Veidraki Kece, Jisu Tu Vei Au

Mai vei Reyna I. Aburto

iKarua ni Daunivakasala ena Mataveiliutaki Raraba ni iSoqosoqo ni Veivukei

Au vakadinadinataka ni “veidraki kece” ena tiko kei keda na Turaga, ni noda “rarawa [e rawa] ni kau tani ena reki vei Karisito.”

Dua vei ira noda serenilotu talei e vakamacalataka na vakamamasu “Veidraki kece, Jisu, tu vei au!”¹ Dua na gauna au a vodo tiko ena waqavuqa ni sa toso tiko mai e dua na cava levu. Niu rai yani e katuba leka, au raica rawa na ikumuni vavaku ni o e rukui keimami. Na rarama ni matanisiga sa dromu tiko e taliva yani ena o ka yaco mera ramase sara kina vakalevu. Ia, ni oti ga vakalailai, sa mua sobu na waqavuka ena vavaku ni o, ka keimami sa ovici sara ena dua na butobuto levu ka matabokotaki keimami mai na rarama levu se qai keimami raica oti toka ga.²

Na veio loaloa e rawa ni komuni talega ena noda bula, ka rawa ni matabokotaki keda ki na rarama ni Kalou ka rawa nida taroga se tikoga na rarama oqo me noda. Eso na o oqo o ya na lomaocaoca, nuiqawaqawa, kei na ituvaki eso ni leqa ni vakasama kei na lomada. Era rawa ni vakatanitaka na salatu meda kilai keda, kei ira na tamata, vakakina na Kalou. Era vakacacani ira na marama kei na tagane ni yabaki ni bula kece ena yasai vuravura taucoko.

Na veivakacacani sa veio ni vakamoceri ni vakatulewa se lomatarotaro e rawa ni vakacacana eso era a sega mada ni sotava na ibolebole oqo. Me vaka na veitiki ni yago, na mona e rawa ni tauvimate, mavoa ka vakaleqai ena veituvaki cala. Ni rarawa tiko na noda vakasama, sa dodonu kina me kerei na veivuke ni Kalou, maivei ira era tiko voliti keda, kei na veiqaravi vakavuniwai cecere.

“Na tamata kece sara—na tagane kei na yalewa—era sa buli me ra ucuya na Kalou. Eda sa luvena tagane se yalewa lomani vakayalo na noda itubutubu vakalomalagi, ka … tu na keda dui ituvaki kei na icavacava vakalou.”³ Me vakataki rau noda iTubutubu Vakalomalagi kei na iVakabula, eda sa vakayago⁴ ka yavala na lomada.⁵

Kemuni na taciqu, sa itovo ni bula meda rarawa se lomaleqa ena so na gauna. Na rarawa kei na nuiqawaqawa era sa itovo tudei ni loma ni tamata.⁶ Ia, kevaka meda sa rarawa tu ga ka yaco noda mosi me tarova noda vakila na loloma nei Tamada Vakalomalagi kei na Luvena kei na veiuqeti ni Yalo Tabu, eda sa qai vakaleqai tiko ena nuiqawaqawa, lomaocaoca, se dua tale na leqa ni lomada.

O luvequ yalewa a vola vakaoqo: “Dua na gauna … [au a] rarawa bibi tu ga ena veigauna kece. Au dau nanuma ni rarawa e dua na ka me dau madualaki, ka sa ivakatakilakila ni malumalumu. Au sa qai maroroya toka ga na noqu rarawa vei au. … Au vakila niu sa tawayaga vakaidina.”⁷

E dua na itokani e tukuna kina vakaoqo: “Vakatekivu mai niu se gonelailai, sa vorati au tu na yalo ni vakanuinuikara, butobuto, galili, kei na rere kau nanuma kina niu sa lialia se tawayaga. Au a cakava na ka kecega meu vunia na noqu mosi kau meu kua ni vakatakila niu dua tale na ka ia niu sa gugumatua ka kaukauwa tiko.”⁸

