Kaukauwa me Vorata na Vu ni ca

Mai vei Elder Peter M. Johnson

Ena Vitusagavulu

Eda na kunea vakacava na vakacegu oqo, ka nanuma tiko se o cei oi keda, ka valuta na tolu na V ni meca?

Kemuni na taciqu kei na ganequ, vinaka vakalevu ena ka kece ni cakava mo ni yacova, ka vukei ira na tani mera yacova, me ra dauvakamumuri dina i Jisu Karisito ka marautaka na veivakalougatataki ni valetabu savasava. Vinaka vakalevu na nomuni vinaka. Ko ni kurabuitaki; ko ni totoka.

Sa noqu masu ni da na kidava na veivakadeitaki veivakauqeti ni Yalotabu ni sa mai taucoko noda kilamatata nida sa luve ni Kalou. “Na Matavuvale: Ai Vakaro ki Vuravura Raraba: e tukuni kina: “Na tamata kece sara—na tagane kei na yalewa—era sa buli me ra ucuya na Kalou. Oi keda yadudua eda sa luvena lomani vakayalo tagane se yalewa noda itubutubu vakalomalagi, ka tiko noda dui inaki vakalou kei na noda icavacava.”¹ Eda sa “tamata digitaki ka sa vakarautaki meda lako mai ena iotioti ni tabagauna, ka mai tura na yavu ni dua na cakacaka levu ka veivakurabuitaki.”² E tukuna ko Peresitedi Russel M Nelson: “O ni a vakavulici mai na vuravura ni yalo ena veisala bibi eso me vakarautaki kemuni ena cava ga kei na veika kecega o na mai sotava ena iwase e muri oqo ni veisiga e muri (raica na V&V 138:56). Na ivakavuvuli oqori e tudei vata kei iko!”³

Eda sa luvena digitaki tagane kei na yalewa na Kalou. E tiko vei iko na kaukauwa mo vorata na vu ni ca. Ia e kilai iko vakavinaka na vu ni ca. E kila o koya na ituvaki vakalou e tu vei iko ka saga me yalana na veika ko rawa ni na rawata e vuravura vakakina mai lomalagi ena nona taurivaka e tolu na V:

Veivakacalai
Veivakawelei
Veivakayalolailaitaki

Veivakacalai

E taurivaka na vu ni ca e vuqa na ivadi ni veivakacalai ena gauna nei Mosese. E tukuna vei Mosese na Turaga:

“Ia, raica, ko iko na luvequ. ...

“Au na solia vei iko e dua na cakacaka, … raica ko sa tautauvata kei koya na noqu Le Duabau ga;”⁴

Ni oti vakalailai na raivotu lagilagi oqo, a tovolea ko Setani me vakacalai Mosese. E vunimalele na vosa e cavuta: “I Mosese, na luve ni tamata, mo qaravi au.”⁵ Na veivakacalai e sega walega ni okati kina na veisureti me qaravi Setani, ia e yaco talega na veivakacalai ena nona tukuna vei Mosese me luve ni tamata. Nanuma tiko ni se qai tukuna oti ga vei Mosese na Turaga ni o koya e dua na luve ni Kalou; ka buli me tautauvata kei koya na nona Le Duabau ga.

E sasaga vakaukauwa na vu ni ca me vakacalai Mosese, ia a vorata rawa ko Mosese, ka vakaroti Setani ni kaya, “Mo lako tani vei au, Setani, ni sai koya ga na Kalou oqo au na qarava, ko koya na Kalou ni lagilagi.”⁶ E nanuma o Mosese o cei o koya—e dua na luve ni Kalou.

Na vosa ni Turaga vei Mosese e okati talega vei iko kei au. Edaru buli me ucuya sara ga na Kalou, ka sa tu na itavi vei Koya me daru cakava. E sasaga ni vu ni ca me veivakacalai e tovolea kina me daru guilecava se o cei dina o kedaru. Kevaka e sega ni daru kilamatata tu se ocei o kedaru, ena dredre me daru kila na ituvaki e rawa ni daru laki yacova.

