Idajon̄jon̄, Kam̧ool, im Kōjatōltōl
Kōjeraam̧m̧an eo eļaptata eo me enaaj itok n̄e jej kam̧oole n̄an kōj make ilo tiljek n̄an bujen ko ilo iien mellijon̄ ko ad enaaj erom̧ juon oktak ilo piktokid.
Ro jeiū im jatū rejitōn bōro, ij m̧ōņōņō bwe imaron̄ kōnono n̄an kom̧ rainin. Kōjatdikdik eo aō ej n̄an rōjan̄ n̄e mour in ej pen ļo̧k im n̄e ejjab alikkar. N̄an jet iaami, tōre eo ej kiiō. Eļan̄n̄e ejjab, iien eo enaaj itok.
Eban juon erreim̧aanļo̧k eo ejjeļo̧k kōjatdikdik ie. Ej juon men em̧ool—aaet juon kōjatdikdik—kōnke jibadbad eo an Anij ilo Kōm̧anm̧an eo an laļ in. Jibadbad eo ej n̄an leļo̧k n̄an ajri ro Nejin iien n̄an idajon̄jon̄ er make, maron̄ im ikdeleel n̄an kāālet jim̧we eo n̄e epen. N̄e kōm̧m̧ane menin, paaktok ko aer renaaj oktak im renaaj erom̧ āinwōt E. Ekar jeļā bwe enaaj menin aikuj tōmak eo edim ilo E.
Elōn̄ men ko ijeļā rekar itok jān baam̧le eo aō. Ke ekar rualitōk aō iiō, jinō eo emāletlet ekar kajjitōk ippān ļaddik eo jatū im n̄a n̄an kūntak wōjooj ippān ilo jikin kallip eo an baam̧le eo am ilo melaaj eo am ilikin m̧weo imōm. Kiiō ekar āinwōt juon jerbal eo epidodo kōm̧m̧ane, ak ikar jokwe ilo New Jersey. Ekkā an wōt. Bwidej eo elukkuun kar mijel pedkatin. Wōjooj ko rekar m̧ōkaj aer eddōk jān pejtebōļ ko.
Ij keememej aō illu ke wōjooj ko jab tūm̧ jān okarier , okar ko aer rekar pen n̄an pedkat mijel eo. Jinō im ļaddik eo jatū ejjab to ekar m̧ōkaj aer kūntake ijoko rej kūntaki. Ilak kajjieon̄ kōmakōjļo̧k aō kūntak, ikar en̄jake aō rūm̧ūjļo̧k wōt.
“Menin elukkuun pen!” Ikar lam̧ōj.
Ijjeļo̧kin an burom̧ōj tok, jinō ekar ettōn̄ im ba, “O, Hal, em̧ool epen. Ej aikuj bwe en kar pen. Mour in ej juon teej.”
Ilo iien eo, ikar jeļā bwe naan ko an rem̧ool im renaaj wōnm̧aanļo̧k wōt im m̧ool ilju im jekļaj eo aō.
Un in ettōn̄dikdik in iakwe eo an jinō ekar lukkuun alikkar jet iiō ko tokālik ke ikar riiti naan ko an Jemedwōj Ilan̄ im Eo Nejin Ejitōnbōro rej kōnono kōn jibadbad ko aer ilo aer kar ejaake laļ in im leļo̧k n̄an ajri ro nejier iien ko rem̧m̧an ilo mour in:
“Anij eaar ba bwe renaaj kam̧ool n̄an kōj eļan̄n̄e renaaj kōm̧m̧ane aolep men ko me Ekar kakien kōj n̄an kōm̧m̧ani;
“Im ro rekar kōjparok pād eo aer kein kajuon renaaj kobaļo̧k ioon; im ro rekar jab kōjparok pād eo aer kein kajuon reban bōk aiboojoj ilo ejja aelōn̄ in kiin̄ in wōt ippān ro rekar kōjparok pād eo aer kein kajuon; im rekar kōjparok pād eo aer kein karuo renaaj bōk aiboojoj kobaikļo̧k ioon bōraer n̄an indeeo im indeeo.” 1
Kwe im n̄a jekar errā kōn kūr in n̄an idajon̄jon̄ im n̄an kam̧ool bwe jenaaj kāālet n̄an kōjparok kien ko an Anij n̄e jeban bar pād im̧aan mejān Jemedwōj Ilan̄.
