Jenaaj Mālejjon̄e Er Kake
Kiiō ej iien n̄an m̧aanjabpopo im Mālejjon̄ n̄an kōj make kōņaan eo im maron̄ eo n̄an kōm̧m̧ani aolep men ko jabdewōt Irooj ad Anij enaaj jiron̄ kōj.
Ij jar kōn jipan̄ eo an Jetōb Kwojarjar n̄an kōjwōj aolep ilo aō kwaļo̧k ļōmņak ko im en̄jake ko me rekar itok n̄an ļōmņak im būruwō ilo m̧aanjabpopo n̄an kweiļo̧k in eļap.
Aorōk eo an Teej ko
Elōn̄ļo̧k jān ron̄oul iiō ko m̧okta jān kūr eo aō n̄an joļo̧k aolep aō iien ilo jerbal ilo Kabun̄ in, ikar jerbal āinwōt juon rūkaki in university im administrator. Eddo eo aō eļap tata āinwōt juon rūkaki ekar n̄an jipan̄ rijikuuļ ro ekkatak ekōjkan ekkatak kōn er make. Im juon men ekanooj aorōk an jerbal eo aō ekar n̄an kōm̧m̧an, kakūret, im leļo̧k elmakot kōn jerbal eo an rijikuuļ eo ilo teej ko. Āinwōt ilo ami maron̄ jeļā kadede jān iminene eo ami make, teej ko ilo enan̄in aolep jekjek rejjab m̧ōttan ekkatak eo me rijikuuļ ro rej kōņaan eļap tata!
Bōtaab teej ko rej kōm̧man im bar kōm̧m̧an aaet rej lukkuun in aorōk n̄an ekkatak eo. Juon teej eo ewejepedik ejipan̄ kōj n̄an keidi ta eo jej aikuj jeļā ippān ta eo jejeļā kadede kōn juon menin katak ejenolo̧k; ej barāinwōt letok juon jon̄ak ņae ta eo jemaron̄ etale ekkatak eo ad im eddōkļo̧k.
Ejja āinwōt, teej ko ilo jikuuļ in mour wabanban in rej juon men elukkuun in aorōk an eddōkļo̧k eo ad indeeo. Ekaitoktok limo, ijo wōt ke, naan eo teej jekdo̧o̧n ta ejjab waļo̧k ilo naan in jeje ko rekwojarjar an bok in jeje ko rekwojarjar ilo English. Rather, words such as mālejjon̄e, etale, im kajjieon̄ ekōn kōjerbali n̄an kōmeļeļeik elōn̄ jon̄ak ko an kwaļo̧k ilo jetjet jeļā eo ad ilo jetōb kōn, meļeļe, im wujlepļo̧k n̄an karōk in m̧ōņōņ indeeo eo an Jemādwōj Ilan̄ im ekeke eo ad n̄an kappukōt kōjeraam̧m̧an ko an Pinmuur eo an Rilo̧mo̧o̧r eo.
E eo ekar kōmālim karōn in lo̧mo̧o̧r eo kar kōmeļeļeik lukkuun jibadbad eo an iien idajon̄jon̄ eo ad ilo mour in ilo kōjerbal naan ko mālejjon̄e, etale, imd kajjieon̄ ilo jeje ko rekwojarjar etto im raan kein. “Im jenaaj mālejjon̄e er kake, n̄an lale eļan̄n̄e renaaj kōm̧m̧ani aolep men ko jabdewōt Irooj aer Anij enaaj jiron̄ er.” 1
Ļōmņak kōn kajjitōk in jān Rijeje Sam eo Devid:
“Kwōn kallimjek eō, O Irooj, im lale eō; kwōn mālejjoñ ḷōmṇak ko aō im būruō.
