Ennaan An Ritōl an Eria
Kalimjōk kōn Mej ko Rekāāl, Ron̄jake kōn Lo̧jiln̄i ko Rekāāl, Kōnono kōn Lo eo Ekāāl
Elder Marvin J. Ashton jān Doulul eo an Jon̄oulruo Rijilōk ro ekar ba, “Kein kam̧ool eo em̧m̧antata im ealikkar tata me ej kwaļo̧k ke jej eddōkļo̧k im itok n̄an Kraist ej wāween ad kōm̧m̧an n̄an ro jet.”1
N̄e jej bōk piktokin Kraist ilo paaktokid make im kalimjōk ro jet kōn mej ko mejān Kraist, enaaj ļapļo̧k maron̄ eo ad n̄an lo piktokin Kraist ilo paaktokin ro jet. Menin enaaj kōļapļo̧k ad ikdeleel n̄an kōm̧m̧an em̧m̧anļo̧k n̄an ro jet.
Jej aikuj mour eļapļo̧k jān ta eo jej loi—im mour eļapļo̧k jān en̄jake ko ad make im kōtmene ko bwe jān maron̄ kalimjōk ro jet ilo juon meram ekāāl.
Ilo ad kile im ļōmņak kōn juon wāween ekāāl ilo ad kōm̧m̧an n̄an ro jet, jemaron̄ aikuj kajjitōk ippād make: jej ke kalimjōk Golaiat āinwōt juon eo elukkuun kilep n̄an m̧ane ak anjo̧ jāne; ak jej ke kalimjōke āinwōt an David kalimjōke—kōn mej ko mejān Anij—ke Golaiat ekar lukkuun kilep n̄an jaweleel jāne?
Kōn kūr in n̄an ‘kanooj m̧ōņōņō in poub’ ilo ad kōkm̧anm̧anļo̧k wāween ad kōm̧m̧an n̄an ro jet ij kōjatdikdik jejjab lukkuun ikūmkūm kōn eddōkļo̧k ko me jej aikuj kōm̧m̧an ilo mour ko ad make. Jouj kemeemej, ļapļo̧kin ad eddōkļo̧k, ej ļapļo̧k in em̧m̧an ko me jenaaj maron̄ loi ilo ro jet.
1. Wāween ad kōnono im wāween ad kōm̧m̧an n̄an ro jet ejja wāween eo wōt jej kōnono im kōm̧m̧an n̄an Kraist. Ejjeļo̧k oktak.
Wāween ad aolep kōnono im kōm̧m̧an ko ad aolep roktak jān doon ak jen kappukot wāween ko jet roktak n̄an ‘kalimjōk’ ro jet im n̄an wāween ko rem̧m̧anļo̧k n̄an kōnono ippāer.
Kwon jab illu. Eļan̄n̄e jejim̧we, jejjab aikuj illu, im eļan̄n̄e jebōd, ejjeļo̧k ad maron̄.
Elder Lynn G. Robbins jān Jiljilimjuonn̄oul eo ekar ba, “Illu ej juon kālet. Ej kōn anemkwoj in kālet. Ejjeļo̧k oktak jān jabdewōt jokālet ko jej kōm̧m̧ani. Jej aikuj kejōkļo̧kjeņ kōn kilen kālet bwe jen jab illu. Brother jidikdik eo an illu ej dikāāļāļ, half-brother eo an illu ej inepata ak em̧m̧alkaro, im brother eo erūtto an illu ej kōm̧m̧an uwōjak.”2
Aaet, kōj aolep jej kōm̧m̧an bōd, ak ewi wāween ad kōm̧m̧an n̄an ro jet kōn bōd ko aer? Em̧m̧anļo̧k n̄e jej penej bōd ko an ro rūtūrūr kōn juon libobo in iakwe em̧ool, kōnke jenaaj bar aikuj juon jikin elibobo in iakwe n̄an penej bōd ko ad make.
Matu 25:40 ej kwaļo̧k: “Ilo am̧i kōm̧anm̧an jabdewōt n̄an juon iaan rein ro jatū ediktata, kom̧ ar kōm̧anm̧ane n̄an Eō.”
Kōn menin, eļan̄n̄e jej illu ak būro̧n̄ ak tōņ ko rejjab kam̧ōņōņō ilo ad kōnono, ak eļan̄n̄e jejjab jouj, jejjab kōm̧m̧ani wōt men kein n̄an ro jet, ak jej barāinwōt kōm̧m̧ani n̄an Irooj Jisōs Kraist. Jemaron̄ ba bwe ad iakwe n̄an Kraist ej jon̄an wōt juon n̄an iakwe eo ad n̄an armej eo me diktata ad iakwe e.
2. Ewi wāween an kar Saimōn, Riparisi eo, oktak an kōm̧m̧an n̄an Jisōs Kraist jān an kōm̧m̧an n̄an kōrā eo ilo būrabōļ eo me kar je ilo Luk jebta jiljilimjuon?