Aaet kōn juon kūr in iakwe jān Jemedwōj Ilan̄, Lucifer ekar kipel juon m̧ōttan jilu in ajri in jetōb ro n̄an ļoor e ak bōbrae karōk eo an Anij n̄an eddōkļo̧k im n̄an bōk m̧ōņōņō eo ejjeļo̧k jem̧ļo̧kin. Kōn an Setan jum̧ae, kar joļo̧ke ippān ļo̧k ro rekar ļoor e jān im̧aan mejān Anij. Kiiō ej kajjieon̄ n̄an kōm̧m̧an jon̄an eo emaron̄ n̄an oktakļo̧k jān Anij ilo iien aer pād im mour ioon laļ in.
Ro iaad me jekar errā kōn karōk eo jekar kōm̧m̧ane menin kōn tōmak eo ad ilo Jisōs Kraist, eo ekar erom̧ ad Rilo̧mo̧o̧r im Ripinmuur. Jekar bōlen tōmak iien eo bwe jabdewōt m̧ōjņo kar iooni im jabdewōt nana ko enaaj kar jum̧aeik kōj, kajoor in men ko rem̧m̧an renaaj ļapļo̧k wōt aer kajoorļo̧k.
Jemedwōj Ilan̄ im Jisōs Kraist rejeļā kajjier im rej iakwe kōj. Rej kōņaan bwe jen jepļaak n̄an Ippāer im erom̧ āinwōt Er. Jeram̧m̧an eo Am̧ ej jeram̧m̧an eo Aer. Kwar en̄jake bwe iakwe in jān m̧ool eo an Jetōb Kwojarjar ke kwar riit ak ron̄ naan kein: “Bwe lo, en̄in ej jerbal eo Aō im aibojooj eo Aō—n̄an kakūrm̧ool jab wabanban im mour indeeo an armej.” 2
Ewōr an Anij kajoor n̄an kapidodoikļo̧k iaļ ko ad. Ekar naajdik ajri ro nejin Israel kōn manna ilo iaļ eo aer ļo̧k n̄an āneen kallim̧ur. Irooj ilo iien kwaļo̧k eo An ioon laļ in ekar kōmour rinan̄inmej, kajerkak ro remej, im kaļur lojet. Ālkin Jerkakpeje eo An, Ekar kōpeļļo̧k “kalbuuj n̄an er ro rekar lokjak.” 3
Aaet Rikanaan Josep Smith, juon iaan rikanaan ro An rem̧m̧an tata, kar en̄taan ilo jikin kalbuuj im kar kōnono kōn katak ko me jej aolep ekkatak jāne im aikuj ilo iien idajon̄jon̄ in tōmak: “Im eļan̄n̄e renaaj joļo̧k eok ilo ron̄ eo, ak ilo pein riuror ro, im jem̧ļo̧k in mej ej likūt ioom; eļan̄n̄e renaaj joļo̧k eok ilo m̧wilaļ eo; eļan̄n̄e ņo n̄irn̄ir ko rej pepe ņae eok; eļan̄n̄e kōto kajoor ko rej erom̧ am̧ rikōjdat; eļan̄n̄e lan̄ ko rej nijōkļo̧k, im aolep lan̄ im kobban rej koba n̄an pinej iaļ eo; im ilōn̄in aolep, eļan̄n̄e atlaļ im atlōn̄ ko in hell rej kanooj eļļan̄ ilokam̧, kwōn jeļā, nejū m̧aan, bwe aolep men kein otemjeļo̧k renaaj lewōj n̄an eok imminene, im naaj n̄an em̧m̧anļo̧k eo am.” 4
Kwomaron̄ bwūlōn̄ etke juon Anij eo eļap iakwe ippān im ewōr ippān aolep kajoor ej kōtļo̧k bwe jen bōk mour in idajon̄jon̄ eo me epen. Ej kōnke E ejeļā bwe jej aikuj eddōkļo̧k ilo erreo ilo jetōb im emourur ilo ānbwin bwe jen maron̄ mour ilo aelōn̄ eo An ippān baam̧le ko ad indeeo. N̄an kakūrm̧ool menin, Jemedwōj Ilan̄ ekar letok n̄an kōj juon Rilo̧mo̧o̧r im kajoor n̄an kāālet n̄an kōj make kōn tōmak n̄an kōjparok kien ko An im n̄an ukweļo̧k im n̄an itok n̄an E.