“Bwe am̧ yokwe e tiljek ejim̧aan meja: im iar etal ilo m̧ool eo am̧.” 2
Im Irooj ekar kean̄ ilo 1833, “Kōn menin, jab mijak rikōjdat ro ami, bwe Iaar jeke ilo Buruō, Irooj ej ba, bwe Inaaj idajon̄jon̄e kom̧ ilo men otemjej, eļan̄n̄e kom̧ naaj pād wōt ilo bujen eo aō, em̧ool n̄an mej, bwe maron̄ lo kom̧ ritōllo̧ke.” 3
Mālejjon̄ im Kajjieon̄ ilo Raan-Kein
Iiō 2020 em̧ōj kakōļļeik, ilo jidik in, jān juon ajeded in nan̄inmej ipeļakin laļ in me kar Mālejjon̄, etale, im kar kajjieon̄e kōj ilo elōn̄ wāween ko. Ij jar bwe kōj āinwōt kajjojo armej im baam̧le ko rej ekkatak katak ko raorōk me en̄jake ko wōt reppen remaron̄ katak in kōj. Ij barāinwōt kōjatdikdik bwe aolepād wōj renaaj ļapļo̧k aer kile “ļap bōtata eo an Anij” im m̧ool eo bwe “enaaj ukōti en̄taan ko [ad] n̄an [ad] ļapļo̧k.” 4
Ruo pedped in katak ko raorōk remaron̄ tōl im kōkajoorļo̧k kōj ilo ad jelm̧a jekjek ko an Mālejjon̄ im kajjieon̄ ilo mour ko ad. jekdo̧o̧n ta eo remaron̄ in: (1) pedped in katak an m̧aanjabpopo, im (2) pedped in katak an bun̄ m̧aanļo̧k kōn dim ilo Kraist.
Mālejjon̄ im M̧aanjabpopo
Āinwōt ro rikaļoran Rilo̧mo̧o̧r eo, kar kakien kōj n̄an “kōpooj kajjojo mennin aikuj; im kajutak juon em̧, em̧ool juon im̧ōn jar, juon im̧ōn jitlo̧k, juon im̧ōn tōmak, juon im̧ōn ekkatak, juon im̧ōn aiboojoj, juon im̧ōn koņ, juon im̧ōn Anij.” 5
Kar bar āinwōt kallim̧uri kōj bwe, “eļan̄n̄e kom̧ij pojak kom̧ jamin mijak.
“Im bwe kom̧in maron̄ deor jān kajoor eo an rikōjdat eo, im kuktok n̄an Ippa juon armej eweeppān, ejjeļo̧k libbijinjin im ejjeļo̧k ruōn.” 6
Eoon kein rej letok juon m̧ōņakjen jerbal eweppān n̄an ejake im kōpooj mour ko ad im im̧ōko jim̧ro ilo kanniōk im jetōb. Kijejeto ko ad n̄an m̧aanjabpopo n̄an en̄jake ko an kwaļo̧k an mour wabanban rej aikuj anōk waanjon̄ak eo an Rilo̧mo̧o̧r eo eļapļo̧k an “ļapļo̧k ilo An mālōtlōt im rūtto, im ilo jouj ippān armej im Anij” 7 —juon jokkun wōt juon eo epād ie māletlet, kanniōk, jetōb, im ippān doon epojak.
Ilo juon ālkin raelep jejjo allōn̄ ko remootļo̧k, Susan im n̄a kar bwini mōn̄ā ko ilo joko eo am im men ko n̄an iien idin̄. Ilo iien eoo, COVID-19 ekar m̧ōkaj an ajeded, im juon kōro̧ro in m̧akutkūt laļ ko ekar kōm̧akūtkūt m̧weo imōm̧ ilo Utah. Kōm kar jerbal jān raan ko jinoin tata in m̧are eo am n̄an ļoor kapilōk in kanaan eo kōn m̧aanjabpopo n̄an apan̄ ko jab kōtmene kake, kōn menin “etale” jekjek in pojak eo am ilo ioļapļap in virus eo im m̧akūtkūt in laļ ko eaar āinwōt juon men eo em̧m̧an im ejetjet kitien. Kōm kar kōņaan jeļā kōn kūreet ko am ilo teej kein jab kōjeļļā kaki.
Kōm kar ekkatak juon men eo eļap. Ilo elōn̄ eria ko, jerbal in m̧aanjabpopo eo am ekar jetjet. Ilo jet eria ko, ijo wōt ke, kōkōm̧anm̧anļo̧k ekar menin aikuj kōnke kōm kar jab kile im kōnono kōn aikuj ko rejenolo̧k ilo wāween ko rejetjet.
