Na Veisau Vakaisoqosoqo e Vakanamata ena Nodra Vaqaqacotaki na iTabagone

Me tiki ni sasaga me rawa talega kina vei ira na itabagone ena Lotu mera yacova na kedra ituvaki vakalou, na veisau ena Cauravou kei na Goneyalewa sa mai kacivaki ena koniferedi raraba ni Okotova 2019 mai vei Peresitedi Russell M. Nelson (raica na tabana e 38) ka a vakamacalataka o Elder Quentin L. Cook ena Kuoramu ni iApositolo Le Tinikarua (raica na tabana e 40) kei Sisita Bonnie H. Cordon, na Peresitedi Raraba ni Goneyalewa (raica na tabana e 67).

Na veisau oqo era vakadreti tiko kina na bisopi ni “imatai ka itavi levu oya mera vukei ira na cauravou kei na goneyalewa ni nona tabanalevu,” a kaya o Peresitedi Nelson. E oka kina na veisau ni kena sa mai bokoci na mataveiliutaki ni Cauravou ena tabanalevu. Na matabisopi, me vaka ni ratou sa mataveiliutaki ni Matabete i Eroni, e ratou na dauvukei mai vei iratou na daunivakasala ni kuoramu kei ira na kenadau ena so na gauna. Na Peresitedi ni goneyalewa ena tabanalevu na ripote vakadodonu sara ga vua na bisopi.

E ratou na raicamatua na mataveiliutaki ni kuoramu kei na kalasi na cakacaka ni veivakabulai, oka kina na cakacaka vakadaukaulotu ni lewenilotu, nodra maroroi na curuvou, veivakabulabulataki, cakacaka ni valetabu kei na tuva kawa, kei na vakavulici ni kosipeli. E ratou na tuvanaka ka liutaka na peresitedi ni kuoramu kei na kalasi ni itabagone na nodra soqoni ena Sigatabu, qaravi ni veivakatorocaketaki, kei na itaviqaravi tale eso.

Na nodra itaviqaravi na itabagone sa sega tale ni vakatokai me “Muavata” (Mutual) ia sa na vakatokai me “iTaviqaravi ni Goneyalewa,” “iTaviqaravi ni Kuoramu ni Matabete i Eroni,” se “itaviqaravi ni itabagone.” Na ilavo vakarautaki ni itaviqaravi ni itabagone e dodonu me wase vakatautauvata, ki na levu ni iwiliwili ni itabagone ena nodra isoqosoqo yadua.

Sa vakavoutaki na itoko ni Goneyalewa, kei na iwiliwili ni kalasi ni Goneyalewa e dodonu me ra tauyavutaki ki na levu ni iwiliwili kei na nodra gagadre na goneyalewa. Era na vakatokai na kalasi me “Goneyalewa,” ka tarava yani na veiyabaki ni bula ena kalasi, me vakataka na “Goneyalewa 12–14,” se me “Goneyalewa” kevaka era soqoni vata. Na yaca “Beehive,” (Maqusa) “Mia Maid,” (Leba) kei na “Laurel” (iSakisaki) sa na sega tale ni vakayagataki.

E dua na lewe ni matabose e cake ni iteki sa na veiqaravi me peresitedi ni Cauravou ena iteki, kei iratou na mataveiliutaki ni Cauravou ena iteki e ratou na veiqaravi ena komiti ni Matabete i Eroni– Goneyalewa ni iteki vata kei iratou na mataveiliutaki ni Goneyalewa ni iteki, o lewe ni matabose e cake sa lesi ki na Goneyalewa, kei koya na lewe ni matabose e cake sa lesi ki na Lalai.

Ena veisau tale eso, na iSoqosoqo ni Veivukei, Goneyalewa, Cauravou, Lalai, kei na Matawilivola ni Sigatabu era sa na vakatokai me “isoqosoqo” ka sega ni “mataisoqosoqo,” kei na iliuliu era sa na vakatokai mera “Vakailesilesi Raraba” ena veiqaravi ena Lotu raraba ka ra na vakatokai mera “vakailesilesi ni iteki” kei na “vakailesilesi ni tabanalevu” ena nodra dui vanua.