Kemuni na itokani lomani, e rawa ni yaco vei keda yadua—vakabibi vei keda sa vakabauta tiko na ituvatuva ni bula marau, eda vakalomaocataki keda vakaveitalia ni da nanuma meda sa uasivi ga nikua. Na vakasama vakaoqo e rawa ni veiuabaleti. Na rawati meda uasivi e cakacakataki ena gauna taucoko ni noda bula eke ka lako yani—ena loloma soliwale duadua ga i Jisu Karisito.⁹

Vakadutaitaki, ni da tukuna na bolei ni lomada, ka da vakadinata ni da sa sega ni valavala dodonu, eda solia vei ira eso na madigi mera wasea nodra dredre. Eda sa kila vata kina ni tiko na inuinui ka sega ni dodonu meda rarawa duadua voli.¹⁰

Ni da sa tisaipeli i Jisu Karisito, eda sa cakava na veiyalayalati kei na Kalou ni da sa “lomasoli meda colata vata na noda icolacola” ka “rarawa vata kei ira sa rarawa.”¹¹ E rawa ni oka na kena tukuni mai na tauvimate ni yalo, na kunei ni ivurevure me wali na veidredre oqo, ka yaco sara meda kauti keda vata kei ira mai eso kivei Karisito, sai koya na iLiuliu Dauveivakabulai.¹² Ke da lecava mada ga na sala meda umani keda ena veika era sotava tiko eso, ni da vakadeitaka ni nodra mosi e ka dina sa rawa me ikalawa bibi ni kena kunei meda kila vinaka ka ia na veivakabulai.¹³

Eso na gauna, na vu ni nuiqawaqawa se lomaocaoca e rawa ni kilai, ka so na gauna e dau dredre me kilai rawa.¹⁴ Na noda mona e rawa ni vakaleqai baleta na lomaocaoca¹⁵ se oca bibi,¹⁶ ka so na gauna e rawa ni vakavinakataki ena veisautaki ni kana, moce, kei na vakaukauwa yago. Vakawasoma, na tuvai donu ni yago se soli ni wainimate mai vei ira na vuniwai kenadau sa gadrevi talega vakakina.

Ni sega ni qaravi na tauvimate ni vakasama se yalo e rawa ni mua ki na galili, veicalati ni kila, kavoro ni veimaliwai, vakamavoataki koya ga, kei na kukuna. Au sa sotava oti oqo, ni a vakamatei koya ga o tamaqu ena vuqa na yabaki sa oti. Na nona mate a veivakurabuitaki ka vakarise yalo vei keitou vakavuvale. A vica vata na yabaki na noqu a sasaga voli ena noqu rarawa, ka oti toka ga oqo au a vulica meu tukuna na kukuna ena sala dodonu eso ka a vukei au meu tarova ka sega ni vayaloqaqataka.¹⁷ Ia oqo au sa tukuna vakadodonu na mate nei tamaqu vei ira na luvequ kau raica na veivakabulai ni iVakabula e rawa ni solia ena yasa ruarua ni ilati.¹⁸

E ka ni rarawa, e vuqa era nuiqawaqawa tu vakalevu era vakayawaki ira maivei ira na wekadra Yalododonu baleta era nanuma ni ra sega ni tiki bibi raitayalotaki. Eda rawa ni vukei ira mera kila ka vakila ni ra sa wekada vakaidina. Sa ka bibi me kilai ni nuiqawaqawa e sega ni yaco ena vuku ni malumalumu, se sega ni vuku ni ivalavala ca.¹⁹ E “gugumatua ni vunitaki ia e malumalumu ena gauna ni lomavata.”²⁰ Sa rawa meda botea vata na veio ni bula duadua kei na druka me rawa ni kautani na icolacola ni madua ka yaco na cakamana ni veivakabulai.

