aʻu ki hoʻo ngaahi kuí!