Ko ha Lotu Pē ʻe Taha Hono Mamaʻó
Naʻe ilifia ʻa Poloti ke toe foki ʻo mohe. Fēfē kapau ʻe toe ʻi ai haʻane misi fakailifia?
“Lotu, ʻokú Ne ʻi ai” (Tohi Hiva ʻa e Fānaú, 6).
Naʻe ʻā ʻa Poloti ʻo tangutu fakavave hake ʻi hono mohengá. Naʻe tā vave hono mafú.
Naʻe mosimosi ʻa e ʻuhá ʻi he ʻató lolotonga ʻene tangutu he fakapoʻulí. Naʻá ne fanongo ki he hafu ʻa e vaí mei he fuʻu fiki ʻAfilika ʻi tuʻa hono veʻe luvá, pea naʻe pikipiki mo māfana ʻa e ʻeá. Naʻe mihiʻi ʻe Poloti ʻene mānavá peá ne feinga ke fiemālie. Ko ha misi pē ia.
Naʻá ne hifo mei hono mohengá peá ne fakasiosio ki he loki ʻo ʻene ongomātuʻá. Naʻe mohe fiemālie pē ʻa Mama mo Papa. Naʻe mohe nonga pē mo hono tuofefine siʻisiʻi ko Sīliá ʻi hono mohengá. Naʻe lelei e meʻa kotoa pē. Naʻe malu ʻa hono fāmilí.
Naʻe toe kaka ʻa Poloti ki hono mohengá ʻo feinga ke hoko atu ʻene mohé. Naʻá ne toutou tāfisi mo teka holo ʻi hono mohengá. Naʻá ne ʻiloʻi ne ʻikai moʻoni ʻene misí, ka naʻe fakailifia ʻaupito ia! Neongo naʻá ne ongosia, ka naʻá ne ilifia ke hoko atu ʻene mohé. Fēfē kapau ʻe toe ʻi ai haʻane misi fakailifia?
Naʻe tokoto foʻohake pē ʻa Poloti ʻo siofi e ʻató. Naʻá ne feinga ke fakakaukau ki ha meʻa fakafiefia. “Tamai Hēvani, ʻokú ke ʻi ai? ʻOkú ke ongoʻi nai siʻeku lotú?” Ne ongoʻi māfana ʻa Poloti ʻi heʻene fakakaukau ki he ngaahi lea ʻo e hiva Palaimeli ʻokú ne manako taha aí. Naʻe akoʻi ʻe Sisitā Kiosikā kiate kinautolu ʻoku tokangaʻi maʻu pē ʻe he Tamai Hēvaní kinautolu. Te nau lava ʻo lotu kiate Ia ʻi ha faʻahinga taimi mo ha faʻahinga feituʻu pē.
Naʻe ʻiloʻi ʻe Poloti ʻa e meʻa ke faí. Naʻá ne hifo mei he mohengá ʻo ne tūʻulutui ʻo lotu.
Naʻá ne lotu ʻo pehē, “ʻE Tamai Hēvani, ʻoku ou fuʻu ilifia ʻaupito. Fakamolemole ʻo maluʻi ange muʻa hoku fāmilí. Pea fakamolemole ʻo tokoni mai muʻa ke u lava ʻo mohe pea ʻoua naʻá ku toe misi fakailifia.”
Naʻe fakaʻosi ʻe Poloti ʻene lotú peá ne toe kaka leva ki he mohengá. Naʻe fiemālie ʻa hono sinó, pea naʻe nonga mo ʻene fakakaukaú. Ne taimi siʻi pē mei ai kuó ne mohe leva.
ʻI he pongipongi haké, naʻe ʻā hake ʻa Poloti ʻoku ulo māfana mai ʻa e laʻaá ʻi hono luvá. Naʻá ne fanongo ki he patatō mai ʻa e kuló mei he peitó pea naʻá ne tuʻu hake ʻo ʻiloʻi ko Mama ia. Naʻe tangutu ʻa Sīlia he tēpilé ʻo kai e toenga manioké. Naʻe fakamafana foki ʻe Mama ha meʻa maʻana.
Naʻe pehē ange ʻe Mama, “Mālō e Lelei, Ne fēfē hoʻo mohé?”
Naʻe pehē ange ʻe Poloti, “Naʻá ku misi fakailifia ʻaupito. Ka ne u fai ha lotu. Naʻe tokoniʻi au ʻe he Tamai Hēvaní ke u ongoʻi malu.”
Naʻe pehē ange ʻe Mama, “ʻOku ou fakaʻofaʻia siʻo misi fakailifiá.” Naʻá ne fāʻofua fuoloa kia Poloti. “Ka ʻoku ou fiefia ʻi hoʻo fai ha lotú. ʻOku hangē naʻe tokoniʻi lahi koe ʻe he Tamai Hēvaní.”
Naʻe pehē ange ʻe Poloti, “ʻIo, naʻe pehē. Naʻá ku lava ʻo toe hoko atu pē ʻeku mohé, pea naʻe ʻikai ke u toe misi fakailifia.” Naʻe kuku maʻu ʻe Poloti ʻa Mama. Naʻá ne fiefia ʻi heʻene ʻiloʻi neongo pe ko e hā e lahi ʻo ʻene ongoʻi ilifiá, ka ko e Tamai Hēvaní ko ha lotu pē ʻe taha Hono mamaʻó.