Leʻo ʻo e Kau Māʻoniʻoni ʻi he Ngaahi ʻAho Kimui Ní

Naʻá Na Tō ha Tenga ʻi Hoku Lotó

Marta Algarve

Sanitā Katalina, Palāsila

Tā fakatātā ʻa Rafael López

Ko ʻeku haʻú mei fē? Ko e hā ʻeku meʻa ʻoku fai ʻi hení? Te u ʻalu ki fē ʻi he hili ʻa e moʻuí ni?

ʻI hoku taʻu 29, naʻá ku toutou ʻeke pē kiate au ʻa e ngaahi fehuʻi ko ʻení. Kuo ʻosi mālōlō ʻeku ongomātuʻá. Naʻá ku loto-mamahi ʻi he mālōlō kei valevale ʻa hoku ʻuluaki fohá. Naʻe ʻi ai mo haʻaku fānau ʻe toko tolu ke tauhi mo ha moʻui ne fonu ʻi he ngaahi faingataʻá.

Naʻe kamata ke tali ʻe he ʻEikí ʻeku ngaahi fehuʻí ʻi he taimi naʻá Ne tataki mai ai ha ongo faifekau kei talavou ki hoku ʻapí. ʻI heʻeku talitali lelei mai kinaua ki lotó, naʻá na fehuʻi mai pe naʻe ʻi ai nai ha meʻa ne u ongoʻi ʻoku mole mei heʻeku moʻuí. Naʻá ku talanoa ange kau ki heʻeku ongomātuʻá mo hoku fohá. Naʻá ku talaange ne u fakakaukau ʻoku ʻikai totonu ia ke maʻu ha fānau mo faʻu ha fāmili ʻo kapau ʻe ngata kotoa pē ia ʻi he maté. Naʻá ku fehuʻi ange pe te u toe sio nai ki heʻeku ongomātuʻá mo hoku fohá.

Naʻá na pehē mai, “Māʻata, te ke lava ʻo maʻu ho fāmilí ʻo taʻengata.”

Naʻe fonu hoku lotó ʻi he fiefia. Naʻá ku fie ʻilo lahi ange. ʻI heʻena ʻaʻahi hokó, naʻá na akoʻi mai kiate au fekauʻaki mo e ongoongolelei ʻo Sīsū Kalaisí. Naʻá na ʻomi ha Tohi ʻa Molomona peá na fakatukupaaʻi au ke u lau ia pea fehuʻi ki he ʻOtuá pe ʻoku moʻoni nai ʻEne folofolá. Naʻá ku tali ʻena polé. ʻI he taimi naʻá ku lotu aí, naʻe ongo mahino mai ʻa e tali ʻa e ʻOtuá. Naʻá ku ʻiloʻi ʻi hoku lotó ne moʻoni ia.

Ka ko e meʻapangó, he ko e taimi naʻá ku ngāue ai ʻi ha ngāueʻanga foʻoú, ne ʻikai ke u toe fetuʻutaki mo e ongo faifekaú. ʻI he ngaahi māhina kimui aí, ne ngata ai ʻeku nofomalí pea ne u feinga ke kamata foʻou mo ʻeku fānaú.

Naʻe faifai peá u toe mali. ʻI ha ʻaho ʻe taha naʻe pehē mai ʻe hoku malí ʻokú ne ongoʻi ʻa e puli ʻa e ʻOtuá mei heʻene moʻuí. Ne ma fakakaukau ke mau maʻulotu ʻi he siasi naʻá ne faʻa ʻalu ki aí. ʻI heʻema hū atu ki he falé, naʻá ku fakatokangaʻi ha Tohi ʻa Molomona ʻi he funga tēpile he hūʻangá. Ko e siasi tatau pē ʻeni ne fakafeʻiloaki ki ai aú! Naʻá ku saiʻia ʻi he Laumālie ne u ongoʻi ʻi aí. ʻI heʻema fokí, ne u ʻeke ki hoku husepānití pe ko e hā ha founga ke papitaiso ai au.

Naʻá ne pehē mai, “ʻE fie maʻu ke akoʻi koe ʻe he ongo faifekaú.”

“Naʻe ʻosi akoʻi au ʻi he taʻu ʻe nima kuohilí!” Ko ʻeku talí atu ia.

Naʻe akoʻi ʻa e ngaahi lēsoní kiate au mo ʻeku fānaú. Ko homau ʻaho papitaisó ko e ʻaho fakafiefia taha ia ʻo ʻemau moʻuí.

Hili ha ngaahi taʻu lahi mei ai, naʻá ku ongoʻi ʻoku totonu ke u tala ki he ongo sisitā ne na fuofua akoʻi aú kuó u kau ki he Siasí. Naʻá ku ʻilo ʻi he Facebook ha kulupu ʻo ha kau ʻosi ngāue fakafaifekau mei he Misiona Palāsila Sanitā Maliá. Naʻe kau ai ha taha ʻo e ongo sisitā ne na akoʻi aú. Naʻá ku kole ke ma kaungāmeʻa peá u fakamatalaʻi ange au, founga ne u hoko ai ko ha mēmipa ʻo e Siasí, ko e silaʻi homau fāmilí ʻi he temipalé, pea mo e lolotonga ngāue fakafaifekau taimi-kakato hoku fohá. Naʻá ku talaange naʻe malava kotoa ʻeni koeʻuhí he naʻá ne tō mo hono hoá ʻa e tenga ʻo e ongoongolelei kuo toe fakafoki maí ʻi hoku lotó.