Kila, Dauloloma, ka Tubu
Meda sa qai kila vinaka kece na noda itavi ena cakacaka cecere oqo ni veiqaravi.
Ena 2016 era a gole na Matasere ni Tabernacle ena Rara ni Valetabu ki Netherlands kei Belgium. Me vaka niu a vakaitavi ena soqoni totoka o ya, au a marautaka kina na vakarua na nodratou lagasere.
Ni ratou sa lagasere tiko au a vakasamataka toka ni sa dua na cakacaka levu me ra veikauyaki tiko na matasere levu vakaoqo. E gole sara noqu vakasama ki na peleti levu, ka sa bau dredre ka rairai sau levu na kena vakauti yani ni vakatauvatani ki na vaiolini, biukila, se iyaya tale eso ka rawa ga mo kiruwana tu. Ia nida raica na itavi dina ni peleti levu oqo, e dau tuki vakavica walega, ia na vei iyaya lalai tale eso era vakayagataki tiko ena gauna taucoko ni lagasere. Au vakasamataka kina ke sega na rorogo ni peleti levu oqo ena sega ni taucoko sara na rorogo ni lagasere koya gona e sa na sasagataki kina me na kau yani na peleti levu oqo ena kena takosovi yani na wasawasa.
Ena so na gauna eda dau nanuma ni o keda, me vaka na peleti levu oqo, sa na rauti keda tu ga na itavi lalai ena soqo. Ia meu tukuna vei kemuni ni nomuni rorogo e sa yaco tiko kina na veisau.
Eda gadreva na vei iyaya kece. Eso vei keda e totolo noda vuli ka rawa-ka sara e koronivuli, ka so tale era vakataledi ena cakacaka maqosa. Eso era daudroini ka daubuli-ka se nasi, era veitaqomaki, se ra veivakavulici vei ira eso. Era sa gadrevi kece me rairai totoka ka vakaibalebale kina na vuravura oqo.
Kivei ira era nanuma tiko ni sega na ka e nodra mera cau kina se ra vakabauta ni sega na kedra yaga se ra sega ni gadrevi mai vua tale e dua, kivei ira era rairai nanuma tiko ni ra sa cecere sara, kei ira era toka e loma, au via vosa kina ena ulutaga oqo.
Na vanua cava ga o tiko kina ena salatu ni bula, eso vei kemuni ena lomaocaoca beka vakasivia ka sega ni via raici kemuni tiko ena salatu oqo. Au via sureti kemuni mo ni kalawa tani mai na butobuto ki na rarama. Na rarama ni kosipeli ena vakarautaka na vinaka kei na veivakabulai ka na vukei iko mo kila vinaka o cei o iko kei na kemu inaki ena bula oqo.
Eso vei keda eda sa veilakoyaki voli ena salatu cala, nira saga mera vakasaqara mai kea na marau.
Eda sa sureti mai vua na Tamada Vakalomalagi dauloloma meda lako ena salatu ni bula vakatisaipeli ka lesu tale yani ki Vua. E lomani iko ena loloma sa uasivi sara.1
Na cava beka na sala? Na sala sai koya meda veivukei meda kila vinaka kina se o cei o keda ena noda veiqaravi vakai keda.
Vei au, na veiqaravi ko ya na cakacakataki ni loloma vakalou.2 Ena sala oqo eda na bulia kina na veimaliwai vei koya e solia kei koya e ciqoma me rawa ni gadreva me veivutuni. Sa kena ibalebale, eda veisautaka noda ilakolako ka toro voleka yani meda vakataka cake noda iVakabula, o Jisu Karisito.
Me vakataka, ni sega ni gadrevi me tukuni wasoma vei watida se luveda na sala mera torocake kina; era sa kila oti tu. Na kena buli na veimaliwai ni loloma oqo era na vakaukauwataki kina mera cakava na veisau e gadrevi ki na nodra bula ka yaco mera tamata vinaka cake.
Ena sala oqo sa yaco na veivutuni me itovo ni veisiga ni veivakasavasavataki ka rawa ni oka kina na kere veivosoti ena vei itovo ca. Au nanuma rawa ni se yaco tikoga meu dau totolo sara ni vakalelewa ka berabera meu vakarorogo. Ia ni oti e dua na siga ena gauna ni noqu masu, au dau vakila na veivakasalataki loloma mai lomalagi meu veivutuni meu na vinaka cake. Na veimaliwai ni loloma ratou a tekivuna na noqu itubutubu, taciqu, kei na ganequ ka yaco vei watiqu, luvequ, vakakina na itokani sa vukei au meu tamata vinaka cake.
Eda kila kece na veivanua meda vakavinakataka cake. E sega ni gadrevi meda veivakananumi tikoga, ia ena gadrevi meda veilomani ka veiqaravi vakai keda, ni da cakava oqo, sa vakarautaka na yalo e gadreva na veisau.
