Nima Fietokoni ʻo Heivení
Naʻe fakakaukau ʻa Heiveni, ko ha tokotaha taʻu 14 mei ʻIutā, USA, ke fakafiefiaʻi ʻene hoko ko ha finemui ʻi he Siasí ʻaki ʻene ngāue tokoni ki he niʻihi kehé.
‘Okú ne pehē, “Naʻe kamata ia ko ha kiʻi fakakaukau siʻisiʻi. “Naʻe ʻalu ʻeku faʻētangatá ki Pengilatesi ʻi ha ʻaʻahi tokoni ʻofa fakaetangata peá ne ʻilo ai ki he ngaahi meʻa faingataʻa ʻoku foua ʻe he kakai aí. Naʻá ku fie tokoniʻi kinautolu—ko ia naʻá ku sio ki he app JustServe pea maʻu ai e fakakaukau ke ngaohi ha fanga kiʻi kato tokoni maʻá e kau kumi hūfanga aí.”
Naʻe tānaki ʻe Heiveni ha tokoni ʻi hono ʻapiakó, faʻu ha peesi GoFundMe, pea aʻu ʻo ne toho e kapa veve ʻa e ngaahi kaungāʻapí ke maʻu ha paʻanga ke kumi ʻaki e fanga kiʻi kato tokoní. ‘Okú ne pehē, “ʻOku ou toho ha kapa veve ʻe 22 nai mo tānaki ke toe fakaʻaongaʻi ha faʻo ʻanga ngeʻesi kapa ʻe 11 ʻi he Mōnite mo e Tūsite kotoa.” “ʻOku ou angamaheni ʻaki ke fakaʻaongaʻi e paʻanga ʻoku ou maʻú ki heʻeku polokalama kuaeá pea fakahū ha paʻanga ki heʻeku ngāue fakafaifekaú, ka naʻá ku fili ke fakaʻaongaʻi ʻeku paʻanga he māhina ko iá ke tokoni ke fakatau mai ʻaki e naunaú.”
Naʻe ʻalu leva ʻa Heiveni ʻo fakatau mai e naunau kotoa naʻá ne fie maʻu ki he fanga kiʻi kato tokoní, kau ai e sitōkeni, kofu-nima, sikaafi, mo e tatā. Naʻá ne faʻo e kiʻi kato tokoni takitaha pea fetuʻutaki foki ki he talēkita ʻo e Lifting Hands International ke aleaʻi hono tufaki e fanga kiʻi kato tokoní ʻi Pengilatesí.
“Ne fakaʻaongaʻi lahi taha hoku taimi ki heʻeku ngāue ki hono faʻo fakataha e fanga kiʻi kato tokoní. Ka ko e taimi kotoa ʻoku ou faʻo ai ha meʻa ki he kiʻi kato tokoní, naʻá ku ʻilo ʻe ʻave ia ki ha taha ʻoku faingataʻaʻia pea te ne tāpuekina kinautolu ʻi ha taimi lōloa.”
‘I he fakaʻosinga ʻo ʻene ngāue tokoní, naʻe ongoʻi ʻe Heiveni e langaki ʻa ʻene loto-falala ki heʻene malava ʻo ngāue tokoní. “Naʻá ku ako heni ʻa e lahi ʻo e tokoni te u lava ʻo faí kapau te u feinga hoku lelei tahá. Naʻá ku ongoʻi manavaʻofa foki ki he kakai naʻá ku tokoniʻí, ʻa ia naʻe tokoni ia ke u ongoʻi ofi ange ki he Fakamoʻuí mo ongoʻi ha niʻihi ʻo e meʻa ʻokú Ne ongoʻi kiate kitautolú.”
‘I heʻetau fakamanatua e fokotuʻu ʻo e houalotu ʻa e Kau Finemuí, te tau taki taha lava ʻo manatuʻi ko e ngaahi sīpinga kitautolu ʻo Kalaisi. Te tau lava ʻo hangē ko Heivení ʻo hoko ko ha tokoni lahi ki he niʻihi kehé ʻi heʻetau feinga hotau lelei tahá ke ngāue tokoni ʻo hangē ko ia naʻá Ne mei fakahokó.