Yalo Savasava kei na iTuvatuva ni Bula Marau
Na marau cecere e lako mai na noda bula savasava cecere.
Kemuni na taciqu kei na ganequ lomani, au sa masuta tiko na kaukauwa me vukea na nomuni dui vakasaqara na bula marau. Eso ko ni sa vakila tiko na bula marau, ia e sega ni dua e cata na isolisoli ni bula marau uasivi cake. Sa rawa vua e dua me guta me ciqoma na isolisoli vakadeitaki ni bula marau tawayalani.
Oqori na isolisoli nei Tamada Vakalomalagi; na Luvena Lomani, o Jisu Karisito; kei na Yalo Tabu ki na luvena vakayalo yadua nei Tamada Vakalomalagi e bula tiko nikua, ena mai bula, se a bau bula voli ena vuravura oqo. Na isolisoli oqo e vakatokai talega me ituvatuva ni bula marau. A vakatoka talega oqo na parofita o Alama ni a vakavulica tiko vei luvena tagane a bikai tu ena rarawa ni ivalavala ca. Sa kila tu o Alama ni ivalavala ca ena sega ni bula marau kina o luvena tagane—se dua ga na luvena na Tamada Vakalomalagi.1
A vakavulica vei luvena ni torocake ni yalo savasava sa salatu duadua ga ki na bula marau. A vakamatatataka sara ni yalo savasava cecere cake e rawa ga ena Veisorovaki i Jisu Karisito me vakasavasavataki ka vakauasivitaki keda.2 Na vakabauti Jisu Karisito ga, na veivutuni tiko, kei na maroroya na veiyalayalati eda rawa ni taura na bula marau tawayalani eda gadreva meda bulataka ka tudei kina.
Sa noqu masu nikua meu vukea mo ni kila vinaka na bula marau cecere sara e tadu mai na nomuni dui yalo savasava cake mo cakacaka kina ena vakabauta o ya. Au na qai wasea yani na ka au kila tu ena ka meda cakava meda rawata kina na isolisoli o ya meda yalo savasava cake tikoga.
Na ivolanikalou e vakavulici keda mai na veika tale eso, sa rawa meda vakacerecerei vakalou se meda yalo savasava cake ni da vakabauti Karisito,3 vakaraitaka noda talairawarawa,4 veivutuni,5 solibula Vua,6 ciqoma na cakacaka vakalotu tabu, ka maroroya noda veiyalayalati kei Koya.7 Na rawati ni isolisoli ni yalo savasava e gadrevi kina na yalomalua,8 yalomalumalumu,9 kei na vosota.10
A yaco vei au e dua na gagadre meu yalo savasava cake niu tiko ena Valetabu e Salt Lake. Au a curu ena valetabu ena imatai ni gauna ka tukuni vei au e vica wale na ka meu namaka. Au a raica na vosa e toka ena valelevu oqo: “Tabu me Nona na Turaga” kei “Na Vale ni Turaga.” Au a vakila na marau levu ni yaloqu. Ia au se lomatarotarotaka tikoga keu sa vakarau tu meu curu.
Rau a taubale sara e liu o tinaqu kei tamaqu ni keitou sa curu yani e valetabu. Keitou a kerei me keitou vakaraitaka na neitou ivolatara, me vakadeitaka neitou bula kilikili.
Rau a kila o noqu itubutubu na tagane ena desi ni ivolatara. Rau a tu vakawawa ka veivosaki sara vakalailai kei koya. Au sa qai gole duadua ga yani e loma ni vale levu e makualiliva vulavula na ka kecega e kea. Au a raica cake na dela ni vale cecere sa vaka tu na lomalagi e tadola tu. Ena gauna o ya, e matata sara vei au niu sa lako oti mai kea.
Au a rogoca e dua na domo malumu—sega ni domoqu. Na vosa malumu o ya a vakatoka oqo: “O se bera vakadua ni o a lako mai ke e liu. O a nanuma tikoga na gauna ni bera nomu a mai sucu. O a tiko ena dua na vanua tabu vakaoqo. O a vakila na iVakabula ni sa vakarau lako mai ki na vanua o tucake tu kina. Ko a qai vakila na marau baleta nomu sa maqusa tiko mo raici Koya.”