Ena Nona cakacaka vakalotu eke, a vakabula o Jisu Karisito na tauvimate kei na rarawa, ia na tamata yadua me vakabauti Koya me ciqoma kina na Nona veivakabulai. Eso era a taubale vakabalavu, eso era a dodoliga yani mera tara na Nona isulu, ka so era a laveti yani Vua me rawa ni ra vakabulai.²¹ Ni yaco me caka na veivakabulai, eda sega beka ni gadrevi Koya sara ga? “Eda sa sega li ni daukerekere kecega?”²²

Meda sa muria na salatu ni iVakabula ka meda yalololoma cake, vakaotia noda dauvakalelewa, ka kakua ni vakadikeva tiko nodra bula vakayalo eso. Na vakarorogo ena loloma sa dua na isolisoli cecere eda rawa ni solia, ka rawa meda vukea me colati se laveti na veio bibi e curumi ira tu na noda daulomani kei na itokani²³me rawa kina ena noda loloma, mera vakila tale na Yalo Tabu ka ciqoma na rarama e cila mai vei Jisu Karisito.

Kevaka o sa voliti tu ga ena “kabu ni butobuto,”²⁴ gole vei Tamada Vakalomalagi. E sega na ka o sa sotava e rawa ni veisautaka na dina tawamudu ni ko sa luvena dina ka sa lomani iko o Koya.²⁵ Mo nanuma tiko ni o Karisito e nomu iVakabula ka Dauveivueti, ni Kalou na Tamamu. Erau kila vinaka. Raitayalotaka ni Rau volekati iko, ena vakarorogo kei na veitokoni.²⁶ “[Rau] na vakacegui kemuni ena nomuni rarawa.”²⁷ Cakava na nomu igu taucoko ka nuitaka na loloma veisorovaki ni Turaga.

Na nomu dredre ena sega ni kemu iyacoyaco, ia sa rawa me vakayacobula vei iko.²⁸ Ena vuku ni dua na “voto ni kau ena lewe,”²⁹ sa rawa beka kina mo yalololoma cake vei ira na tamata. Ena veidusimaki ni Yalo Tabu, wasea na kemu italanoa mo “vukei ira sa malumalumu, laveta cake na liga sa wadamele, ka vakaukauwataka na duru sa malumalumu.”³⁰

Kivei keda eda bula dredre tiko se tokona tiko e dua e bula dredre tiko, me sa lomada sara meda muria na ivakaro ni Kalou me tiko ga kei keda na Nona Yalotabu.³¹ Meda cakava na “veika lalai ka rawarawa”³² ena solia vei keda na qaqaco vakayalo. Me vaka e kaya o Peresitedi Russell M. Nelson: “E sega ni dua na ka e dolavi lomalagi me vaka na sema vata ni savasava e sinai, talairawarawa taucoko, vakasaqaqara e yaloqu, kana e veisiga mai na iVola i Momani, kei na soli gauna wasoma ki na cakacaka ni valetabu kei na tuva kawa.”³³

Meda nanuma kece tiko ni noda iVakabula, o Jisu Karisito, “[sa taura] ko koya na [noda] malumalumu, me vakasinaiti na lomana ena loloma cecere, me vaka na veika vakayago, me rawa kina ni vakila … na sala me vukei [keda] kina me vaka na [noda] malumalumu.”³⁴ Sa lako mai me “vakabulai ira sa ramusu na yalodra, … me vakacegui ira kecega era sa tagi; … me solia na isala vakaiukuuku mei sosomi ni dravusa, kei na waiwai ni reki mei sosomi ni tagi, na isulu ni vakavinavinaka mei sosomi ni lomabibi.”³⁵

Au vakadinadinataka vei kemuni ni “veidraki kece” na Turaga ena tu ga vei keda, ni noda “vakararawataki [e rawa] meda marau ga ena vukui Karisito,”³⁶ eda sa qai “vakabulai ena loloma soli wale, ni sa oti sara na veika kece eda rawa ni cakava.”³⁷ Au vakadinadinataka ni o Jisu Karisito ena lesu mai ki vuravura e “na veivakabulai ena kauta lako ena tabana.”³⁸ Sa yaco o Koya me “tavoya tani kecega na wai ni mata mai na [matada]; ena sega tale na … rarawa.”³⁹ Vei keda kece eda na “lako mai vei Karisito, ka mo dou vakataucokotaki vua,”⁴⁰ ena “sega ni dromu tale na matanisiga … ni na [noda] rarama ko Jiova ka sega ni mudu, ia ena oti ga na siga ni [noda] tagi.”⁴¹ Ena yacai Jisu Karisito, emeni.