Ana Iteraniba te Aono
Kakabwaia man te Onimaki ae Matoatoa
E aki maan imwiin raurena ae rangi ni kammaraki, Titita Fineone Fisi’ihoi Mork ao natina aika tebwitabun aia ririki a mwaing mai New Caledonia nako New Zealand, bwa a na waakina maiuia ae boou.
Babairean ana utu ngkai ai tii ngaia bon te kakaewenako ae boou iroun Titita Mork, ma e kakorakora ana onimaki iroun Tamara are I Karawa bwa e na buokia i nanon te tai ae kangaanga aei, ngkai e ataia bwa a na kakabwaiaaki ana utu ni kaeineti ma aia onimaki ao aia ongeaba.
Te uota are te karekemwane e bebete ngke ana karimoa te mwaane ae, Michael, e bane ana reirei ao e a waaki ni mwakuri. Michael e a tabe ibukin kakabwakaan boon te auti; aio e angan Titita Mork te kona n anga ae tamaroa riki nakoia natina. E moana naba ana karinimwane ibukin aia auti. N tokin te tai, ngaia ao natina a mwaing nakon oin mwengaia ae boou i Mangere East, South Auckland.
Tabeua te ririki imwiina, e a roro Michael nakon te mwakuri ni mitinare; e bon aki iangoa te mwananga ngkai e raraoma iroun tinana. E na kanga ni kakabwaka aia taarau ibukin aia auti are boou ngkai e uarereke boona? Bon ana tabeaianga naba Titita Mork, ma e ataia bwa e kakaawaki riki te ongeaba nakon nanon Tamara are i Karawa.
E taku nakon natina, “Ngkana ko a tauraoi n nako ni mitinare, ani mwananga. E na tararuaira te Uea.”
Uoua te namwakaina imwiina, e mwaneweaki te iango aei n te kakabwaia are e anga te Beretitenti n te Titeiki ae te Auckland New Zealand Papatoetoe are e katabua Michael nakon te nakoa ni mitinare n Ana Ekaretia Iesu Kristo ibukiia Aika Itiaki ni Boong aika Kaitira. E weteaki Michael bwa e na beku n te Cote d’Ivoire Abidjan Mition, Aberika Maeao.
“I bon uringnga raoi,” e taku Titita Mork, “Beretitenti Moroni Westerlund e kakabwaiaa natiu bwa e na kakaonimaki man botumwaaka, ao imwiina e tuangnga, ‘Tai raraoma iroun Tinam. Te Uea e na tararuaia ao n anganna bwaai ake e kainnanoi.’”
Taeka akanne e tiku iroun Titita Mork ao e anganna te kabebeteaki ngkai e raroa Michael. Bon tiaki te tai ae bebete. Bon iai uoman natina aika reirei ao e uarereke ana karekemwane ibukin aia kabanemwane n te wiiki, ma e teimatoa Titita Mork ni karinea ana beku ni mitinare natina man nanona ni kakaitau ao ni kakaonimaki. E kakaonimaki n nakoana n te Ekaretia, e beku n te tembora n aron are e kona ao e kakabwaka ana kabwianibwai ae bwanin.
‘E teimatoa n reke kainnanora n te wiki teuana ma teuana.” E noria naba bwa, e ngae ngke e uarereke aia karekemwane, ana utu ae uarereke e taraa n rangi ni kukurei.
Ngkanne n te namwakaina teuana, boon ana ran Titita Mork e kamiimi birirakena. E aki oota iai bwa e kanga n riki aei ma e anga ana kabanea ni kona ni kabwakaa boona. N te namwakaina are imwiina, e a raka riki boona. E teimatoa n rikirake boon aia ran ao n te tai ae tawe e aki kona ni kabwakai boon ana bwai ake tabeua ibukina bwa e a kataia ni kakabwaka boon te ran.
N te bong teuana are e teimatoa n ururingnga Titita Mork, e kaokoroa ana kabwianibwai ao e kabwakai bwakamwane n te wiiki aei. Imwiina e a noria bwa ana nikira ai tii $15. E rawawata nanona. E na kanga ni kamwarakeia ana utu n te namwakaina anne n tii $15?
E katea ana kaa i tinanikun te tabo ni mwaakete ao e tabeka ana tataro ni bubuti nakon Tamara are i Karawa imwaain ae e na rinnako. E kabooi tabeua uaanikai are a bon bwakaniboo. E a tiku $10 ibukin te tanna. E kakaei bwakaniboo ao e reke irouna uoua te bakete n tanna are kaka $5 booia. Ngke e tataninga ana tai ni kabooi ana bwai, e iangoi kuka ake a na bunnai iai amwarake aika uarereke aikai.
E anga te mwaiti te tia bobwai, ao e kauka ana bwautinimwane, e bon rangi ni miimi Titita Mork. I moan raoi ana $10 . . . bon te $20.
E bon rang mengo n te aro are e aki moa karaoa ana bobwai. E kabwarabure nakon te tia bobwai, ao e kitana te titooa ni kataia n iangoia bwa mai iaa te raka n $20 aei. E tuoi beban ana bowai n taraia raoi ngkana e a tia ni kabwakai bwakamwane ni kabane. E tuoia ngkana e bwanin ana kabwianibwai ao bon iai. E tuoia rimwi e bure ana nikira imwiin kabooan ana baanikai. Ngke e aikoa reke aron kabwarabwaraana irouna, ao e a tang Titita Mork. I nanona, e ataia bwa bon te kakai.
Ngke e roko ni mwengana, e karakina nakoia natina te bwai are riki. I nanon ana tai n rootaki n te tang, e kakoaua nakoia aron mwaakan te onimaki iroun te Atua, ao Ana tangira ibukira n tatabemaniira ao kakabwaia ake a roko man te ongeaba nakon Ana tua nako ao kawakinan ara berita ma Ngaia.
A katorobubua te utu aei ni karabwa Tamara are I karawa ibukin tararuakiia—n aron are e a tia ni berita aia beretitenti n te titeiki.
N te wiiki naba anne, temanna raoraoia man te Ekaretia e kunea bukin keeraken boon aia ran: bon te raran ni bwaibun aia ran n aia auti. Raoraoia aei– are bon iai ana bitineti ibukin karaoan taian uruaki ni bwain te auti—e bonota te raran, ao e aki tangira kabooan ana mwakuri.
E a manga okira aron boon aia ran, E a kona ni kabwakai ni kabane ana bwakamwane Titita Mork, ao namwakaina ake imwiina a nakoraoi ni karokoa are e a manga oki iai Michael man ana mition.