Ekar barāinwōt ļap em ettōn̄. Kōm kar loe, n̄an waanjon̄ak, m̧weiuk ko ilo juon kūļo̧jet emakeļo̧k me elakkar pād ilo joko in m̧ōn̄ā eo am ium̧win n̄oul iiō ko. Ilo m̧ool, kōm kar mijak in kōpeļļo̧ke im etale jet iaan nien m̧ōn̄ā ko remaron̄ kar bar kwaļo̧k juon ajeded in nan̄inmej ipeļakin laļ in! Bōtaab kwoj aikuj m̧ōņōņō n̄an jeļā bwe kōm maron̄ kar julo̧k men ko rōbaijin im bwe kauwōtata n̄an nan̄inmej n̄an laļ in kar joļo̧k.
Jet membōr in Kabun̄ in rej kwaļo̧k juon ļōmņak bwe karōk ko an iien idin̄ im m̧weiuk ko, kakoņkoņ m̧ōn̄ā, im 72 hour kits remaron̄ jab aorōk n̄an jidik kōnke Ritōl ro rejjan̄in bar ekōnono kaki raan kein im eto kōn men kein im unin kōnono ko reiookļok ilo kweilo̧k eļap. Bōtaab āliji kakkōl ko n̄an m̧aanjabpopo em̧ōj kar aer kean̄ kaki jān ritōl ro an Kabun̄ in iumwin n̄oul iiō ko. Jab m̧ūjkōk eo an kapilōk in kanaan eo iien ko ej ejake juon ennaan ekajoor im alikkar im bwe āliji ennaan kein eļapļo̧k aer aorōk jān juon kakkōl make emaron̄ in.
Ilo ejja wāween in wōt iien ko reppen rej kwaļo̧k likjab ko ilo m̧aanjabpopo ilo kanniōk, kōn menin, barāinwōt nan̄inmej ko an jab itok limo ilo jetōt im jelōke eo leļo̧k n̄an er men ko rekemetak tata ilo iien Mālejjon̄ ko reppen. Jej ekkatak, n̄an waanjon̄ak, ilo būrabōļ eo kōn bōjin ro jon̄oul me raar aipedped ilo m̧aanjabpopo eo me ekar tōlļo̧k er n̄an jekjek eo ekar jab jeraam̧m̧an. Keememej ekōjkan an kar bōjin ro ļalem rebwebwe likjab n̄an m̧aanjabpopo ilo jetjet n̄an iien etale eo kar leļo̧k n̄an er ilo raan eo ļeo pālele ekar itok.
“Bwe ro rebwebwe ke rej bōk lamp ko aer, re jab bōk oil ņa ippāer:
“A ro re mālōtlōt rej bōk oil ilo aer kein ettein̄ ņa ippā lamp ko aer. …
“Im n̄e lukkuun bon̄, juon lam̧ōj, Lo, ļeo pālele! Kom̧win itōn wōn mae e.
“Innām virgin ro otemjej rej jerkak, im kōm̧m̧ani lamp ko aer.
“Im ro re bwebwe re ba n̄an ro re mālōtlōt, Kom̧win letok n̄an kōm jān ami oil, bwe lamp ko am re nan̄in kun.
“A ro re mālōtlōt re uwaak im ba, Bōlen; kōm jāmin bwe kake: a kom̧win ilo̧k n̄an ippān ro rej wia im wiaik ami.
“Im ke raar ilen wiaik, ḷeo pālele ej itok; im ro rej dedeḷọk rej deḷọñ ippān ñan kwōjkwōj in pālele: im e kiil aor.
“Tokālik virgin ro jet rej barāinwō itok im ba, Irooj, Irooj, kwōn kapeļļo̧k n̄an kōm.” 8
“A e uwaak im ba, Em̧ool Ij ba n̄an kom̧, I jaje kom̧.” 9
Bōlen ilo etale in, bōjin ro ļalem rōbwewe raar Mālejjon̄ n̄an er make bwe rej riron̄jake wōt im jab rikōm̧m̧ane naan eo. 10
Ewōr juon m̧ōtta eo me ekar juon rijikuuļ eniknik ilo jikuuļ in law. Ilo juon kar jemijita, Sam ekar joļo̧k an iien aolep raan n̄an etale, ba ilo tukadu in, im ekkatak jān kakeememej ko an n̄an kajjojo kūlaaj me ekar pād ie. Ekar ļoo ejja jon̄ak eo wōt n̄an aolepān kūlaaj ko an ilo jem̧lo̧k in aolep wiik im aolep allōn̄. Jekjek eo an ekar kōmaron̄ e n̄an ekkatak law im ejjab baj wōt keememej dipdik in meļeļe ko wōt. Im ke iien teej ko raar ālik tata epaaktok, Sam ekar pojak. Ilo m̧ool, ekar lo bwe teej eo an ālik tata ekar juon iaan m̧ōttan ko edik an en̄taan an kaminene in legal eo an. Wejepedik im jetjet m̧aanjabpopo ej waļo̧k mālijjon̄ ejeraam̧m̧an.
