Wiljea = Jeļā Lale E Make!

Jān Tessa Dewsbury

Aaet m̧okta jān an kar bōk juon wiiljea, Katrina ekar jab juon eo me ekkā an pād wōt ilo m̧weo . . .

Etetal kōn pein im bukien neen Katrina eo me 18 iiō rūttoon ekar bōk juon iien eo n̄an tōpar . . . aaet . . . aolep jikin! Im āinwōt am̧ maron̄ pijaikļo̧k, ekar juon kijejeto eo ekam̧ōkm̧ōk n̄an tōpar jikin n̄an jikin.

Ejjab āinwōt jet iaan āne ko me rem̧ōrā ilo Marshall Islands (29 oran aolepān āne jiddik ko), Majuro ekkā an ļap an wōt—jon̄an wōt 30–38 cm kajjojo allōn̄. Ej juon iaan āne ko me rej pād turōk im āne jidikdik in eoon āne wōt juon kōn pok in barijet aolep jikin, ej 3 mita jon̄an utiejen eo me eutiejtata jān lojet. Dān eban ‘diwōjļo̧k’, kōn menin petkat ko remaron̄ to aer pād inabōj in m̧ōko im opij in jerbal ko im emaron̄ bōk elōn̄ raan n̄an an jakoļo̧k. Armej in aelōn̄ kaņ ekkā aer en̄taan kōn an tutu im petkat.

Eiten aolep iien ejjan̄in m̧ōrā petkat ko m̧okta ak ebar wōt im kōļapļo̧k wōt an petkat.

Ak Anij ejeļā kōn aolep leddik ro an ilo bukwōn An, im E ejeļā kōn jiron̄ eo Nejin, Katrina Riklong. Katrina ekar ļotak kōn jet wutam̧e ko ilo ānbwinin; neen ekar lukkuun mej jon̄an ejjab en̄jake jān bukwien neen laļļo̧k.

Ilowaan iiō ko Katrina ekar aikuj mwijmwij n̄an jipan̄ ānbwinin bwe en em̧m̧anļo̧k an jerbal. Im—men̄e mour ekar pen n̄an jiron̄ in Marshall in kōn ettōn̄dikdik ko an raibojooj, ainikien emera im buruwōn ejouj, Katrina ekar kile bwe mour eo an ekar lukkuun jeraam̧m̧an kōn Kabun̄ eo an Jisōs Kraist im Armej ro Rekwojarjar ilo Raan Ko Āliktata.

Ilo O̧kwaj 1, 2019, Katrina ekar bōk juon wiiljea ekāāl jān humanitarian department eo an Kabun̄ in.

Bōk juon jea ej juon men eļap—armej ro rej kōļļaaki jea ko rej lukkuun lale bwe en jon̄an wōt armej eo me nej an wiiljea eo. N̄an waanjon̄ak, ejjeļo̧k bar kōta jon̄an en me jon̄an peid n̄e ej erļo̧k ej aikuj ilo jim̧or jait ko an wiiljea eo an armej eo—menin ej n̄an bōbrae ānbwin jān an kinejnej; im utiejen jea eo ej aikuj jim̧we, im ko jet.

Aaet m̧okta jān an kar bōk wiiljea eo an, Katrina ekar jab juon eo me ekkein pād wōt ilowaan m̧weo m̧ōn ippān aunty eo an, eo me ej jokwe ippān. Ijoke, Katrina ekar ba elukkuun kam̧m̧oolol kōn an kiiō make lale e kōn jipan̄ in an wiiljea in an, im ej juon iaan kōjeraam̧m̧an ko reļļap ekar būki jān tōre eo ekar jino kobatok ilo Kabun̄ in ilo Juļae 2018. Jet iaan kōjeraam̧m̧an ko jet reļļap me ej kaorōki ekoba:

Jeļā bwe e ej jiron̄ eo nejin Anij
Jeļā bwe Jemedwōj Ilan̄ ej iakwe e ilo ejjeļo̧k kalijōkļo̧k
Rej ron̄jaki jar ko an im uwaaki, im
Elōn̄ļo̧k m̧ōttan kiiō—ro me rej etal ippān n̄an m̧weo im̧ōn im loļo̧k e.

Katrina ej juon bainier ilo baam̧le eo an; e wōt ilo baam̧le eo an ekar oktak tok n̄an Kabun̄ in . . . kiiō.

Iiō eo ļo̧k, juon wa kar kōjeņoļo̧ke n̄an ektake Katrina n̄an jikuuļ—em̧m̧an ippān ekkatak. Ekar barāinwōt wōr an iien n̄an pād ilo kūlaaj in jemenere ko.

Ke ikar kajjitōk ippān Katrina ta eo em̧m̧an ippān kōm̧m̧ane n̄e ekadiwōjļo̧k jān high school, ekar ba ekōņaan “erom̧ juon sister mijenede im kwaļo̧k gospel eo an Jisōs Kraist.”

Kōmeļeļe an pija eo: Anij ejeļā aolep leddik ro an ilo bukwōn eo An, im E ejeļā kōn jiron̄ eo Nejin, Katrina Rilong.