Na ka a sotavi oqo ena Valetabu e Salt Lake a taura ga e vica na gauna. Ia na kena vakanananu se kauta tikoga mai na vakacegu, reki, kei na marau vinaka.
Au vulica e levu na lesoni ena siga oya. Dua ni dau vosa ena domo lailai ka malua na Yalo Tabu. Au sa rawa ni rogoci Koya ni tu na vakacegu vakayalo e yaloqu. E kauta mai o Koya na yalo ni marau kei na ivakadei niu sa yalo savasava cake tiko. Ni o ya sa kauta tikoga mai na bula marau au a vakila ena imatai ni gauna ena valetabu ni Kalou.
O sa raica ena nomu bula kei na nodra bula na tamata na mana ni bula marau e tadu mai ena yalo savasava e torocake tiko. Vica na macawa sa oti, au a tiko e yasadra na tamata era sa na mate tiko e taucoko tu nodra vakabauta na iVakabula ka ra mata mamarau.
E dua na tagane sa tu wavoliti koya toka nona matavuvale. Rau a veivosaki tiko vakamalua vakaveiwatini ni keirau sa curu yani vakaveitamani. Au sa kilai rau tu mai ena vuqa na yabaki. Au sa raica na cakacaka ni Veisorovaki i Jisu Karisito ki na nodrau bula kei ira na lewe ni nodrau vuvale.
Rau sa digitaka vata me sa mudu na veisasaga vakavuniwai me vakabalavutaki kina na nona bula. A yaco na vakanomodi ni sa vosa mai vei keirau. A dredre mai ni tukuna nona vakavinavinaka baleta na kosipeli kei na kena mana savasava vei koya kei na vuvale e lomana. A tukuna na nona veiyabaki marau ni veiqaravi e valetabu. Ena nona kerekere, a lumuta o luvequ na uluna ena waiwai vakatabui. Au a qai vauca na veilumuti. Niu sa cakava, sa matata sara vei au ni sa vakarau laki raica na nona iVakabula, e matanavotu.
Au a yalataka vua ni na vakila na bula marau, loloma, kei na veivakadonui ni iVakabula. A matadredredre vinaka mai ni keirau sa gole. Na iotioti ni nona vosa vei au “Tukuna vei Kathy niu lomani koya.” Na watiqu, o Kathleen, e vuqa na yabaki a vakauqeti ira na itabatamata ni vuvale ni tagane oqo mera ciqoma na veisureti ni iVakabula mera lako mai Vua, cakava ka maroroya na veiyalayalati tabu, ka mera rawata na bula marau e tadu mai kina.
A qai mate ena vica na auwa e tarava. Ni oti e vica na siga ni nona mate, a kauta mai o watina e dua na iloloma vei keirau. A matadredredre ni keitou veivosaki tiko. A kaya ena loma vinaka, “Au a namaka meu yalo rarawa ka galili. Au sa marau sara ga. O nanuma beka ni sa donu o ya?”
Niu kila ni lomani watina vakalevu kei na nodrau sa kila, lomana, ka qarava na Turaga, au a kaya vua ni nona vakila na bula marau e isolisoli yalataki baleta ni ena nona veiqaravi yalodina, sa mai yalo savasava cake kina o koya. Na yalona savasava sa rawata kina na bula marau o ya.
Eso era vakarorogo tiko niku era taroga tiko beka: “Na cava na vuna au sega kina ni vakila na vakacegu kei na bula marau e yalataki tu vei ira sa yalodina tiko? Au sa yalodina tiko ena veigauna ca ni bula dredre, ia au sega ni bula marau.”
A sotava talega na dredre na Parofita o Josefa Simici. A masu me vakacegui ni sa tiko e vale ni veivesu mai Liberty, e Missouri. A yalodina tu o koya vua na Turaga. A torocake ena nona yalo savasava. Ia a vakila ni cakitaki vei koya na bula marau.