Elder James E. Talmage ekar katakin: “Ekar juon manit ilo tōre ko n̄an kōm̧m̧an karuwainene eoktak n̄an rumājet ro kōn juon kōl ejeņoļo̧k im eļap kalimjōke; n̄an wōnm̧aeiki kōn mejānma, n̄an leļo̧k dān im kwaļ būn̄al in neen, im oil n̄an kapit bōran im korāāk ko an.”3
Saimōn ekar juon Parisi; juon membōr in doulul in kabun̄ eo me eļap an pen kakien ko aer ilo aer ļoor kien ko an Moses. Rim̧uri eo ilo būrabōļ eo me ekar m̧uri 50 sillin̄ eo ekar Saimōn (Luk 7:41–47).
Saimōn ekar jab bōkļo̧k dān n̄an kwaļ neen Jisōs, ekar jab mejānmaiki, ekar jab kapit E kōn oil. Saimōn ekar jidik wōt an iakwe E. Ijoke, jen kemeemej bwe Saimōn ekar barāinwōt aikuj jeorļo̧k bōd, āinwōt adwōj bar kōm̧m̧ane.
Kōrā eo, eo me kar rijerawiwi, ekar m̧ūri 500 sillin̄ ilo būrabōļ in. Ekar kwaļ neen Rilo̧mo̧o̧r kōn dān in kōmjaļaaļ im iri kōn koļan bōran; ekar wōnm̧aanļo̧k wōt im mejānmaik Neen im ekar kapiti neen kōn oil. Ekar lukkuun iakwe E.
N̄e jej kwaļo̧k ad iakwe im wūjlepļo̧k n̄an Irooj Jisōs Kraist, jej en̄jake jeorļo̧k bōd in An. Āinwōt ad bōk jeorļo̧k bōd jān Irooj, jej obrak kōn ikdeleel n̄an iakwe im jerbal n̄an E eļapļo̧k. Kraist ekar lukkuun jeorļo̧k an kōrā eo bōd im E ekar bar iakwe ilo ejjeļo̧k kalijōkļo̧k. Jerawiwi ko an, me rekar lukkuun lōn̄, rekar jako (eoon 48).
Eļan̄n̄e kōj armej jidik wōt ad jeorļo̧k bōd, jidik wōt ad iakwe.
3. Eļan̄n̄e jejjab maron̄ ekkatak jeorļo̧k bōd an ro jet Anij ejjab maron̄ bar jeorļo̧k ad bōd (Mark 11:24–26).
Jeorļo̧k bōd epen, ekauwōtata im ekam̧ōņōņō.
-
Epen kōnke ej piktokid kōj armej,
-
Ekauwōtata kōnke ej iuun kōj n̄an bōk eddo n̄an eddōkļo̧k ilju im jekļaj, im
-
Ekam̧ōņōņō kōnke ej kanemkwoj kōj n̄an erom̧ juon armej em̧m̧an tata.
Em̧ōj kar ba: likjab ilo jeorļo̧k bōd ej āinwōt wāik kōj make kōn paijin im kōttar an armej eo juon mej.
Kōn menin—ewi wāween ad kōm̧m̧an n̄e juon armej ej kōm̧m̧an bōd?
Katak im Bujen Ko 121:43–44 ej kwaļo̧k bun̄tōn ko n̄an ļoori n̄e jej bōk eddoin jerawiwi an bar juon armej?
-
Kwaļo̧k ta bōd [jerawiwi] iien eo em̧ōkajtata im ealikkar. Eaorōk bwe jen dim im pen im jab kalijōkļo̧k.
-
Uwaak ilo am̧ kōjerbal kajoor eo an Jetōb Kwojarjar; ejjab ilo am̧ illu.
-
Kwaļo̧k iakwe eo eļap.
-
Kōttōbar eo ad ejjab n̄an kakkure ro jet, m̧an er ak kōmetak er. Ijjelo̧kin jej aikuj tiljek n̄an Anij; im ettā im kōjparok armej eo me ekar kōm̧m̧an bōd.
Jeorļo̧k bōd ejjab kōn wōt jeorļo̧k an bar juon armej bōd eo me ekar jerawiwi ak kōmetak kōj, ak ej barāniwōt jeorļo̧k an ro jet bōd ro me rejjan̄in kar kōm̧m̧ane ta eo jej en̄jake rej aikuj kōm̧m̧ane.
Armej, ro m̧ōttad im baam̧le eo ad renaaj kaenepataik kōj jān iien n̄an iien, ak wāween ad en̄jake kōn ro jet, im wāween ad kōm̧m̧an n̄an er, enaaj jon̄an wōt juon ilo ad en̄jake im kōm̧m̧an n̄an Jisōs Kraist. Enaaj barāinwōt erom̧ juon idajon̄jon̄ eļap kōn lukkuun wōn kōj.
Ro jeiū im jatū, jeļba im gold ejjeļo̧k aō ak ilo etan Jisōs Kraist ij kūr kom̧ aolep n̄an ļōn̄aj lōn̄ļo̧k im kalimjōk ajri ro nejin Anij kōn mej ko rekāāl . . . ron̄jake kōn lo̧jiln̄i ko rekāāl . . . im kōnono kōn lo eo ekāāl . . . bwe jen maron̄ kwaļo̧k jān wāween ad kōnono im kōm̧m̧an n̄an ro jet bwe jej lukkuun m̧ool in oktak tok n̄an Kraist.