Na Marama ni Veiyalayalati e Veitokani kei na Kalou
Nodra yaco me marama ni veiyalayalati veitokani vata kei na Kalou sai koya na ivakarau era veiqaravi kina na luvena yalewa cecere ka vinaka na Kalou, ena itavi vakatina, veiliutaki, kei na veiqaravi.
Au vakavinavinaka ena veivakalougatataki meu vosa vei kemuni, na luvena yalewa ni veiyalayalati na Kalou. Ena bogi nikua, na noqu inaki meu vakayaloqaqataki kemuni ena veiqaravi cecere ko ni kacivi kina. Io, na luvena yalewa vakayadua na Kalou era vakarogoca tiko mai na domoqu era sa ciqoma e dua na kaci mai vua na Turaga.
A tekivu na nomu veikacivi ena nomu biu mai ki na bula oqo, ena dua na vanua kei na gauna a digia vei iko e dua na Kalou e kilai iko vakavinaka ka lomani iko ni o Luvena. Ena vuravura ni yalo, e kilai iko ka vakavulici iko ka biuti iko ena vanua ena donui iko kina na madigi, dau vakavudua ena itukutuku ni vuravura, mo sureti ki na dua na tobu ni veipapitaisotaki. E kea, mo na rogoca kina na veimalanivosa oqo ni cavuta e dua na italai nei Jisu Karisito: “Sa lesi au ko Jisu Karisito, meu papitaisotaki ena yaca ni Tamada kei na Luvena kei na Yalo Tabu. Emeni.”1
Ni o lamata mai wai, o sa ciqoma e dua tale na kaci ni veiqaravi. Ni o dua na luvena ni veiyalayalati vou na Kalou, o sa yalayala ka ciqoma e dua na ilesilesi ena Lotu i Jisu Karisito ni Yalododonu Edaidai, ko a qai vakadeitaki mo dua na lewena. O sa yalataka vua na Kalou ni ko na taura na yaca i Jisu Karisito, mo muria na Nona ivakaro, ka qaravi Koya.
Na tamata e cakava na veiyalayalati oqo, na veiqaravi e kacivi koya kina na Turaga me cakava ena ganita vakavinaka na tamata oya. O ira na luvena yalewa kei na tagane na Kalou, era wasea vata e dua na veikacivi bibi ka rekitaki. Sai koya me ra qaravi na tani ena Vukuna.
Ni vosa vei ira na marama, a solia o Peresitedi Russell M. Nelson na ivakalekaleka uasivi ni kaci ni Turaga mo ni duavata kei Koya ena Nona cakacaka. E vakamacalataka vakaoqo na nomuni veikacivi o Peresitedi Nelson: “A kaya na Turaga, ‘Raica oqo na inaki kei na lagilagi ni noqu cakacaka [sa ikoya] me ra tucake tale mai na mate na tamata kecega, ka rawata na bula tawamudu.’ (Mosese 1:39.) Ia o ira na luvena yalewa-tisaipeli yalodina e rawa me ra kaya vakaidina, ‘Raica oqo na inaki kei na lagilagi ni noqu cakacaka sa ikoya meu vukei ira na noqu daulomani me ra yacova na inaki vakalomalagi o ya.’