A vakavulica na Turaga vua na ivakavuvuli ni vosota eda gadreva kece ena so na gauna, ka rawa me balavu toka, ena noda bula vakatovolei oqo. Oqo na itukutuku ni Turaga kivei Nona parofita yalodina a rarawa voli:
“Ia, kevaka ko na biu ki na qara, se era tauri iko na daulaba, se tau vei iko na itotogi mate; kevaka ko sa biu ki na wasaliwa titobu; kevaka era sa nakita na biau lelevu mera bikai iko; kevaka sa yaco me kemu meca na cagi kaukauwa; kevaka sa kumukumuni vata na o loaloa ni lomalagi, ka ra cokovata na vei vu ni ka me latia na nomu sala, ka me kena ilutua, kevaka ena dalaga na gusui eli me tilomi iko, mo kila tiko na luvequ ni veika kece oqori ko na yalomatua kina, ka vinaka cake.
“Raica na Luve ni Tamata sa vosota rawa na veika e torosobu sara mai vei ira kecega. Ko sa vinaka cake li mai vua?
“O koya, mo tudei tikoga kina ena nomu sala, ka na tikoga kina kei iko na matabete; ni sa dei tu na kedra iyalayala, ka ra na sega ni ulabaleta. Sa kilai tu na nomu veisiga, ka na sega ni tini dole na nomu veiyabaki; o koya, mo kakua kina ni rerevaka na veika e rawa ni vakayacora na tamata, ni na tiko vata kei iko na Kalou me sega ni mudu ka sega ni mudu.”11
O ya na lesoni veivakavulici vata ga a solia na Turaga vei Jope, ni a sauma e dua na isau levu me yaco na Veisorovaki me yalo savasava cake kina. Eda kila ni o Jope a tamata yalo savasava, mai na kena itukutuku eda kila: “Sa dua na tamata mai na vanua ko Usi, na yacana ko Jope; ia na tamata ko ya sa yalododonu ka daucaka dodonu, a sa rerevaka tiko na Kalou, ka sega ni torova na ca.”12
Sa qai takali na nona iyau, nona vuvale, vakakina na nona bula vinaka. Mo nanuma kina ni sa lomatarotarotaka o Jope ni nona yalo savasava cecere, e rawati ena veika dredre lelevu, sa rawata kina me bula marau cecere. Sa nanuma kina o Jope ni yalo savasava sa kauta mai na rarawa.
Ia na Turaga a solia vei Jope na lesoni veivakavulici vata ga a solia vei Josefa Simici. A vakatara me raica o Jope na ituvaki ni yalovutugu ena matana vakayalo. A kaya o koya:
“Mo vauca mada vakatagane na tolomu; niu na vakataroga vei iko, ia mo vakatakila mai vei au.
“Ko a tiko mai vei ni kau a tauyavutaki vuravura? mo tukuna mai, kevaka ko sa kila.
“Ko cei ka lewa na kena ivakarau, kevaka ko sa kila? se ko cei ka dreta kina na dali i vakarau?
“Sa tauyavutaki e na dela ni cava? se ko cei ka tea na kena vatu i tutu;
“Ni ra a sere vata na kalokalo i volasiga, ka ra kaila e na reki ko ira kecega na luve ni Kalou?”13
Ni oti, nona veivutunitaka o Jope ni kaya ni sega ni dodonu na Kalou, a vakatarai vei Jope me raica nona vakatovolei ena sala e cecere ka savasava cake. A sa veivutuni o koya.
“Sa qai vosa vei Jiova ko Jope, ka kaya,
“Au sa kila ni kemuni sa rawata na ka kecega, a sa sega ni tarovi rawa e dua na ka ko ni sa nanuma.
“Ko cei oqo sa vakabutobutotaka na lewa ka yali na vuku? o koya kau a cavuta kina na ka kau a lecava; na ka e veivakurabuitaki vei au, kau a sega ni kila.
“Mo ni rogoci au mada, niu sa vosa: kau na tarogi kemuni, ia mo ni vakatakila mai vei au.
“Kau a rogoci kemuni e na daligaqu walega: ia sa qai raici kemuni na mataqu.