Karōk eo ekam̧ōņōņō an Jemedwōj Ilan̄ ewōr an kōttōpar n̄an ad erom̧ āinwōt Eo Nejin Ejitōnbōro, Jisōs Kraist. Ilo aolep men ko, waanjon̄ak eo an Rilo̧mo̧o̧r ej ritōl eo ad em̧m̧an tata. Ekar jab rōļo̧k jān aikuj eo n̄an kam̧ool ke E make ej aikuj pokake. Ekar kijenmej ilo en̄taan kōn aolep ajri ro nejin Jemedwōj Ilan̄, kōļļā wōņeen aolep jerawiwi ko ad. Ekar en̄jake en̄taan ko an aolep ro me rekar im renaaj itok n̄an laļ in.
N̄e kwoj kōņaan jeļā ewi jon̄an metak eo ekar kate kake, keememej E. Ekar en̄taan kōn ta eo kwoj en̄taan kake bwe En maron̄ jeļā wāween an ļōn̄aj lōn̄tak eok. Emaron̄ jab joļo̧k eddo ko am̧, ak E enaaj lewaj kajoor, kaeņōm̧m̧an, im kōjatdikdik. E ejeļā iaļ eo. Ekar idaak kap eo emeo̧. Ekar kijenmej kōn en̄taan ko an aolep.
Em̧ōj naajdik eok im kaeņōm̧m̧an eok jān juon Rilo̧mo̧o̧r eļap iakwe ippān, eo ejeļā wāween n̄an jipan̄ eok ilo jabdewōt idajon̄jon̄ ko kwoj jelm̧aeiki. Alma ekar katakin:
“Im Enaaj ilo̧k, en̄taan kōn metak ko im kaen̄tanaan ko im kapo ko otemjeļo̧k; im menin bwe naan eo en maron̄ kūrm̧ool eo kar ba Enaaj bōk ioon metak ko im nan̄inmij ko an armej ro an.
“Im Enaaj bōk Ioon mej, bwe E en maron̄ kōtļo̧k to ko an mej rej lukwōj armej ro An; im Enaaj bōk Ioon m̧ōjņo̧ ko aer, bwe būruōn ren maron̄ obrak kōn tūriam̧o, ekkar n̄an kanniōk, bwe En maron̄ jeļā ekkar n̄an kanniōk ekōjkan jipan̄ armej ro An ekkar n̄an m̧ōjņo̧ ko aer.” 5
Juon wāween Enaaj jipan̄ eok enaaj karuwaineneik eok aolep iien n̄an keememej E im n̄an itok n̄an E. Ekar kōketak kōj:
‟Kom̧in itok n̄an ippa, kom̧ otemjej rej jerbal im ban, im Inaaj kakkijeik kom̧.
