Era Sa Vakatakilaitaka na iLiuliu na Sasaga Vou ni Gonelalai kei na iTabagone
Ena tekivutaki tiko na Gonelalai kei na iTabagone ena Janueri ni 2020 mera vukei ira na gone mera muria na iVakabula ena nodra tubu tiko vakayalo, veimaliwai, vakayago, kei na vakasama. Me baleta na vosa eso ena mekasini oqo e vakamacalataki ira tiko na Gonelalai kei na iTabagone, raica na tabana e 40 kei na 53.
“Sa yaco mai na gauna me baleta e dua na rai vou, ka nakiti me ra vukei na gonelalai kei na itabagone ena veiyasai vuravura nikua” a kaya o Peresitedi Russell M. Nelson ena dua na kakaburaki digitaki enai ka 29 ni Sepiteba, 2019.
“Ni sega ni gadrevi me soli vei kemuni e vuqa na ilesilesi vakarautaki,” e kaya o koya kivei ira na gonelalai kei na itabagone, “keimami sa sureti kemuni mo ni vakarogotaka vua na Turaga me baleta na sala e rawa mo ni tubu kina ena sala veiraurau. Ena veivakacegui ka veivakamarautaki, ia ena gadrevi talega kina na nomuni vakaitavi kina. Ena gadrevi mo vaqara na ivakatakila e nomu. Ena gadrevi mo digitaka vakataki iko na sala mo na cakacakataka kina. Ena so na gauna na Yalo ena rawa me uqeti iko mo cakava na veika e dredre. Au vakabauta ni ko sa rawata nai ibolebole oqo. Sa rawa mo cakava na veika dredre.”
E tukuna talega o Peresitedi Nelson ni sa tiko na nodra itavi bibi na itubutubu mera cakava. “Yalovinaka tara cake vakaukauwa na veiwekani vata kei ira na luvemuni kei ira na itabagone,” a kaya o koya. “E rawa mera veivuke kina na iliuliu ni Lotu, ia o ira oqo era luvemuni. E sega ni dua e rawa me veivakauqeti vakalevu cake mera rawa-ka me vakataki kemuni. Solia vei ira na loloma, na veivakayaloqaqataki, kei na ivakasala, ia mo kakua ni temaki mo vakatulewa ena vukudra. Era na cakava na nodra vinaka duadua ni ra cakava ena nodra dui galala ni digidigi.
“Na ivakasala oqo sa baleti ira talega na noda iliuliu totoka kei ira na qasenivuli ni gonelalai kei na itabagone,” a tomana o Peresitedi Nelson. “Eda gadreva mera veiliutaki na itabagone, vakabibi vei ira sa kacivi ka tabaki mera veiqaravi ena mataveiliutaki ni kalasi kei na kuoramu. Sa dodonu me sa lesi oti vei ira na lewa ni matabete. Era na vulica na sala mera ciqoma kina na veivakauqeti vakayalo ni ra veiliutaki ena nodra kalasi se kuoramu.”
Ena soli itukutuku vata ga, a vakaraitaka kina o Peresitedi M. Russell Ballard, na Peresitedi Vakatawa ni Kuoramu ni iApositolo Le Tinikarua, na raivotu baleti ira na Gonelalai kei na iTabagone: me “vaqaqacotaki nodra vakabauti Jisu Karisito na itabatamata e tarava, ka vukei na gonelalai, itabagone, kei na nodra vuvale mera toso ki liu ena salatu ni veiyalayalati ni ra sotava tiko na veibolebole ni bula.”1 A kaya ni “nodra vukei na gonelalai kei na itabagone me ra rawata e dua na ivakadinadina i Jisu Karisito ena vakalougatataki ira kei keda kece ena noda bula taucoko.”
Ni oti nodra duavata mai na itabagone era a tiko ena kakaburaki ki na dua na itaviqaravi mera vakaraitaka na kena vakayagataki na iDusidusi ni iVakamacala Baleti Ira na Gonelalai kei na iTabagone, a qai kaya o Peresitedi Ballard: “Oqo na itekivu walega. Nikua, eda sa tekivu kina ena itaviqaravi oqo. Oqo e dua na ka ena yaco ena nomuni matavuvale ni kemuni na cakacaka vata. Keitou sureti kemuni mo ni tomana tiko na itaviqaravi. … Kemuni na itubutubu, yalovinaka tomana tiko oqo e vale.” E vakabibitaka ni “sai koya oqo e dua na parokaramu e kena usutu na vuvale e tokoni mai na Lotu” kei “na matavuvale era sa vakaitavi vata ena parokaramu oqo. Oqori na veika ena vakavuna me vinaka sara.”
Ena vuqa na veiyasai vuravura, era sa ciqoma talega na itubutubu kei ira na iliuliu na nodra idusidusi ni ivakamacala taumada. Ena veivanua tale eso ena vakadewataki na Gonelalai kei na iTabagone ena nodra vosa ena mua ni 2020.
Na vulici ni kosipeli, veiqaravi kei na itaviqaravi, kei na torocake yadudua (oka kina na kena vakarautaki kei na rawati ni inaki) ena tiki bibi ni Gonelalai kei na iTabagone, kei na itabagone mera liutaka na kedra tuvai. Era na vaqara na gonelalai kei na itabagone na ivakatakila e nodra ni ra toso tiko ena salatu ni veiyalayalati, ena veitokoni ni vuvale, iliuliu, kei ira tale eso. A vakaraitaka o Peresitedi Ballard ni Gonelalai kei na iTabagone sa dua na sasaga e vuravura raraba ka rawa me taurivaki ena “vanua o vakaitikotiko kina kei na ituvaki ni nomu matavuvale.”
Na ikuri ni kena matailalai kei na ivurevure ena vakarautaki ena dua na kakaburaki ena Matana Votu baleti ira na gonelalai kei na itabagone enai ka 17 ni Noveba, 2019, ena vakaitavi tiko kina o Elder Gerrit W. Gong ena Kuoramu ni iApositolo Le Tinikarua. Era sa sureti tiko kina o ira na gonelalai kei na itabagone era na yabaki 8 ki na 18 ena 2020, nodra itubutubu, kei na iliuliu ni Goneyalewa, daunivakasala ni Matabete i Eroni, kei ira na iliuliu ni Lalai. Vakacuruma mai na nomuni taro baleta na parokaramu ni Gonelalai kei na iTabagone kivei Elder Gong ena facetoface.ChurchofJesusChrist.org. Ni oti na soqoni bula, ka na kaburaki tiko yani ena 18 na vosa, vidio ena maroroi me rawa kina ni na rawa me saravi se lavetaki mai ena dua ga na gauna.