Naʻe ʻIkai Tuenoa ha Taha

Fai ʻe ʻEletā Gary B. Sabin

ʻO e Kau Fitungofulú

“Ke mou uouangataha pē, pea femanavaʻofaʻaki kiate kimoutolu” (1 Pita 3:8).

Naʻe tupu hake homa foha ko Susitení mo ha mahaki faingataʻa. Ko e taimi ʻe niʻihi naʻá ne matuʻaki vaivai ʻaupito. Naʻe ʻikai ke ne lava maʻu pē ʻo fakahoko e ngaahi meʻa hangē ko e niʻihi kehé, neongo naʻá ne feinga. Naʻá ne ʻilo lelei ʻa e ongo ko ia ʻokú ne kehé.

ʻI he ʻaho ʻe taha ne fakataha ai ʻa Susiteni mo hono ngaahi kaungāmeʻá ke vaʻinga. Naʻe pau ke nau tā ha foʻi pulu ʻaki honau nimá ke ʻoua naʻa tō ki lalo. Naʻe motu e nima ʻo e taha e tamaiki fefine ne omi ke vaʻingá.

Naʻe mei faingofua pē ke pehē, “Sai, te tau vaʻinga kotoa kitautolu, pea ʻe sio vaʻinga pē ia.”

Ka naʻe pehē ʻe Susiteni, “ʻOku ʻi ai haʻaku fakakaukau lelei moʻoni. Te tau vaʻinga nima taha kotoa.” Naʻe vaʻinga nima taha e tokotaha kotoa, kau ai e taʻahine naʻe simaʻi hono nimá. Naʻe ʻikai ke tuenoa ha taha.

Ko Susitení ko ha moʻungaʻi tangata ia kiate au. Naʻá ne sio maʻu pē ki he kakai kehé mo fakakaukau, ʻOku nau ongoʻi fēfē nai? Naʻe puke ʻa Susiteni he konga lahi ʻo ʻene moʻuí, ka naʻá ne fiefia he naʻá ne tokoniʻi e kakai kehé mo muimui kia Sīsū Kalaisi.

‘Oku tau fehangahangai kotoa mo ha ngaahi faingataʻa, ka ʻoku lahi fau e meʻa ke tau fiefia aí. Fai pē meʻa te ke lavá. Falala ki he ʻOtuá. ʻOku ʻikai maʻu e fiefia lahi tahá mei he tokanga taha kiate koé ka ʻi he tokanga taha ki he niʻihi kehé. ●

Tā fakatātaaʻi ʻe Barbara Bongini