Fakakomipiuta Pē: Kakai Lalahi Kei Talavoú
Kuó u Fāifeinga ke Ikunaʻi ʻa e Ponokalafí Ko e Hā Ka Ne Taʻe Malava Aí?
ʻI he taimi ne u ʻiloʻi ai ʻoku tofanga hoku kaumeʻá ʻi ha palopalema fekauʻaki mo e ponokalafí, ne u feinga hoku tūkuingatá ke tokoniʻi ia ke tafoki ki he Fakamoʻuí ki ha tokoni.
ʻOku nofo ʻa e tokotaha naʻá ne faʻú ʻi Kuatemala.
Naʻá ku teiti mo ha talavou naʻá ku fuʻu ʻofa lahi ʻaupito ai ʻi ha taʻu nai ʻe taha. Ne u pehē pē te u mali mo ia! Ka naʻe ʻikai ke u teitei fakakaukau ʻe hoko ʻeku teiti mo iá ke u fehangahangai ai mo ha palopalema ne u ʻosi fāifeinga ʻaki hoku tūkuingatá kotoa ke ikunaʻi.
ʻI heʻeku teuteu ke ʻalu ʻo ngāue fakafaifekaú, ne pau ke u ʻalu ki heʻeku pīsopé mo fakahaaʻi kiate ia ne u fefaʻuhi mo e ponokalafí ʻi he kuohilí. Hili ʻeku fakatomala mo huʻi atu e faingataʻa ko ʻení mei hoku laumālié, ne ʻikai te u toe fakakaukau ʻe ʻi ai ha taimi ʻe toe uesia ai ʻe he ponokalafí ʻeku moʻuí. Ka naʻe hala ʻeku fakakaukaú.
ʻI he taimi ne u ʻiloʻi ai ʻoku fakaʻaongaʻi ʻe he tangata ko ʻeni ne u teuteu mali mo iá ʻa e ponokalafí, ne u vēkeveke ke tokoniʻi mo poupou kiate ia ʻi hono ikunaʻi iá. Kuó u ʻosi foua e hala ʻo e fakatomalá mo e feinga ke ikunaʻi ʻa e ponokalafí kimuʻa, pea ne u ʻilo e meʻa ʻe lava ke fai ʻe he ʻEikí maʻaná. Ka ne hangē ne ʻi ai maʻu pē ha fehālaaki he taimi kotoa pē ne u feinga ai ke tataki ia ki he tokoni naʻá ne fie maʻu ke ikunaʻi ʻaki ʻene palopalemá. Naʻe hangē ne ʻikai ke ne fie maʻu e tokoní. Hili ha taimi siʻi, ne u fakatokangaʻi ʻoku ʻikai ke ma maʻu ha ngaahi fakakaukau tatau fekauʻaki mo e ponokalafí. ʻIo, ko ha mēmipa fakatouʻosi pē kimaua ʻo e Siasí, ka naʻe hangē ne ʻikai ʻuhingamālie tatau e ngaahi akonaki ʻo e ongoongoleleí kiate kimauá.
Ne u puputuʻu. Ne u ʻofa ai, pea naʻá ku tui te ne lava ʻo ikunaʻi e palopalema ko ʻení kapau ʻe tokonia ia. Ne u ongoʻi laveangofua foki koeʻuhí ko e pau ke u fehangahangai mo e palopalema tatau naʻá ku fāifeinga mālohi ke ikunaʻi ʻi he kuohilí. Ne u fakakaukau ʻi ha efiafi poʻuli ʻe taha ke u lotu ʻo kole ha fakahinohino mei heʻeku Tamai Hēvaní ki he founga ke laka ai ki muʻá koeʻuhí ne u fie maʻu ha mālohi ke ikunaʻi ʻaki e ʻahiʻahí, pea ne u fie maʻu foki ke u ʻiloʻi e founga ke tokoniʻi ʻaki ʻa e tokotaha ne u palani ke vahevahe ʻeku moʻuí mo iá.