“Me vukei e dua tale na tamata me yacova nona iilesilesi vakasilesitieli e dua na tiki ni itavi vakalou ni marama. Ni tina, qasenivuli, se dauveisusu yalododonu, e bulia o koya na tete bula ena ibulibuli e nuitaka. Ni rau veitokani kei na Kalou, na nona itavi vakalou me vukea na bula ni yalo ka laveta na yalo. Oqori na inaki ni nona veibuli. E vakamarama, veilaveti, ka veivakacerecerei.”2
Ena sega ni rawa ni o kila na gauna, se vakacava na kena balavu, na nomu itavi e vakanamata ga ki na veiqaravi vakatina, iliuliu, se marama dauveiqaravi. Na Turaga, ena nona loloma, e sega ni solia vei keda me da digitaka na kena gauna, na kena balavu, se na veitaravi ni ilesilesi. Ia o kila mai na ivolanikalou kei ira na parofita bula ni na yaco mai na ilesilesi kece oqo, ena bula oqo se ena kena e tarava, vei ira kece na luvena yalewa na Kalou. Ia era veivakarautaki ki na bula tawamudu ena veimatavuvale veilomani na veika kece oqo—“ka cecere duadua ena isolisoli kecega ni Kalou.”3
Ena vinaka kina mo ni solia na nomuni igu kece mo ni vakavakarau ena gauna oqo ni ko ni raica tiko yani na ivakataotioti. Sa vakarrawarawataki na cakacaka oqori baleta na ilesilesi kece oqori e viavia tautauvata ga na kena vakavakarau.
Me da tekivu mada ena ilesilesi vakamarama dauveiqaravi. Se nomu na ilesilesi vaka ni o goneyalewa yabaki 10 ena dua na matavuvale sa leqa na tamadratou, se peresitedi ni iSoqosoqo ni Veivukei se qai kama walega nomudou tauni, se ni o curu tu e valenibula ka se qai sele oti—e rawa ni o qarava na nomu veikacivi mai vua na Turaga mo Luvena yalewa dauveiqaravi.
E kena irairai ni ra ilesilesi ni veiqaravi duidui sara. Ia era gadreva kecega na vakavakarau ni dua na yalo qaqa, dauloloma, ka vakabauta deivaki ni sega ni dau solia na Turaga e dua na ivakaro ka sega ni vakarautaka na kena sala, kei na gagadre me da lako ka cakava ena Vukuna.4
Baleta ni sa vakarau tu, e mokoti tinana yada na goneyalewa yabaki 10 ka masuta me kila na sala me vukea kina nona matavuvale. Ka kitaka sara.
A sa vakarau tiko o peresitedi ni iSoqosoqo ni Veivukei me veiqaravi ni se bera na kama sega ni namaki ena nona yasayasa. Sa yaco me kilai ira ka lomani ira na tamata. Sa tubu na nona vakabauti Jisu Karisito ni toso na veiyabaki ena nona dau ciqoma na isau ni nona masu me vukei koya na Turaga ena nona veiqaravi lalai ena Vukuna. Ena vuku ni nona vakavakarau balavu, sa vakarau ka nanamaki tu me tuva nodra veiqaravi nona marama vei ira na tamata kei na veimatavuvale era vakaleqai.
E dua na marama se qai bula cake tiko mai valenibula e vakarautaki me veiqaravi vei ira era curu vata tu. Ena nona bula taucoko sa dau veiqaravi voli ena vukuna na Turaga vei ira kece ga na vulagi me vaka ga ni nodra itokani se wekadra. Ena gauna e vakila kina e yalona na kaci me veiqaravi e valenibula, a veiqaravi ena yaloqaqa kei na loloma, sa tekivu kina me ra diva na curu tu me kakua ni bula totolo.
Ena iwalewale vata o vakarau kina mo veiqaravi, sa rawa ka dodonu mo vakarautaka kina na nomu veikacivi mo dua na iliuliu e vukuna na Turaga ena gauna e yaco mai kina. Ena gadrevi kina na vakabauti Jisu Karisito, ka kena wakatu na nomu taleitaka vakatitobu na ivolanikalou mo liutaki ira na tamata ka vakavulica na Nona vosa ena yaloqaqa. O sa na vakarau kina me nomu itokani tudei na Yalo Tabu. O sa na vakarau tu kina mo kaya, “O au” ni tukuna mai na nomu daunivakasala ena mataveiliutaki ni Goneyalewa, ena domo kidroa, “E tauvimate nikua o Sister Alvarez. O cei me vakavulica nona kalasi?”
