Bwebwenato ko an Ijo Jokwe ie
Anij ekar Ron̄ Jar Ko Aō ak . . . Ekar Ke Jab Meļeļe kōn Kōņaan eo Aō?
Kabun̄jar ilo kabun̄ eo an Catholic ilo Majuro, jikin kweilo̧k eo eļap an Marshall Islands, eo me rej kobain in aelōn̄ im āne jidikdik ko ilo ioļapān Pacific Ocean, Shana Edmond ej keememejļo̧k raan eo ke ekar jar kōn aolepān buruōn, “Jouj jipan̄ baam̧le eo aō bwe ren m̧ōņōņō, im kōm̧m̧an bwe Jema en itok n̄an m̧ōn jar”.
Juon rikūrijin jiron̄ in eo ej wūjlepļo̧k an im ej mour kōn jetōb, Shana ekar kile inepata eo me ejelet baam̧le eo an kōn an jemān kajoor kadōk. Ej kein karuo rūtto tata ilubwiljin 11 ajri ro jein im jatin.
Ta eo Shana ekar jab kōtmene ilo uwaak in jar eo an ej kōn an kar jemān bōk juon kūr jān mijenede ro an Kabun̄ eo an Jisōs Kraist im Armej ro Rekwojarjar ilo Raan Ko Āliktata n̄an peptaij tok n̄an Kabun̄ in! Ilo m̧ool, Shana ekar jab jeļā bwe ro jinen im jemān rekar ekkatak ippān mijenede ro.
Anij ekar ke jab meļeļe kōn kajjitōk eo an?
Men̄e ekar jab ba ilo naan, ta eo Shana ekar ‘kōņaan’ ilo jar eo an em̧ool kōn inepata im iakwe eo an kōn baam̧le eo an raan eo, bwe jemān en kobatok ilo kabun̄ eo me ‘e’ ekar jar ie.
“Kobatok eo an jema n̄an Kabun̄ eo an Jisōs Kraist im Armej ro Rekwojarjar ilo Raan Ko Āliktata ekar ukot mour eo an—ekar lukkuun oktak” Shana ekar ba.
Jinen ekar peptaij ilo ejja raan eo wōt ippān jemān im ekar jab to Shana ekar bar oktak tok.
Ak oktak eo ekar jab meeoeo̧ ak pidodo. Jibun Shana jān nokon eo an jinen ekar lukkuun illu ippāer kōn aer kobatok ilo Kabun̄ im ekar to an jab bar kōnnaan ippāer.
Ium̧win iien ko, aolep ijjeļo̧kin wōt jilu iaan ajri ro jein im jatin Shana rekar oktak tok n̄an Kabun̄ in. Im—ke ej med būruwōn ro uwaan baam̧le eo, juon tōre in jab kōnnaan ippān doon ekar bar jino wāween kōnnaan ippān im ippān doon ilo m̧akūtkūt ko an baam̧le ilo m̧ōņōņō.
Shana ekar 19 an iiō ke kar kapene n̄an erom̧ juon membōr ilo Kabun̄ in. Ekar kattar juon iiō m̧okta bwe en maron̄ etal im kōm̧m̧ane mijen eo an ilo Temple Square ilo Salt Lake City, Utah. Ekar ba: “Kōm̧m̧an jerbal in mijenede ekar ukot mour eo an . . . ilo juon wāween eo ekar jab kōtmene.
Jemedwōj Ilan̄ ekar kōpooj eļapļo̧k kōjeraam̧m̧an ko an indeeo n̄an Shana im baam̧le eo an—E ilo lukkuun m̧ool ekar jab tarpok kōn jar eo aō!
Shana, juon eo ekajoor ej kwaļo̧k m̧ool im ‘eļap wōt an ļōmņak’ im ekar pād ilo juon mejatoto in inepata. Ak ilo an kar pād ilo mijen ekar ekkatak wāween n̄an pukot mejļan idajon̄jon̄ ko an mour in. Wāween in ekāāl me ekar ejaake n̄an ukot e jān wāween an mije wōt būrabļōm ko an, n̄an kappukot aenōm̧m̧an eo ejjeļo̧k jem̧ļo̧kin n̄an tōpar wāween ko rem̧m̧an im emaron̄ tōpari.