“O koya oqo kau sa beci au sara kina, ka veivutuni, e na kuvu ni soso kei na dravusa.”14
Ni sa veivutuni o Jope ka sa yalo savasava sara, sa qai vakalougatataki koya na Turaga vakalevu cake mai na veika sa yali vua. Ia e rairai ni kalougata cecere nei Jope o ya na torocake ni yalo savasava mai na veika dredre kei na veivutuni. A rawata o koya me bula marau cecere cake ena nona veisiga ni bula sa vo.
Na yalo savasava cecere ena sega ni tadu mai ni kerei tu ga yani. Ena tadu mai ni caka na veika e gadrevi vua na Kalou me veisautaki keda kina.
Sa solia o Peresitedi Russell M. Nelson na ivakasala au nanuma e vinaka duadua meda lako voli rawa ena salatu ni veiyalayalati meda yalo savasava cecere. A dusia na sala ni a vosa:
“O na sotava na kaukauwa qaqaco ni veivutuni e veisiga—ni ko cakava ka vinaka cake vakalailai e veisiga.
“Ni da sa digitaka meda veivutuni, eda sa digitaka meda veisau! Eda sa vakatara na iVakabula me vakavoutaki keda ki na keda ituvaki vinaka duadua. Eda sa digitaka meda tubu vakayalo ka ciqoma na reki—na reki ni noda vueti Vua. Ni da sa digitaka meda veivutuni, eda sa digitaka meda vakataki Jisu Karisito cake!”
A tomana tale o Peresitedi Nelson ena nona vakauqeti keda meda saga meda yalo savasava cake: “Na Turaga e sega ni namaka meda uasivi sara ena gauna oqo. … Ia sa namaka vei keda meda na savasava cake tikoga. Na veivutuni e veisiga sa salatu ki na bula savasava.”15
Na vosa nei Peresitedi Dallin H. Oaks, ena koniferedi taumada, a vukea meu raica matata kina na sala meda yalo savasava kina kei na noda kila rawa ni da sa lako tiko kina. A kaya: “Eda na rawata vakacava na bula vakayalo? Eda na taura vakacava na itagede o ya ni yalo savasava me itokani tudei kina vei keda na Yalo Tabu? Eda na raica rawa vakacava ka veidutaitaka na veika ni vuravura oqo ena vakanananu ki na veigauna tawamudu?”16
Na isau mai vei Peresitedi Oaks e tekivu ena cecere ni vakabauti o Jisu Karisito ni sa noda iVakabula dauloloma. O ya ena muataki keda meda vakasaqara meda vosoti e veisiga ka nanumi Koya ni da maroroya Nona ivakaro. Na cecere ni vakabauti Jisu Karisito o ya e tadu mai ni da kana magiti e veisiga ena Nona vosa.
Na serenilotu “Meu Savasava Tu” e vakatura na sala meda masu meda vukei meda yalo savasava cake. E vakatura o koya a vola ni yalo savasava eda vakasaqara sa isolisoli mai vua na Kalou dauloloma, soli ena kena gauna, ni oti na ka eda cakava rawa. O nanuma tiko na iotioti ni qaqana:
Meu galala tiko,
Meu rawa na ca,
Meu kua ni duka,
Ka vakarau tu.
Meu yaga vei Koya,
Na matanitu,
Me sa kalougata—
Ucui Jisu.17
Se cava sara na keda ituvaki yadua, se vanua cava eda tu kina ena sala ni veiyalayalati ki vale, me sa qai saumi mai noda masu meda yalo savasava cake. Au kila ni gauna sa vakadonui kina noda kerekere, eda na bula marau cake. Ena rairai yaco malua mai, ia ena yaco mai. Sa vakadeitaka vei au na Tamada Vakalomalagi dauloloma kei na Luvena Lomani, o Jisu Karisito.
Au vakadinadinataka ni o Josefa Simici a parofita ni Kalou, ni o Peresitedi Russell M. Nelson sa noda parofita bula nikua. E bula tiko na Kalou na Tamada ka sa lomani keda. Sa vinakata meda lesu i vale Vua vakamatavuvale. Na noda iVakabula dauloloma sa sureti keda meda muri Koya ni da lako e kea. Rau sa vakarautaka na sala. Ena yaca tabu o Jisu Karisito, emeni.