Lan̄lōn̄ eo Em̧ool an Kōjeraam̧m̧an ko Jejjab Kōtmeni

Jān Tessa Dewsbury

“Ijjab maron̄ kantōrooļe en̄jake ko aō im aolep iien ij jan̄ eļan̄n̄e ij kajeon̄ kwaļo̧k ļōmņak ko aō ilo kūlaaj—kōn menin ikkein ikōn̄ wōt.”

Aaet, juon emaron̄ kōtmene n̄an bōk jeļāļo̧kjeņ im kapeel ikkijeen mour n̄e juon ej pād ilo kūlaaj ko an Pathway, ak Namiko Obeketang-Jibok ekar jab kōtmene lōke eo an n̄an kappukote!

Namiko ekar ejjeļo̧k an būrabōļōm n̄e ej itok n̄anje ļōmņak ko an, im ekar kōm̧m̧an aolep iien, ak n̄an kwaļo̧k ilo ainikien—eban!

Elōn̄ un ko me kajjojo armej rejjab maron̄ kōnono ilo juon kūlaaj:

mijak n̄e reba “ejeļā aolep men”
mijak in kwaļo̧k an jabwe jeļā ak jab meļeļe
mijak n̄e epok an meļeļe, im, n̄an ro jet, ej
mijak kōnke ban maron̄ dāpiji en̄jake ko. Āinwōt Namiko

Ilo Majuro, jikin kweilo̧k eo eļap an Marshall Islands, Elder im Sister Vila jān Philippines rej lale kūlaaj eo an Pathway im Namiko ej juon iaan rijikuul ro aer.

Ilo jab kōtmene Namiko ekar bōk juon kōjeraam̧m̧an ekabwūlōn̄lōn̄—kam̧m̧oolol eļap n̄an jouj im kapilōk ko an Elder Vila, eo ekar jipan̄ e n̄an meļeļe aorōkin kwaļo̧k ļōmņak ko an ilo ainikien bwe ro jet ilo kūlaaj eo ren bar jeraam̧m̧an jān jetōb eo an, jeļāļo̧kjeņ eo an, ļōmņak ko an, im men ko ej jelm̧aeiki me Anij ekar leļo̧k.

Ekar ba n̄an Namiko bwe eban jeļā n̄e juon men ej kwaļo̧k enaaj lukkuun juon jipan̄ ejjejet n̄an bar juon eo me ej aikuji. Namiko ekar kwaļo̧k buruōn ke ekar jab ļōmņake menin kōn aorōkin bōk koņaad ilo kūlaaj ilo wāween in ak ekar kile wōt bwe e eļap an ketak kōn ro m̧ōttan ilo kūlaaj eo an.

Raan eo ej itok ke ekar kāālet bwe en kajjieon̄ im kwaļo̧k an ļōmņak ilo an kōnono ilo kūlaaj. Tōprak eo ekar lukkuun kabwūlōn̄lōn̄—ejako an juon kōrā eo ejokook ilo jukjuk in pād eo im ilo Kabun̄ eo an, Namiko ekar lōke ilo an kwaļo̧k ļōmņak ko an n̄an ro jet—im, ta eo eļapļo̧k, ekar kōm̧m̧ane menin ilo an jab bar jan̄. Ejjeļo̧k bar jan̄ ilo lo̧bōļej!

Ejjab kōn an bōk wōt koņaan eļap ilo kūlaaj in Pathway ko an, ak kōn an kiiō peran ej jipan̄ e kōn katak ko an ilo College of Marshall Islands (CMI). Ekoba, ej kiiō maron̄ kōm̧m̧an juon eddo eļap kōn jerbal in tōl ilo kūr ko an ilo Kabun̄ in; ej jerbal āinwōt Stake Young Women Rijeje, Rikakpilōklōk eo Kein Karuo ilo Delap Ward ilo doulul eo an Jiron̄ ro, im āinwōt juon Rijipan̄ ilo kōm̧m̧an Menmenbwij an Baam̧le.

Kōn menin—n̄aat eo ewōr an Namiko iien n̄an ekkatak n̄an Pathway im CMI? Ilo bon̄ . . . eļaptata—ālkin an ļaddik eo nejin jilu an iiō eo me emourur, Omni, kiki.

Namiko ekar ļotak ilo Majuro im ijjeļo̧kin kar iien an kar loļo̧k USA ium̧win jejjo wōt allōn̄, ejjan̄in kar ekkāke n̄an bar jet jikin. Ekar iion ri iakwe eo an, Mackbin, ilo Eprōļ 2012, innem erro kar m̧are ilo 21 Māe 2016, ilo Majuro.

Mackbin ej itok jān juon iaan outer island ko ijo rej kajin wōt Majōl ie; ekar lukkuun jook n̄an bwebwnato ippān armej in Majuro jinoin an kar itaaktok. Ak an kobatok n̄an Kabun̄ eo an Jisōs Kraist im Armej ro Rekwojarjar ilo Raan Ko Āliktata ekar lukkuun ukot mour eo an. Namiko ej bwūlōn̄ kōn an Mackbin maron̄ jutak ilo lokatok eo ilo Jabōt im kwaļo̧k naan—ejjab ainikien wōt peran, ak an kalimjōk jarlepju im kōnono n̄an er!

Mackbin ekar lo an eddōkļo̧k ilo bun̄tōn ko an. Em̧m̧an ippān bwebwenato ippān ro m̧ōttan kōn gospel eo an Jisōs Kraist im ej peran ilo an karuwaineneik er n̄an ron̄jake katak ko jān mijinede ro. Im—ej iakwe kūr eo an āinwōt juon būreejtōn ilo doulul eo an Likao ro.

Erom̧ juon membōr ilo Kabun̄ in ej bōktok ippān tok eļap kōjeraam̧m̧an ko, im n̄e rej itok ilo wāween ko jab kōtmeni—aeet—ej lan̄lōn̄ eo em̧ool!