Mga Young Adult

Alam ng Tagapagligtas ang Sakit na Nararamdaman Mo

Larawang kuha ni Ashlee Larsen

Sa ating paglalakbay sa mundong ito, sa isang punto ay makararanas ang karamihan sa atin ng kapaguran mula sa stress, ligalig mula sa pagkabalisa, kadiliman dahil sa kalungkutan, o maging (tulad sa aking sitwasyon) pagkamanhid dahil sa depresyon. Nadarama ng karamihan sa atin ang mga ito sa landas tungo sa kaligayahan at kagalakan, at maaaring madali tayong makaramdam ng kawalang pag-asa dahil sa mga ito.

Ang mga problema sa kalusugang pangkaisipan ay maaaring dumating nang hindi mo inaasahan. Kapag ikaw ay nasa misyon at nakatuon nang labis sa ibang tao kaya nakakalimutan mo na ang iyong sarili. Kapag ikaw ay mayroong sanggol at nararamdaman mong dapat ikaw ang pinakamasayang tao sa buong mundo, ngunit sa totoo lamang ay hindi ka masaya. Kapag nawalan ka ng mahal sa buhay at parang hindi mo kayang mabuhay nang wala sila. O maging kapag tila maayos ang lahat, ngunit malakas ang pakiramdam mong mayroong mali sa iyo.

Ito ang mga sandali kung kailan kailangan nating punuin ang ating mga buhay ng kapayapaang hatid ng walang-katapusang pagmamahal ni Jesucristo. Ang ating Tagapagligtas ay palaging nariyan, maging kapag pakiramdam natin ay pinabayaan o nawawala tayo. Naramdaman na Niya ang sakit na nararamdaman mo at alam Niya kung paano tutulong.

Huwag matakot na humingi ng tulong. Bahagi ng plano ng Ama sa Langit ay mahalin at alagaan ang isa’t isa (tingnan sa Mosias 18:21). At iyon ang paksa ng bahaging ito ngayong buwan—pagdaig sa mga hamon sa kalusugang pangkaisipan sa pamamagitan ng paghingi ng tulong sa iba, lalo na sa Tagapagligtas.

Mayroong nagmamahal sa iyo.

Mula sa isang taong patuloy na nahihirapan ngunit hindi sumusuko,

Emilia Brändh

Mga kabatiran …

Mula sa mga young adult

tungkol sa pagtulong sa mga taong mayroong problema sa kalusugang pangkaisipan

“Basta makinig nang mabuti at hikayatin silang gawin ang anumang kailangan nilang gawin para sa kanilang kalusugan.”

—Janka Toronyi, Györ, Hungary

“Pakinggan sila, mahalin sila, at ipakita sa kanila na handa kang tulungan sila at nauunawaan mo sila sa pamamagitan ng pagbabahagi ng mga sarili mong karanasan.”

—Nadia Frenkel, Frankfurt, Germany

“Ipaalala sa kanila kung ano na ang nagawa nila at na kaya nilang harapin ang anumang darating sa susunod.”

—Andy Young, Texas, USA

Mula sa mga lider ng Simbahan

“Ang pakikinig nang may pagmamahal ay isa sa mga pinakadakilang kaloob na maibibigay natin, at makatutulong tayo na pasanin o pawiin ang mabibigat na ulap na nagpapahirap sa ating mga mahal sa buhay at mga kaibigan nang sa gayon, sa pamamagitan ng ating pagmamahal, muli nilang madama ang Espiritu Santo at ang liwanag na nagmumula kay Jesucristo.”

Sister Reyna I. Aburto, Pangalawang Tagapayo sa Relief Society General Presidency, “Sa Dilim at Liwanag, Aking Panginoon, Manatili!” Liahona, Nob. 2019, 58.

Paano mo pinanghahawakan ang pag-asa at pananampalataya kapag hindi sumasang-ayon ang iyong mga mahal sa buhay sa iyong mga paniniwala? Ipadala sa amin ang iyong sagot sa liahona.ChurchofJesusChrist.org bago sumapit ang Setyembre 30, 2020.

Ibahagi ang Iyong Kuwento

Mayroon ka bang karanasan na maibabahagi? O mayroon ka bang mga artikulo na nais makita tungkol sa mga partikular na paksa? Kung gayon, nais naming makarinig mula sa iyo! Maaari mong ipadala ang iyong mga artikulo o feedback sa liahona.ChurchofJesusChrist.org.

Hanapin ang mga artikulong ito at ang iba pa:

• Sa liahona.ChurchofJesusChrist.org

• Sa Lingguhang YA (sa ilalim ng bahaging Mga Young Adult sa Gospel Library)