Jekjek in an Sam kar kōm̧m̧ane legal education eo an ekar Mālejjon̄ juon iaan jon̄ak kok an Irooj raorōk tata kōn rūttoļo̧k im eddōkļo̧k. “Bwe lo, āindein Irooj Anij ej ba: Inaaj leļo̧k n̄an ro nejin armej lain im bar lain, naan in kain̄i im bar naan in kain̄i, ijin jidik im ijjuweo jidik; im em̧ōņōņō ro rej eo̧ron̄ naan in kain̄i ko Aō, im wūjleptok lo̧jiln̄ier n̄an Aō kōkapilōklōk, bwe renaaj jeļā mālōtlōt; bwe n̄an eo ej bōk Inaaj leļo̧k eļapļo̧k.” 11
Ij kajjitōk ippādwōj kajjojo n̄an “kōļmanļo̧kjeņ kōn iaļ ko [ad]” 12 im “mālejjon̄ [kōj make], eļan̄n̄e [jej] pād ilo tōmak eo; [im] Mālejjon̄ [kōj] make.” 13 Ta eo jekar ekkatak ilo allōn̄ kein kiiō repaak kōn ukōt wāween mour im mo ko? Ta eo jej aikuji n̄an kōkōm̧anm̧ani ļo̧k ilo mour ko ad ilo jetōb, ānbwin, iaio, en̄jake, im mālōtlōt? Kiiō ej iien n̄an m̧aanjabpopo im Mālejjon̄ n̄an kōj make kōņaan eo im maron̄ eo n̄an kōm̧m̧ani aolep men ko jabdewōt Irooj ad Anij enaaj jiron̄ kōj.
Mālejjon̄ im Bun̄ M̧aanļo̧k
Juon iien ikar pād ilo juon ilomej n̄an juon mijenede edik me ekar mej ilo juon jorrāān. Jemān mijenede eo ekar ekōnono ilo mej eo im kar kōmeļeļeik liājļō eo an kōn jepeļo̧k eo ilo mour in jab kōtmene kake jān juon nejin jitōnbōro. Ekar m̧ool ilo an Mālejjon̄ bwe e make ekar jab meļeļe un ko ak iien eo an kain iien rōt in. Bōtaab inaaj aolep iien keememej em̧m̧aan in em̧m̧an ekar barāinwōt Mālejjon̄ bwe ekar jeļā Anij ekar jeļā un ko im iien eo kōn jako eo an ajri eo nejin—im bwe ekar bwe an em̧m̧an n̄an e. Ekar jiron̄ jarlepju eo bwe e im baam̧le eo an, men̄e ilo būrom̧ōj, renaaj aenōm̧m̧an; naan in kam̧ool ko aer kar dim wōt im pen. Ekar kōjem̧ļo̧k ennaan ko an kōn kean̄ in, “Ikōņaan bwe kom̧in jeļā bwe to̧o̧n wōt an gospel eo an Jisōs Kraist pād, baam̧le eo am ej tōmak ie. Jej aolep tōmak ie.”
Men̄e jako eo an juon eo ejitōnbōro ekar kōmettak ilo en̄jake im pen, membōr ro an baam̧le in etiljek ilo jetōb raar m̧aanjabpopo n̄an mālejjon̄ bwe ren maron̄ ekkatak katak ko an aorōk eo an indeeo jān men ko me raar en̄taan jāni. 14
Tiljek ejjab menin bwebwe ak kōm̧m̧an men ko reļļap. Ijello̧kin, ej lōke im likūt lōk eo ad ilo Jisōs Kraist āinwōt ad Rilo̧mo̧o̧r, ilo Etan, im ilo kallim̧ur ko An. Ilo ad “kom̧ aikuj bun̄ m̧aanļo̧k kōn dim ilo Kraist, kōn juon kōjatdikdik emeram, im juon iakwe n̄an Anij im armej otemjeļo̧k,” 15 jej jeraam̧m̧an kōn juon kōļmenļo̧kjeņ indeeo im meļeļe kōn mour me ej eļļāļo̧k jān maron̄ eo ad ewōr jon̄a ilo mour in. Jenaaj maron̄ in “aetok ippān doon, im jutak ilo jikin ko rekwōjarjar” 16 im “jab em̧m̧akūt, m̧ae raan in Irooj ej itok.” 17
Ke ikar jerbal āinwōt būreejtōn an Brigham Young University–Idaho, Elder Jeffrey R. Holland ekar itok n̄an campus eo ilo Tijemba in 1998 eo n̄an ekōnono ilo juon iaan nokon ko am kajjojo wiik. Susan im n̄a kar karuwaineneiktok juon kumi in rijikuuļ ro n̄an ioon im loļo̧k Elder Holland m̧okta jān an kar kwaļo̧k ennaan eo an. Ke iien eo am ippān doon ekar epaak an jem̧lo̧k, ikar kajjitōk ippān Elder Holland, “Eļan̄n̄e komaron̄ kar katak in rijikuuļ rein baj juon men, ta eo enaaj kar?”
