Sapos mi bin gat ol jalenj long saed blong helt blong tingting blong mi, ?bambae mi stil save go long wan misin?

Yes. Evriwan we i “wantem blong wok blong God, nao God i singaotem yufala long wok” (Doktrin mo Ol Kavenan 4:3). Ples we yumi givim seves long hem, i no impoten olsem wei we yumi givim seves. Mo eniwan we i stap tingting blong go givim seves long wan misin, bae oli lukluk long helt blong olgeta long saed blong tingting mo long saed blong bodi.

Sapos yu wantem givim seves long wan misin, toktok long bisop blong yu. Hem i save helpem yu blong stat blong aplae. Pat blong rod ia, bae i tekem ol visit long ol dokta mo ol nara profesonol pipol, mo tu, ol lida blong Jos mo papa mo mama. Ol visit ia, oli no blong skelem se yu yu “gud inaf” blong Lod, be blong help faenemaot ol bes ples blong yu givim seves long hem.

Wan singaot blong givim seves i save kam long eniwan we i gat hat mo tingting blong wantem givim seves. Asaenmen we yu kasem blong givim seves long wan ples, long wan spesel wei, i save dipen long plante defren samting. Ol pipol we oli gat ol helt jalenj (wetem jalenj blong helt blong tingting), samtaem, oli traem blong haedem infomesen ia long rod blong aplae, from oli tingting se hemia bae i helpem olgeta blong kasem asaenmen we oli wantem. Be sapos yu ones fulwan abaot histri blong yu long saed blong helt blong yu (wetem helt blong tingting tu), bae Lod i blesem yu. Hem i wantem yu blong mekem evri samting we yu save mekem blong mekem helt blong yu i kam antap. Mo plante long ol medikol sapot we yu kasem long hom oli save gohed long misin fil.