“Kom̧win bōk Aō ine im likūte iaerami; im katak Ippa, bwe ij ineem̧m̧an im ettā būruō, im kom̧ naaj lo an ami kakkije.” 6
Wāween eo n̄an itok n̄an E ej n̄an kwojkwoj ioon naan ko An, n̄an kōmourrur tōmak eo n̄an ukweļo̧k, n̄an kāālet n̄an peptaij im kapen jān Rikarejeran eo ewōr an mālim, innem n̄an kōjparok bujen ko ippān Anij. E ej jilkintok Jetōb Kwojarjar eo bwe en am̧ kampānien, rikaenōm̧m̧an, im ritōl.
Ilo am̧ mour erreo kōn menin letok eo an Jetōb Kwojarjar, Irooj emaron̄ tōl eok n̄an ineem̧m̧an men̄e kwojjab maron̄ lo iaļ eo. Ippa, E emakijkij an kwaļo̧k bun̄tōn eo tok juon ak ruo n̄an bōke. Ejeja An letok n̄an eō jidikin ilju im jekļaj eo ettoļo̧k, ak barāinwōt jidikin tōl ko rejeja kōn ta eo ij kāālete n̄an kōm̧m̧ane aolep raan in aō mour.
Irooj ekar kōmeļeļeik:
“Kom̧ij jab maron̄ lo kōn mejān kanniōk ko mājāmi, bwe ilo iien in, karōk eo an ami Anij kōn men ko renaaj itok ālikin, im wōj eo enaaj itok … ālikin eļap en̄taan.
“Bwe ālikin eļap en̄taan ej itok jeraam̧m̧an ko.” 7
Kōjeraam̧m̧an eo eļaptata eo me enaaj itok n̄e jej kam̧oole n̄an kōj make ilo tiljek n̄an bujen ko ilo iien mellijon̄ ko ad enaaj erom̧ juon oktak ilo piktokid. Ilo ad kāālet n̄an kōjparok bujen ko, kajoor eo an Jisōs Kraist im kōjeraam̧m̧an ko an Pinmuur eo An emaron̄ jerbal ilo kōj. Buruōd emaron̄ pelļo̧k n̄an iakwe, n̄an jeorļo̧k bōd, im n̄an karuwaineneik ro jet n̄an itok n̄an Rilo̧mo̧o̧r. Lōke ko ad ilo Irooj ej ļapļo̧k. Mijak ko ad rej dikļo̧k.
Kiiō, aeet kōn kōjeram̧m̧an ko kar kallim̧ur kaki ālkin mellijon̄, jejjab kappok mellijon̄. Ilo en̄jake ko an mour in, enaaj wōr iien ko rem̧m̧an n̄an idajon̄jon̄ kōj make, n̄an eļļā jān mellijon̄ ko reppen im erom̧ āinwōt Rilo̧mo̧o̧r im Jemedwōj Ilan̄.
N̄an kakkobaba, jej aikuj kile mellijon̄ ko an ro jet im kajjieon̄ jipan̄ er. Menin enaaj lukkuun pen n̄e jej idajon̄jon̄e kōj make. Ak jenaaj lo n̄e jej ineek eddo ko an ro jet, jekdo̧o̧n jidik wōt, jenaaj kajoorļo̧k im jej en̄jake juon meram ilo juon marok.
Ilo menin, Irooj ej ad Riwaanjon̄ak. Ioon debwāāl eo ilo Golgota, em̧ōj kadede an en̄taan kōn metak ko eļap jān jon̄an me E enkar mej wōt n̄e E enkar jab nejin Anij emake wōt, E ekar reilaļļo̧k n̄an ro rekar debwāāl im ekar ba n̄an Jemān, “Kwon joļo̧k ruier; bwe re jaje ta eo rej kōm̧m̧ane.” 8 Ilo an en̄taan kōn aolep ro renaaj mour ioon laļ in, E ekar reilaļtak, jān debwāāl eo, n̄an Jon im n̄an jinen eo me ekar lukkuun burom̧ōj im ekar jerbal in karejar n̄an e ilo iien mellijon̄ ko an:
“Ke Jisōs ej lo jinen im rū kaļoran eo Ej iakwe e jutak iturin, E ba n̄an jinen, Kōrā, lo, nejim!