Veivakawelei

E saga talega na vu ni ca me vakawelei keda tani mai vei Karisito kei na Nona sala ni veiyalayalati. E wasea oqo ko Elder Ronald A. Rasband, “Na inaki nei vu-ni-ca me vagolei keda vakatani mai na ivakadinadina vakayalo, ka sa gagadre ni Turaga meda vakararamataki ka vakaogai keda ena Nona cakacaka.”⁷

Ena gauna oqo sa vuqa sara na ka ni veivakawelei, okati kina na Twitter, ivolamata, Instagram, na vei qito vakalivaliva eso kei na vuqa tale. Era veivakurabuitaki na veika vovou vakalivaliva oqo, ia kevaka eda sega ni qaqarauni era rawa ni vakawelei keda meda sega kina ni rawata noda inaki vakalou. Ni taurivaki vakamatau ena rawa ni kauta mai na kaukauwa vakalomalagi me rawa nida vakadinadinataka na caka mana ena noda sasaga mera kumuni mai na Isireli ena yasa ruarua ni lati.

Meda qarauna vinaka ka kakua ni vakawalena tu ga noda taurivaka na veika vakalivaliva.⁸ Mo tomana tikoga nomu vakasaqara na veisala eso ena vukei iko kina na veika vakalivaliva mo toro voleka kina vua na iVakabula me vukea meda rawata Nona itavi nida vakavakarau tiko ki na Nona Lako Vakarua Mai.

Veivakayalolailaitaki

Kena iotioti, e saga vakaukauwa na vu ni ca meda yalolailai. Eda na yalolailai ena gauna eda vakatauvatani keda kina kei ira na tani se da vakila ni sega nida bulataka na veika e nanamaki, oka kina na noda.

Niu se qai tekivu vuli ena noqu koroi ni vuku, au vakila niu a yalolailai. E va walega na gonevuli a tauri ena yabaki ko ya, eratou sa bau vakasakiti dina na gonevuli eso oya. E tiko e cake nodratou maka ni veitarogi kei na niodratou kilaka vakacakacaka ena iveta e cake vaka manidia, ka ratou dei vinaka ena maqosa ni vakatulewa. Ni oti na imatai ni rua na macawa ni vuli, sa vaka e tarai au na yalolailai kei na veilecayaki, ka voleka sara ni rawati au.

Au qai lewa ni kevaka meu na vakacavara na va na yabaki ni vuli oqo, meu na vakacavara talega noqu wilika na iVola i Momani ena vei wasewase ni vuli yadua. Ena veisiga kece niu wilivola au vakila ni yalataka na iVakabula ni na vakavulici keda ena ka kecega na Yalo Tabu ka na vakalesuya na ka kecega ki na noda vakanananu.⁹ E vakadeitaki au tale niu luve ni Kalou, ka vakananumi au meu kakua ni vakatautauvatataki au kei iratou na kena vo, ka solia vei au na yalo dei meu na rawata noqu inaki vakalou.¹⁰

Kemuni noqu itokani, yalovinaka kakua ni laiva e dua me butakoca nomu marau. Kua ni vakatauvatani iko kei ira na tani.. Yalovinaka nanuma nona vosa ni loloma na iVakabula: “Au sa laiva vei kemudou na vakacegu, au sa solia vei kemudou na noqu vakacegu, au sa sega ni solia vei kemudou me vaka sa solia ko vuravura. Me kakua ni rarawa, na yalomudou se rere.”¹¹

Me da cakava li vakacava? Eda na kunea vakacava na vakacegu oqo, ka nanuma tiko se o cei o keda, ka valuta na tolu na V ni vu ni ca?

Kena imatai, mo nanuma na imatai ka ivunau levu duadua ko ya meda lomana na Kalou ena lomada taucoko, igu, vakasama, kei na kaukauwa.¹² Ia na ka kece eda cakava e dodonu me nakiti tiko mai na noda loloma vei Koya kei na Luvena. Nida toroya cake noda loloma vei Rau, ena torocake talega noda igu meda lomani keda kei ira na tani. Ena tekivu meda qarava na vuvale, itokani, kei na tuvoleka baleta ni da sa na raici ira me vaka e raici ira tiko na iVakabula—ni ra sa luvena tagane ka luvena yalewa na Kalou.¹³

Kena ikarua, mo masu vua na Tamada ena yaca i Jisu Karisito e veisiga, veisiga, veisiga.¹⁴ Ena vuku ni masu eda na vakila kina na loloma ni Kalou ka vakaraitaka noda lomani Koya. Ena vuku ni masu eda vakaraitaka na yalo vakavinavinaka ka kerea na kaukauwa kei na yaloqaqa meda soli keda vua na Kalou ka meda tuberi ka dusimaki ena ka kecega.

