Leʻo ʻo e Kau Māʻoniʻoni ʻi he Ngaahi ʻAho Kimui Ní
Tataki kia Mōnika
Rosana Soares
ʻIutā, USA
Tā fakatātā ʻa Stan Fellows
ʻI he taimi naʻá ku nofo ai ʻi Sao Paulo, Palāsilá, naʻá ku maheni ai mo ha fefine makehe ko hono hingoá ko Kalasia. Ko ha fefine lelei mo angaʻofa ia pea maheningofua mo e tokotaha kotoa pē.
Naʻe hoko ʻa Kalasia ko hoku hoa faiako ʻaʻahí. Ko ha faʻē ia ki ha fānau ʻe toko tolu, naʻá ne ngāue fakataimi, pea naʻe ʻikai haʻane meʻalele pe telefoni, ka naʻe ʻikai ke taʻofi ai ʻene ngāue tokoní.
Ne u lava pē ʻo sio mei hoku fakafaletoló ki ha matapā sioʻata ʻo hono falé. ʻI he taimi ʻatā ʻa Kalasiá, naʻá ne faʻa tautau ai ha konga tupenu kulokula ʻi he matapā sioʻata ko iá ke fakaʻilonga mai kiate au naʻá ne maau ke ma ʻalu ʻo ʻaʻahi. Naʻe ʻikai ʻaupito ke ne teitei ʻilo ha ʻuhinga ke ne taʻe fai ai ha tokoni. Ne u faʻa fakakaukau ki he fakaʻilonga ʻa Kalasiá mo ʻene tā sīpinga fakaofo ʻo e ngāue tokoni faivelenga mo faingofuá.
ʻOku ou manatuʻi lelei ha aʻusia ʻe taha. Naʻá ma mateuteu mo lotu kimuʻa peá ma toki ʻalu ʻo ʻaʻahi ki ha taha ʻo ʻema kau fefiné. ʻI heʻema aʻu atu ki hono ʻapí, ne ma toki ʻiloʻi kuó ma ʻalu ki he ʻapi ʻo ha fefine kehe! Naʻe vahe mai ke ma ʻaʻahi ki he fefine ko ʻení, ko ha faʻē māmālohi naʻe ʻi ai ʻene fānau iiki ʻe toko ua, ka naʻe ʻikai ke ma palani ke ʻaʻahi kiate ia he ʻaho ko iá. Ka koeʻuhí kuó ma aʻu ki ai, naʻá ma tukituki, ka naʻe ʻikai ke tali mai ʻe ha taha.
Naʻá ma fakakaukau ke ma vilitaki pē ʻo tali. Naʻe faifai pea haʻu ʻa e fefine ko Mōniká ʻo ne talamai ʻokú ne moʻua. Ne ma fakatokangaʻi naʻá ne ongosia pea naʻá ne fakatē loʻimata. ʻI heʻema talaange ne ma ʻalu atu ke fai ha tokoní, naʻá ne fakangofua mai ke ma hū ki fale. Naʻe lolotonga tangi ʻene pēpeé, peá ma talaange leva ke ne tokangaʻi ʻene pēpeé ka ma talitali pē. ʻI he taimi naʻe ʻalu ai ʻa Mōnika mo e pēpeé ki he fungavaka ʻi ʻolungá, ne ma ngāue leva, ne ma fakamaʻa ʻa e ʻū lokí mo pelupelu ʻa e ʻū vala kotoa pē ne ma sio ki aí.
ʻI he sio ʻa Mōnika ki he fakaʻofoʻofa hono falé, naʻe kamata ke ne tangi, naʻá ne huhua mai hono lotó mo vahevahe ha niʻihi ʻo ʻene ngaahi faingataʻaʻiá. Ne ma palōmesi ange te ma tokoniʻi ia, pea naʻá ma talanoa ki he palesiteni Fineʻofá kau ki heʻene ngaahi faingataʻaʻiá. ʻI he Sāpate hono hokó, naʻe maʻulotu ʻa Mōnika.
Naʻe hoko ʻa Mōnika ko ha fefine longomoʻui mo fiefia, pea naʻe hoko atu ʻema ngāue fakaetauhi kiate iá ʻaki e ʻofa mo e tokanga. ʻOkú ne kei maʻu pē ʻa e ngaahi faingataʻa tatau, ka kuó ne lava ʻo fehangahangai mo ia ʻaki ʻa e tui mo e loto-toʻa lahi ange koeʻuhí ko ʻene mālohi ʻi he Siasí.
ʻOku ou houngaʻia moʻoni ʻi he tā sīpinga ʻa Kalasiá ʻi heʻema ngāue fakatahá. Ne ma lotua ha fakahinohino, pea naʻe tataki kimaua ʻe he ʻOtuá kia Mōnika.