Ena veimaliwai vata oqo eda sa vulica kina se o cei dina o keda kei na cava me noda ilesilesi ena iotioti ni wase oqo ni itukutuku kei vuravura ni bera na iKarua ni Lako Mai na iVakabula.
Ke o lomatarotarotaka tiko nomu itavi, au sureti iko mo raica na vanua mo tiko duadua kina ka kerea na Tamada Vakalomalagi me vakatakila vei iko na itavi cava mo cakava. Na kena isau ena rairai lako mai vakamalua ka na matata cake sara ni da sa tudei ena salatu ni veiyalayalati kei na veiqaravi.
Eda sa sotava tiko eso na veika dredre vata ga a sotava o Josefa Simici ena gauna a oka tu kina ena veisavosa kei na veisaqasaqa ni vakanananu. Me vaka eda wilika ena nona itukutuku, ni tukuna vakavica e lomana: “Na cava me caka? Na matalotu cava vei ira kece oqo e dina; se, era cala taucoko li? Kevaka e dua vei ira e dina, ia ko cei, kau na kila beka vakacava?”3
Ena kilaka a kunea ena iVola i Jemesa, ni tukuna tiko “ia kevaka sa lailai na vuku vua e dua vei kemudou, me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini; ka na soli ga vua,”4 Sa yaco na gauna vei Josefa me guta me “kerea vua na Kalou.’”5
Eda wilka tale “ni oya na imatai ni gauna ena [nona] bula me qai tovolea kina vakaoqo o [koya], ni ena gauna kece ni [nona] lomatarotaro e se sega mada ni bau tovolea vakadua me masu votu.”6
Ia oqo sa rawa vei keda me imatai ni gauna meda vosa vua noda Dauveibuli ena sala eda se bera vakadua ni cakava.
Ena vuku ni sasaga nei Josefa, erau a rairai kina vei koya na Tamada Vakalomalagi kei na Luvena, o Jisu Karisito, ka kacivi koya ena yacana, sa yaco kina meda kila vakamatata cake o cei oi keda ka da rui bibi sara.
Eda wilika talega ena nona gauna ni itabagone ni a sotava o Josefa “na veivakacacani mai vei ira a dodonu mera nona itokani ka dodonu mera dau caka vinaka vua.”7 O koya gona eda namaka tiko kina eso na veisaqasaqa ni da bula voli vakatisaipeli.
Kevaka o nanuma tiko ni sega ni rawa mo tiki ni mataivakatagi ka sa dredre vei iko na salatu ni veivutuni, yalovinaka mo kila ni kevaka meda gu tikoga, ena taluva na icolacola mai tabada ka yaco tale mai na rarama. Na Tamada Vakalomalagi ena sega vakadua ni biuti keda ni da toro yani Vua. Eda rawa ni lutu ka tucake tale, ka na vukei keda o Koya meda taviraka na duka mai duruda.
Eso vei keda e mavoa tiko, ia na kato ni imatai ni veiqaravi ni Turaga e tu kina na vadreti lelevu e rauta me bonata taucoko na noda mavoa.
Io na loloma o ya, na loloma uasivi o ya eda vakatoka talega me loloma se “loloma taucoko i Karisito,”8 sa gadrevi sara ena noda itikotiko era veiqaravi kina na itubutubu vei luvedra kei ira na luvedra vei nodra itubutubu. Ena loloma oqo, ena veisau kina na yalo ka vakasucuma na gagadre me caka na Lomana.
Sai koya o ya na loloma sa gadrevi ena noda veimaliwai vakai keda vaka luvena na Tamada Vakalomalagi ni da lewe ni Nona Lotu ena rawa kina meda okata na iyaya kece ni ivakatagi ena noda mataivakatagi me lagilagi noda veiqaravi kei ira na matasere vakaagilosi ni lomalagi ni na lako tale mai na iVakabula.
O ya na loloma, na cina e gadrevi me rarama ka caudreva noda itikotiko ni da lako bula voli e veisiga. Era na raica na tamata na cina ka ra na uqeti kina. Oqo na mataqali cakacaka ni daukaulotu ena dreta ira mai na tani kina “lako mai raica, lako mai vukea, kei na lako mai mo mai tiko.”9 Yalovinaka, ni da sa ciqoma noda ivakadinadina baleta na cakacaka cecere oqo kei na noda itavi kina, meda sa qai reki vata kei na noda parofita lomani o Josefa Simici ni a kaya, “Niu a raica e dua na raivotu; au kila, kau kila ni kila na Kalou, kau sega ni rawa ni cakitaka.”10
Au vakadinadinataka vei kemuni niu kila o cei oi au kau kila o cei oi kemuni. Eda sa luvena kece na Tamada Vakalomalagi e lomani keda. A sega ni kauti keda mai eke meda mai druka ia meda lesu ena lagilagi ki Vua. Me rawa ni da kila vinaka kece noda itavi ena cakacaka cecere oqo ni veiqaravi me rawa ni da vakataki Koya vakalevu cake ni sa lesu mai ka sa noqu masu ena yaca i Jisu Karisito, emeni.