Au sa uqeta mo dou “masuta na Tamada ena yalomudou taucoko, … mo dou [luvena tagane ka luvena yalewa] na Kalou; ia ni sa rairai mai ko Koya eda na tautauvata kaya.”¹⁵

Kena ikatolu, wilika ka vulica na Vola i Momani e veisiga, veisiga, veisiga.¹⁶ E dau totoka sara noqu vulica na iVola iMomani niu dau wiliwili kau vakananuma tiko e dua na taro. Ni da wilivola ka tiko na taro, eda na rawa ni ciqoma na ivakatakila ka da na kidava ni a vosa dina na Parofita ko Josefa Simici ni a kaya, “Ni i Vola i Momani e dua na ivola dina mai na ivola kece ga e vuravura, … ka na voleka cake vua na Kalou e dua na tamata mai na nona muria na kena ivakaro, ni vakatauvatani ki na ivola tale eso.”¹⁷ Na iVola i Momani e volai kina na vosa nei Karisito ka na vukei keda meda kilai keda.

Kena iotioti, mo gumatua ena masu ka vakayagataka na sakaramede e veimacawa, veimacawa, veimacawa. Ena vuku ni vei cakacaka vakalotu ni matabete, okati kina na sakaramede, e sa vakatakilai kina na kaukauwa vakalou ena noda bula.¹⁸ A vakatavulica o Elder David A. Bednar: “Na cakacaka vakalotu ni sakaramede e dua na veisureti vakalou ka taleya meda veivutuni vakaidina ka vakavoui vakayalo. Na noda kania na sakaramede, vakai koya ga, e sega ni bokoca na ivalavala ca. Ia ni da vakavakarau vakayalo ka vakaitavi ena cakacaka tabu vakalotu oqo ena yalo raramusumusu kei na yalo lokumi, sa qai yaco na yalayala me tikoga kei keda na Yalo ni Turaga.”¹⁹

Nida taura na sakaramede ena yalo malumalumu, eda vakananuma kina na rarawa i Jisu ena were mai Kecisemani kei na Nona laki solibula ena kauveilatai. Eda vakaraitaka na yalo vakavinavinaka vua na Tamada me tala mai na Luvena e Duabau ga, o koya noda Dauveivueti, meda vakaraitaka noda yalorawarawa meda muria nona ivunau ka daunanumi Koya.²⁰ E tu na veivakararamataki vakayalo ka semati ena sakaramede—e ka vakayadudua, e kaukauwa, ka gadrevi dina sara.

Kemuni noqu itokani, au yalataka ni da na sasaga meda lomana na Kalou ena lomada taucoko, ka masu ena yacai Jisu Karisito, vulica na iVola i Momani, ka masu vagumatua mo vakayagataka na sakaramede, eda na rawata ena igu kei na kaukauwa ni Turaga, meda ulabaleta na ivalavala veivakacalai ni vu ni ca, ena vakalailaitaka na ivadi ni veivakawelei me mai yalana noda ituvaki vakalou, ka da na vorata na yalolailai ena via mai vakaqeyavutaka noda rawa ni vakila nona loloma na Tamada Vakalomalagi kei na Luvena. Eda na yaco meda kila vinaka sara se o cei o keda me vaka nida sa luvena tagane kei na yalewa na Kalou.

Kemuni na taciqu kei na ganequ, au wasea no qu loloma ka cavuta noqu ivakadinadina niu kila ni bula tiko na Tamada Vakalomalagi kei Jisu na Karisito. Au lomani Rau. Na Lotu i Jisu Karisito ni Yalododonu Edaidai e matanitu ni Kalou e vuravura. E tiko na ilesilesi vakalou ni noda talai mai vaka lewe ni Nona Lotu, meda mai vakarautaki vuravura ki na iKarua ni Nona Lako mai na Mesaia. Ena yacai Jisu Karisito, emeni.