Kom̧in Ekil, im Jar Iien Otemjej
Rainin Ij kadepakpakļo̧k kūr eo aō n̄an aolep armej jān aolep laļ ko ipeļaakin laļ in n̄an jar.
Ro jeiū im jatū jitōnbōro, ilo wiik eo āliktata in iien kwaļo̧k naan eo An ioon laļ in, Jisōs ekar katakin Rikaļoor ro an n̄an “ekil, im jar iien otemjej, bwe kom̧win maron̄ in ko jān men otemjej men ko renaaj waļo̧k, im bwe kom̧win jutak im̧aan mejān Nejin armej.” 1
Ilubwiljin “men kein otemjej renaaj jejjet” m̧okta jān Itok eo an Kein Karuo rej “tariņae ko im naan kōn tariņae ko[,] … n̄ūta, im nan̄inmej ko reļap, im m̧akūtkūt ko an laļ ilo jet āne.” 2
Ilo Katak im Bujen Ko, Rilo̧mo̧o̧r ekar ba, Im aolep men otemjeļo̧k renaaj poktak; … bwe mijak enaaj itok ioon aolep armej.” 3
Ealikkar, jej mour ilo juon tōre eo me aolep men ko rej poktak. Elōn̄ armej rej mijak kōn ilju im jekļaj, im elōn̄ armej ro em̧ōj aer elļo̧k jān tōmak eo aer ilo Anij im Eo Nejin, Jisōs Kraist.
Riboot in nuuj ko reobrak kōn bwebwenato in jorrāān im ko̧kkure ko. Jerbal in kōnanaik bar juon armej rej waļo̧k ilo online. Wūlej ko, m̧ōn jar ko, jikin jar an rim̧uslim, im̧ōn kweilo̧k an riJu, im jikin jar ko jet em̧ōj ko̧kkuri.
Juon nan̄inmej ekapopo ipeļaakin laļ in em̧ōj an pedjaake aolep kona ko emen ilo laļ in: milien armej ro em̧ōj aer bōk nan̄inmej in elōn̄ļo̧k jān juon milien armej ro em̧ōj aer jako. Kadiwōjļo̧k ko an jikuuļ ko, iien kabun̄ jar an m̧ōn jar ko, m̧are ko, jerbal in mijinede, im elōn̄ m̧akūtkūt ko jet raorōk em̧ōj kōbōjraki. N̄an kakkobaba, elōn̄ armej em̧ōj kamākeļo̧k iaer im kattoļo̧k er.
Oktak ko ikkijeen jeraam̧m̧an ko em̧ōj an kōm̧m̧an bwe en wōr apan̄ ko n̄an elōn̄ armej, eļaptata n̄an ajri ro nejin Jemedwōj Ilan̄ me epidodo ko̧kkure.
Jej loi armej ro rej kwaļo̧k maron̄ ko aer n̄an kōm̧m̧an aeņōm̧m̧an, im jej loi rinana ro rej illu im ko̧kkure aolep men.
Ilo ejja iien eo wōt, jej wōnm̧aanļo̧k wōt n̄an loi jorrāān ko aolep ipeļaakin laļ in.
Ekkā aō ļōmņak kōn kom̧ ro rej en̄taan, inepata, mijak, ak en̄jake aer ajimakeke. Ij kam̧ool n̄an kom̧ kajjojo bwe Irooj ejeļā kōn kom̧, bwe E ejeļā kōn inepata ko am̧, im am̧ burom̧ōj, im bwe E ej iakwe eok—ittino, an juon make, m̧wūlaļ, im indeeo.
Kajjojo bon̄ ij jar, ij kajjitōk bwe Irooj en kōjeraam̧m̧an aolep ro rekar eddodo kōn liājļōļ, metak, ajimakeke, im burom̧ōj. Ijeļā bwe ritōl ro jet an Kabun̄ in rej kajjitōk ejja menin wōt ilo iien aer jar. Buruōd, kajjojo im aolep, rej n̄an kom̧, im jar ko am rej n̄an Anij ilo etami.