Ekar uwaak:
“Jej kam̧oole juon em̧m̧akūt eo ekanooj ļap n̄an kipel armej n̄an pād ilo juon iaan rejet ko an jum̧ae tōmak. Armej ro Rekwojarjar ilo Raan-ko Āliktata rejjamin maron̄-ikōņ wōt ilo jab kāālet juon rejet. Jekjek eo n̄an ikōņ wōt enaaj jako.
“Eļan̄n̄e kwoj epepe wōt dān eo im jab aaō ļo̧k jān kaetet eo an reba eo, kwonaaj etal n̄an juon jikin. Ilo m̧ool kwonaaj etal jabdewōt jikin aaet eo ej bōkļo̧k kwe n̄an e. Ejjab jetjet n̄an kōj n̄an anōk wāween ko repidodo tata n̄an tōmak.
“Kāālet ko rej aikuj in kōm̧m̧an. Jab kōm̧m̧an kāālet ej juon kāālet. Ekkatak n̄an kāālet kiiō.”
Ennaan eo an Elder Holland kōn ļapļo̧k in kipel armej n̄an pād ilo juon iaan rejet ko an jum̧ae tōmak em̧ōj kar Mālejjon̄e naan in kanaan eo kōn em̧m̧akūt ko an jukjuk in pād im iien ko an 22 iiō ko jān ke ekar uwaak kajjitōk eo aō. Bōklōkōte jekjek eo edepakpak ikōtaan wāween ko an Irooj im an laļ in, Elder Holland ekar kakkōl bwe jejjamin naaj bar ļo̧kwōt n̄an jidik maron̄ in bōk koņaad ilo men ko an laļ in im ļōmņak ko im m̧ōttan wōt Kabun̄ eo kōjepļaaktok em̧ōkaj aer jako. Rikarejeran in an Irooj ekar kōketak rūm̧m̧an ded ro n̄an kāālet, m̧aanjabpopo, im erom rikaļoor ro rekije an Rilo̧mo̧o̧r eo. Ekar jipan̄ er m̧aanjabpopo im bun̄ m̧aanļo̧k im jān en̄jake ko an Mālejjon̄, etale, im kajjieon̄ an mour ko aer.
Kallim̧ur im Naan in Kam̧ool
Jekjek eo an Mālejjon̄ kōj make ilo juon m̧ōttan eaorōk an karōk in m̧ōņōņō eo eļap an Jemādwōj Ilan̄ Ij kallim̧ur bwe ilo ad jim̧or m̧aanjabpopo im bun̄ m̧aanļo̧k kōn tōmak ilo Rilo̧mo̧o̧r eo, jemaron̄ aolep bōk ejja kūreet eo wōt ilo teej eo eļap tata an mour wabanban: “ ‘Eṃṃan aṃ kōṃṃan kwō karijera eṃṃan im tiljek. kwaar tiljek kōn men ka re iiet, Inaaj kairooj eok ioon men ko re lōñ: kwōn deḷọñ ilo lañlōñ an aṃ irooj.” 18
Ij kam̧ool bwe Anij Jemān Indeeo ej Jemād. Jisōs Kraist ej Nejin Jitōn bōro Emake Wōt im Nejin emour, ad Rilo̧mo̧o̧r im Ripinmuur. Men kein ij lan̄lōn̄ ilo aō kam̧o̧ol ilo āt eo ekwojarjar etan Irooj Jisōs Kraist, amen.