E taura talega na vakavakarau vata ga ki na siga vakasakiti oya ni sa na kacivi iko na Turaga ki na ilesilesi vakatina. Ia me na levu cake na yalo ni dauloloma mai na kena o a gadreva taumada. Me na uabaleta na veika kecega a bau tu e yalomu ena dua na gauna na vakabauti Jisu Karisito. Ka na taura e dua na kena iwase levu me masuti kina na veivakauqeti, veidusimaki, kei na vakacegu ni Yalo Tabu me uabaleta na kena ivakarau o a bau nanuma ni rawa ni yaco mai.
O na taroga beka se na rawa vakacava vua e dua na tagane ena itabayabaki cava ga me kila na nodra gagadre na tina. E taro donu. E sega ni rawa ni kila na ka kecega na tagane, ia e rawa ni da vulica eso na lesoni e vakatakila mai na Kalou. Ka rawa talega ni da vulica e levu na ka ena noda vakararai, ni da taura na madigi me da vaqara na Yalo me vukea noda kila na ka eda raica.
Au a vakaraici Kathleen Johnson Eyring toka ena 57 na yabaki ni neirau veiwatini voli. O koya na tinadratou e va na tagane kei na rua na yalewa. Me yacova mai nikua, sa ciqoma oti na kaci ni veiqaravi vakatina vei ira e sivia ni duanadrau na lewe ni neirau matavuvale ka sivia tale na drau o ira sa mai vakubeci ira ena yalona vakatina.
Mo ni nanuma na ivakamacala uasivi sara nei Peresitedi Nelson ena nona ilesilesi vakalou e dua na marama—okati kina nona ilesilesi vakatina: “Ni tina, qasenivuli, se dauveisusu yalododonu, e bulia na tete bula ki na ibulibuli e nuitaka. Ena veitokani vata kei na Kalou, na nona ilesilesi vakalou sa ikoya me vukea na bula ni yalo ka laveta na yalo. Sa ikoya oqo na ivakarau ni nona veibuli.”5
Ena kena voleka duadua au rawa ni raica, na watiqu, o Kathleen, sa dau muria na ivakaro oya, ka soli vei ira luvena yalewa na Tamada. E kena irairai vei au na ki sai koya na malanivosa “e bulia na tete bula ki na ibulibuli e nuitaka … ni rau veitokani kei na Kalou.” E sega ni vakasaurara. E bulia. Sa koto e dua na ituvatuva ni veika e nuitaka ka tovolea me buli ira kina o ira e dau lomana ka tinadra. Na nona ituvatuva na kosipeli i Jisu Karisito—me vaka au rawa ni raica ena noqu vakararai toka ena masumasu ena veiyabaki sa sivi.
Nodra yaco me marama ni veiyalayalati veitokani vata kei na Kalou sai koya na ivakarau era veiqaravi kina na luvena yalewa cecere ka vinaka na Kalou, ena itavi vakatina, veiliutaki, kei na veiqaravi ena sala kei na vanua cava ga e vakarautaka vei ira ko Koya. Au yalataka ni ko na kunea na marau ena nomu ilakolako ki na nomu itikotiko vakalomalagi ena nomu lesu yani Vua me vaka e dua na luvena yalewa dau dinata nona veiyalayalati na Kalou.
Au vakadinadinataka ni bula tiko ka lomani kemuni na Kalou na Tamada. Ena sauma mai o Koya na nomu masu. Na Luvena Daulomani e liutaka, ena veitikina matailalai kece sara, Na Lotu i Jisu Karisito ni Yalododonu Edaidai. Na Nona parofita bula o Peresitedi Russell M. Nelson. O Josefa Simici a raici rau ka veivosaki vata kei na Kalou na Tamada kei Jisu Karisito ena dua na veikau mai Palamaira e Niu Ioka. Au kila ni dina oya. Au vakadinadinataka ni o Jisu Karisito na iVakabula kei vuravura; e lomani iko o Koya. Ena Nona Veisorovaki, ena rawa ni ko savai ka laveti ki na veikacivi e vakacerecerei ka vakatabui ena lako yani vei iko. Au vakadinadinataka, ena yaca i Jisu Karisito, emeni.