“Im E ba n̄an rū kaļoan eo, Lo jinōm̧! Im jān awa eo rū kaļoran ej bōk lio n̄an jikin.” 9
Kōn kōm̧m̧an ko An ilo raan ko eļap aer kwojarjar, E ekar aje mour eo an n̄an kōj kajjojo, leļo̧k ejjab jipan̄ wōt ilo mour in ak mour indeeo ilo iien eo ej itok.
Em̧ōj aō lo an armej jerkak n̄an aitokan eo eaitokļo̧k n̄an kam̧ool make tōmak ko aer ilo iien mellijon̄ ko reppen. Turin M̧ōn Jar eo rainin rej jet waanjon̄ak ko. Armej rej bukwelōlō kōn apan̄. Kōn aer tiljek im kijejeto, rej erom̧ āinwōt Rilo̧mo̧o̧r im Jemedwōj Ilan̄.
Ikar ekkatak bar juon katak jān jinō. Ke ekar juon leddik jidikdik ekar wōr juon an nan̄inmej ejaake jān kij im epaake an kar mej. Tokālik ekar bar wōr juon an nan̄inmej in kōmālij. Jemān ekar mej ke ekar dik, kōn menin jinō im ļaddik eo jatū rekar jipan̄ jineer.
Aolepān mour ko an, ekar en̄jake kajoor in mellijon̄ ko ikkijeen nan̄inmej ko. Ilo iiō ko 10 ilo mour eo an, ekar aikuj bwe en m̧wijm̧wij. Ak ilo aolepān men kein, ekar kam̧ool tiljek eo an n̄an Irooj, jekdo̧o̧n n̄e ekar babu wōt ilo peet eo an. Pija eo wōt ilo ruum in kiki eo an ilo dipin m̧weo ej pijaan Rilo̧mo̧o̧r. Naan ko an āliktata n̄an n̄a ilo peet eo an me ekar mej ioon erkein: “Hal, ainikiem āinwōt n̄e kwoj tin nan̄inmej. Kwoj aikuj kōjparok wōt am̧ mour.”
Ilo iien ilomej eo an rikōnono eo āliktata ekar Elder Spencer W. Kimball. Ālkin ba jet men kōn mellijon̄ ko an im an tiljek, ekar ba jejjet in menin: “Jet iaami komi maron̄ bwūlōn̄ etke Mildred ekar aikuj kar en̄taan eļap ilo juon tōre aeitok kitien. Inaaj jiron̄ eok etke. Kōnke Irooj ekar kōņaan kōwāppen e ļo̧k.”
Ij kwaļo̧k aō kam̧m̧oolol kōn elōn̄ membōr ro retiljek ilo Kabun̄ eo an Jisōs Kraist ro rej ineek eddo ko kōn tōmak edim im ro rej jipan̄ ro jet n̄an ineek eddo ko aer ilo an Irooj kappukot n̄an kōwāppen er ļo̧k. Ij barāinwōt kwaļo̧k iakwe im jouj n̄an ro rikōjparok im ritōl ro ipeļaakin laļ in ro rej jipan̄ ro jet ilo aer im baam̧le ko aer kijejeto ilo kōjatōltōl in.
Ij kam̧ool bwe jej ajri ro nejin Jemedwōj Ilan̄, eo ej iakwe kōj. Ij en̄jake iakwe eo an Būreejtōn Russell M. Nelson n̄an kōj aolep. E ej rikanaan eo an Irooj ilo laļ in rainin. Ij kam̧ool menin ilo et eo ekwojarjar etan Irooj Jisōs Kraist, amen.