Ngaahi ʻAta ʻo e Tuí
Uilisoni Tī Paula
Seni Hōsē, ʻUlukuai
Naʻe hoko ha fakatuʻutāmaki ʻi he paikí ne iku mamatea ai ʻa Uilisoni. Hili ha taʻu ʻe taha mei ai naʻe mālōlō ʻa hono uaifí. ʻI he hoko ʻa Uilisoni ko ha uitou ʻoku ʻi ai haʻane ongo kiʻi tamaiki fefiné, naʻe ʻikai ke ne ʻiloʻi ʻa e meʻa ke faí. Naʻe ʻikai ke ne ʻiloʻi pe ʻoku ʻi ai nai ha taumuʻa ʻo e moʻuí. Ne mei lava pē ke moʻui mamahi ʻa Uilisoni. Ka naʻe kamata ke ne fekumi ki he moʻoní.
Cody Bell, taha faitā
Hili ʻeku fakatamaki ʻi he paikí mo e mālōlō hoku uaifí, naʻe ʻi ai ʻeku ongo tamaiki fefine iiki ke u tauhi. Naʻe ʻikai ke u ʻiloʻi pe te u ohi fēfē hoku ongo ʻofefiné lolotonga ʻeku heka salioté. Naʻe liliu moʻoni ʻe he fakatamaki ko ʻení ʻeku moʻuí.
Naʻe lahi ʻeku ngaahi fehuʻí. Ko e hā ʻoku hoko ai e ngaahi meʻa fakamamahí? Naʻá ku feinga ke fai e ngaahi meʻa totonú ʻi heʻeku moʻuí, ka naʻe mālōlō hoku uaifí peá u iku ʻo mamatea mo heka saliote, hili iá ne pau ke tafa ʻe he kau toketaá e ʻulu hoku ʻofefiné ke toʻo ha foʻi ngungu mei ai. Naʻe kamata ke u fakakaukau ʻoku ʻikai ha taumuʻa ʻo e moʻuí.
Naʻá ku ʻiloʻi naʻe fie maʻu ke u fekumi ki he moʻoní. Naʻá ku fekumi ʻi he ngaahi tui fakalotu kehekehe peá u maʻu ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ku ongoʻi ko e moʻoní ia.
Naʻá ku ʻiloʻi ʻoku ʻi ai ha moʻui hili ʻeni, pea ko e taimi te tau mate aí, ʻoku malava pē ke tau fakataha mo e niʻihi ʻoku tau ʻofa aí. Naʻe fakafiefia ʻeni kiate au koeʻuhí ko e taʻu fakaʻofoʻofa ʻe 10 ne u moʻui ai mo hoku uaifí.
Naʻe hoko hono maʻu ko ia ʻo e ongoongoleleí ke liliu ai e tapa kotoa pē ʻo ʻeku moʻuí Naʻe kamata ke u maʻu ʻa e nongá ʻo ʻikai ke u loto-hohaʻa pea ʻikai ke u ongoʻi halaia. Naʻe fakafiefia ki heʻeku moʻuí ʻa e taimi ne mau ʻalu ai ki he lotú he Sāpate kotoa. Ne mau foki ki ʻapi kuo fakamālohia kimautolu. Naʻe papitaiso kimautolu pea iku ʻo mau sila ki he taʻengatá ʻi he temipale ʻi ʻĀsenitiná.
ʻI he taimi ní ʻoku ou tupulaki ʻi he Siasí. Kuó u hoko ko ha tokoni ʻi he kau pīsopelikí, pea ʻoku ou feinga ke ako mei heʻeku ngaahi aʻusia kotoa pē, mei he ngaahi sivi kotoa pē ʻo e moʻuí. ʻOku ou maʻu mei heni ha ivi. Koeʻuhí ko e taʻu ʻeni ʻe 20 tupu ʻeku heka salioté, kuó u ako ʻo ʻiloʻi ko e fiefiá ʻoku haʻu ia mei he lotó. ʻOku ako ʻe ha tokotaha ha meʻa lahi ange ʻi he ʻaho kotoa pē. ʻOku ou houngaʻia ai.
ʻOku ou ʻiloʻi ʻoku ʻi ai ha taumuʻa ʻo e nofo māmaní. ʻOku tau ʻi hení ko ha konga ʻo e palani taʻengata ʻa e Tamai Hēvaní. ʻOku ʻi ai hotau Fakamoʻui naʻá Ne ikunaʻi ʻa e maté pea kuó Ne toetuʻu. ʻI heʻeku ʻiloʻi ʻení ʻoku ou maʻu ai ha ivi. ʻI he taimi ní ʻoku ou feinga ke u vilitaki mo laka ki muʻa. ʻOku ʻi ai ʻeku taumuʻa pea ʻoku ou ʻiloʻi ko e taimi ʻoku ou feinga ai ke u moʻui tāú, ʻe lava ke u maʻu ha fāmili ʻoku taʻengatá.
Neongo e ngaahi faingataʻa ʻoku fehangahangai ʻa Uilisoni mo hono ʻofefine ko Sofiá mo iá, ka ʻoku ʻomi ʻe he ongoongoleleí ʻa e nonga, fiefia mo e ivi kiate kinaua. Kuo nofo ʻa Sofia mo ʻene tamaí talu hono tafá. ʻOku fiefia ʻa Uilisoni ke ngāue ʻi he Siasí.
Ko e taha ʻo e ngaahi taukei kuo fakatupulaki ʻe Uilisoni talu ʻene mamatea mei he fakatamakí ko e feimeʻatokoni lolotonga ʻene feinga ke ʻunuki holo ʻene salioté ʻi he peitó.
ʻOku maʻu ʻe Uilisoni ʻa e ʻamanaki lelei mo e ivi mei he Fakamoʻuí ʻi heʻene ako e folofolá.
ʻOku maʻu meʻatokoni efiafi fakataha ʻa e ongo faifekaú mo e fāmili Tī Paulá. ʻOku hoko ʻa e ʻofa ʻa Uilisoni ʻi he ongoongoleleí ko ha fakaivia ia ki hono fāmilí mo e Siasí.
Hili ha fakatamaki lahi mo e mālōlō ʻa e uaifi ʻo Uilisoní, naʻá ne veiveiua ki he taumuʻa ʻo e moʻuí. Naʻá ne ʻiloʻi ʻa e taumuʻá ʻi heʻene ʻiloʻi ʻa e ongoongolelei ʻo Sīsū Kalaisí.
ʻOku maʻu ʻe Uilisoni mo Sofia ha ʻamanaki lelei ʻi he ongoongoleleí. Kuo teʻeki ke hoko ʻa e heka saliote ʻa Uilisoni ʻi ha taʻu ʻe 20 tupú ke taʻofi ai ia mei heʻene ngāue tokoni ʻi ha ngaahi founga ʻuhingamālié.
ʻOku ʻomi ʻe he malimali ʻa Uilisoní ha fakamoʻoni ki he mahu fakalaumālie ʻi heʻene moʻuí. ʻOku pehē ʻe Uilisoni, “ ʻOku haʻu ʻa e fiefiá mei he lotó. ʻOku ako ʻe ha tokotaha ha meʻa lahi ange ʻi he ʻaho kotoa pē.”
ʻI he maʻu meʻatokoni fakataha ʻa e fāmili Tī Paulá mo e ongo faifekaú, ʻoku ʻikai ngata pē ʻi heʻena vahevahe ʻa e meʻatokoní, ka ʻokú na vahevahe foki ʻena ʻofá mo e houngaʻia koeʻuhí ko e ongoongoleleí.