Ikar lukkuun em̧m̧akūt kōn m̧wūlaļ in jetōb eo ippān jiron̄ in 29 an iiō me ekar oktak tok n̄an Kabun̄ in eo im iaar ioone im bwebwenato ippān ilo Majuro. Ikar lo bwe Shana ej make ilo an jar ilo buruwōn kajjojo raan ilo an mije wōt karōk eo ekam̧ōņōņō an Jemedwōj Ilan̄.
Ālkin an kar Shana mijen ekar en̄jake ke ekōņaan em̧m̧akūt im jokwe ilo USA kōnke mour ijeņ em̧m̧an: āinwōt jikuuļ ko rem̧m̧an, elōn̄ jerbal ko reppeļļo̧k im jikin taktō rem̧m̧anļo̧k jān ko ilo Marshall Islands. Ak juon im̧we ejeņoļo̧k ekar itok ilo kōļmenļo̧kjeņ eo an: Jemedwōj Ilan̄ ekar kōņaan bwe en pād wōt ilo aelōn̄ eo an im n̄an kalōk aelōn̄ in kiin̄ eo An ilo aelōn̄ jidikdik in ilo laļ in.
Bar juon alen, Shana ekar en̄jake aeņōm̧m̧an im ekar kāālet n̄an wōnm̧aanļo̧k wōt im mour ilo Marshall Islands, im ekar jerbal n̄an Anij ijo me Anij ekar kōņaan bwe en pād ie.
M̧okta jān mijen eo an, Shana ekar kāālet bwe en em̧ōņōņō in mour ippān make āinwōt juon eo ejjeļo̧k pāleen . . . ilo an ejjeļo̧k an eddo kōn mour in pālele. Ekar jōke ilo ļōmņak eo an ke enaaj juon aunty eo em̧m̧an n̄an ajri ro nej nejin—enkar pojak ‘iien otemjej’ n̄an er n̄e rej aikuj jipan̄ kōn men ko an jetōb, aikuj ko ikkijeen jāān, ak jabdewōt aikuj ko.
Ak—m̧ōttan eddōkļo̧k eo an make ilo mour in jetōb ekar bōk revelesōn kōn aorōkin m̧are ilo M̧weo Im̧ōn Irooj. Kōn revelesōn eo, Shana ekar kōpooj e make n̄an m̧are, eo me ekar juon men em̧m̧an kōnke juon likao rūm̧m̧an ded ej kab rool tok jān mijen ilo aelōn̄ eo an ekar kōņaan e. Ekar ba ‘aeet’ n̄an kajjitōk eo an Johnny Latrik n̄an m̧areiki im kiiō epaake ruo de iiō jān iien eo erro kar m̧are.
Epen, ak ripālele rein rej tiljek ilo aerro kakkoņ bwe ren maron̄ keļo̧k n̄an USA, ijo me repād baam̧le ko aerro ie, n̄an liāp ilo mour in n̄an mour indeeo—emaron̄ ilo Seattle Washington Temple.
Ejjab menin wōt, ak Shana ejeraam̧m̧an kōn iien ko rem̧m̧an n̄an kōļapļo̧k jeļāļo̧kjeņ eo an ikkijeen jikuuļ. M̧okta, āinwōt juon rijikuul in College of the Marshall Islands ijo epaake an kadedeikļo̧k 2 iiō in ekkatak ikkijeen management, im kein karuo, āinwōt juon rijikuuļ ilo kūlaaj ko an BYU-Pathway Worldwide an Kabun̄ in, eo im ej kōppeļļo̧k 40 online certificate ko im degree ko n̄an rijikuuļ ro.
Ke ikar kajjitōk ippān Shana Edmond eo me 29 an iiō, “Ta eo me eitoklimoin tata kake me ekar kōm̧m̧ane ilo an jab āliklik in uwaak, “M̧are!”