M̧ōttan ko Rem̧m̧an jān M̧ōttan eo Kein Karuo an 190th Kweilo̧k eo Eļap

Ilibwilijin jab jeļā kōn ta, milien armej ro raar lo juon iien aenōm̧m̧an ilo kweilo̧k eo eļap kar kōm̧m̧an ilo Oktoba 3–4,2020. Ritōl ro an Kabun̄ in raar kwaļo̧k n̄an kōj kōn Jisōs Kraist kōn ennaan ko an bōro kuk im iakwe, kōjatdikdik im kemour, im aenōm̧m̧an ilo jibadbad eo ekwojarjar.

Būreejtōn Russell M. Nelson ekar katakin kōj ekōjkan bōk kōjeraam̧m̧an ko an erom armej ro an Anij.

“Ilo am̧ kālet bwe Anij en anjo̧ ilo mour ko am̧, kwonaaj en̄jake kōn kwe make bwe ad Anij ej ‘juon Anij in mennin bwilōn̄ ko’ [Mormon 9:11].” —Būreejtōn Russell M. Nelson (lale peij 92)

Elōn̄ rikōnono ro raar kōnono kōn eddōkļo̧k an juon make ilo ļoor Jisōs Kraist, lōke E, im leļo̧k ankilad n̄an E.

“Ilo ad ettā im elļo̧k n̄an [Jisōs Kraist], Enaaj kaddōkļo̧k maron̄ eo ad n̄an oktak.” —Becky Craven (lale peij 58)

Bar juon alen, coronavirus eo ekāāl ekar jelet ta eo jaar loe im ron̄ ilo kweilo̧k eo. Ijo wōt ke, kōn elōn̄ļo̧k jeļā ekar itok juon kalimjōkļo̧k eļapļo̧k ilo an rikōnono ro kar pedped ejjab wōt ilo kōjatdikdik ak barāinwōt ioon juon meļeļe eļapļo̧k kōn karōk eo an Anij n̄an m̧ōņōņō indeeo eo ad.

“Teej ko ilo jikuuļ in mour wabanban in rej juon men elukkuun in aorōk an eddōkļo̧k eo ad indeeo. … Ij jar bwe jen … ekkatak katak ko raorōk me en̄jake ko wōt reppen remaron̄ katak in kōj.” —Elder David A. Bednar (lale peij 8)

Kōn ikitōltōk eo ejjab bōjrak ejelet elōn̄ m̧ōttan ko an laļ in, ritōl ro raar kamo kalijōkļo̧k kōn kil im kakkure. Raar kūr n̄an kōj āiniwōt Armej ro Rekwojarjar ilo Raan-ko Āliktata n̄an erom juon ilo jim̧weo, kappukōt bōro kuk ilo oktak, im jipan̄ kalōk juon jukjuk in pād em̧m̧an im iakwe.

“Jej mour ilo juon tōrein jum̧ae ekajoor. … Jemaron̄ in kōkm̧anm̧anļo̧k im kōjeraam̧m̧an jukjukinpād ilo juon wōt.” —Elder Quentin L. Cook (lal peij 18)

Ilo ad bar lale kweilo̧k eo kōn unin kōnono in, kōmij kōjatdikdik kom̧ naaj en̄jake bar juon alen kōjatdikdik im im̧we eo me kom̧ kar en̄jake ilo iien eo kein kajuon, barāinwōt bōk kōļmenļo̧kjeņ ko rekāāl jān ekkatak eo ami ilo allōn̄ ko rej itok.