ʻI he taimi naʻe faifai peá u maʻu ai e talí, ne u ongoʻi ha nonga peá u ʻiloʻi ʻoku fie maʻu ke u talanoa ʻaki mo ha taumuʻa pau ki he tangata ne u teiti mo iá. Ne u loto ke fakahā kiate ia e meʻa ne u ʻamanaki ki ai ʻi haʻaku teiti mo ha taha, ʻa ia ko e mali ʻi he temipalé mo maʻu ha fānau. Ne u fie ʻilo pe ʻoku fenāpasi nai homa kahaʻú pea ʻokú ne fakataumuʻa nai ki he Fakamoʻuí. Ne u fie ʻilo pe ʻoku totonu nai ke kei hokohoko atu homa vā fetuʻutakí. Ne u maʻu ha ngaahi ʻamanaki lelei ki ai mo tui ʻe ola lelei e meʻa kotoa hili ʻema talanoá.
Ko ha hoʻatā laʻalaʻā ne u vahevahe ange ai ʻeku ngaahi fakatuʻamelié mo e ngaahi taumuʻa fekauʻaki mo haku fāmili ʻi he kahaʻú mo hono ohi hake ʻeku fānaú ʻi he ongoongoleleí. Ne u ʻohovale, ʻi he hili ʻene fanongo ki heʻeku fakamatalá, naʻá ne ʻita mai kiate au. Ne u ʻiloʻi ai ʻoku kehekehe ʻaupito ʻema ngaahi fakaukau ki he kahaʻú. Ne u fuʻu loto-mamahi ʻaupito, kae fakaʻohovalé kuó u ongoʻi ha nonga, pea ne u ʻilo ko ʻeku talí ke fakangata homa vā fetuʻutakí. Naʻe ‘ikai ke ne ʻi ha tuʻunga naʻá ne loto fiemālie ai ke ne feinga ke ikunaʻi ʻene ngaahi palopalema mo e ponokalafí pe tafoki ki he Fakamoʻuí ki ha tokoni, pea ne ʻikai ke u lava ʻo tokoniʻi ia kapau naʻe ‘ikai ke ne fie maʻu e tokoní.
Ne kiʻi fuoloa ha taimi, ne u nofo ai ʻo fifili pe ko e hā ne u kei ongoʻi loto-lavea ai hili ʻeku fai ʻa e meʻa totonú pea fai e meʻa kotoa ne u ala lava ʻo faí ke tokoniʻi iá. Ka naʻe faifai, peá u ikuʻi ʻeku loto-mamahí peá u tokanga taha ki he nonga ne u ongoʻi ʻi he taimi ne u fakangata ai homa vā fetuʻutakí. Ne u ʻilo ne haʻu e tali ko iá mei langí.
Kuo ʻosi eni ha ngaahi taʻu mei he taimi ne u fakangata ai hoku vā fetuʻutaki mo e tangata ko iá. Pea ʻoku ou kei vakai pē ki ai ko e tangata lelei ʻo hangē ko ia naʻá ne pehē maʻu pē kimuʻá. Ka ʻoku ou ʻilo ko ia ʻoku fie maʻu ke ʻalu ki he Fakamoʻuí ki ha tokoní—he ʻikai te u lava ʻo fakamālohiʻi ke ne fai ia. ʻOkú ne maʻu ʻene tauʻatāina ke filí kae pehē pē foki kiate au. Talu mei he aʻusia ko ʻení, kuó u feinga ke muimui he leʻo ʻo e Laumālie Māʻoniʻoní ʻo ʻikai toe momou. ‘Oku ou ʻilo ‘oku ʻi ai ha palani ‘a e Tamai Hēvaní kiate kitautolu hono kotoa pea ʻe lava ke tau falala ʻi heʻetau fai e ngaahi fili ‘oku makatuʻunga ʻi he ngaahi ueʻi ‘a e Laumālié, ʻe ʻikai ke Ne teitei tuku ke takihalaʻi kitautolu. ‘Okú ne teuteuʻi maʻu pē kitautolu ki he ngaahi meʻa lelei ʻe hoko.