Ikar joļo̧k jejjo raan ko ilo iiō eo ļo̧k ilo m̧ōttan eo an tulōn̄-tueōn̄ in Amedka n̄an loļo̧k riAmerika ro im jikin kakkoņ bwebwenato ko an Kabun̄ in, pād ilo iien kweilo̧k ko ippān mijinede ro im membōr ro ad, im loļo̧k kien eo ioļap im ritōl ro ilo pejnej ko.
Ilo Jabōt, Oktoba 20, ikar kōnono n̄an juon jarlepju in armej turin Boston, Massachusetts. Ke ikar kōnono, ikar en̄jake im̧we n̄an ba, “Ij akweļap n̄an kom̧ … n̄an jar kōn laļ in, kōn ritōl ro ad, kōn armej ro ad, im kōn baam̧le ko ad me rej mour ilo juon laļ eļap me Anij ekar ejaake.” 4
Ikar bar ba bwe Amedka im elōn̄ laļ ko ilo laļ in, ilo an m̧ootļo̧k iien ko, rej kiiō pād ilo juon tōre me kāālet ko aer relukkuun aorōk im rej aikuji jar ko ad.
Kajjitōk eo aō ejjab pād ilo naan kein aō me ikar kōpooji. Naan ko rekar jiktok ilo n̄a ilo aō en̄jake an Jetōb im̧we eō n̄an karuwaineneik ro rej pād n̄an jar kōn laļ in aer im ritōl ro aer.
Rainin Ij kadepakpakļo̧k kūr eo aō n̄an jar kōn aolep armej jān aolep laļ ipeļaakin laļ in. Jekdo̧o̧n wāween am̧ jar ak n̄an wōn eo kwoj jar n̄an e, jouj im kōmoururi tōmak eo am̧—jekdo̧o̧n ta tōmak eo am̧—im jar kōn laļ eo am̧ im kōn ritōl ro ilo jikin eo am̧. Āinwōt ikar ba ilo Oktoba iiō eo ļo̧k ilo Massachusetts, jej jutak rainin ilo juon tōre ilo bwebwenato me kāālet ko ad relukkuun aorōk n̄an kōm̧m̧ani, im laļ ko ilo laļ in rej lukkuun aikuj im̧we ekwojarjar im tōl. Menin ejjab kōn politics ak kakien ko. Ej kōn aeņōm̧m̧an im kōmour eo me emaron̄ itok n̄an jetōb ko kajjojo barāinwōt jetōbōn laļ ko—jikin ko aer, bukwon ko, im weto ko—kōn Irooj in Aeņōm̧m̧an im eo ej kōmour menotemjej, Irooj Jisōs Kraist.
Ilo jejjo allōn̄ remootļo̧k ikar en̄jake juon im̧we ekar itok n̄an eō bwe wāween eo em̧m̧antata n̄an jipan̄ jekjek ko an laļ in ej n̄an aolep armej bwe en ļapļo̧k aer kōjatdikdik ioon Anij im n̄an oktakļo̧k n̄an E kōn jar em̧ool. Kōttāik kōj make im kappukot im̧we an lan̄ n̄an niknik ak anjo̧ jān ta eo im̧aad enaaj wāween eo ejokne im ealikkar n̄an wōnm̧aanļo̧k wōt kōn peran im jelm̧ae iien kein reppen.
Jeje ko rekwojarjar rej kallikar tok jar ko an Jisōs barāinwōt katak ko An kōn jar ilo iien kwaļo̧k naan eo An ioon laļ in. Kwonaaj keememej e Jar eo an Irooj:
“Jememwōj i lan̄, En kwōjarjar Etam̧.
“En itok Am̧ aelōn̄. Ren kōm̧anm̧an ankil Am̧ āinwōt i lan̄, barāinwōt ioon laļ.
“Rainin kwōn letok n̄an kōm kijem rainin.
“Im joļo̧k am̧wōj m̧uri ippam̧, āinwōt kōm ar joļo̧k an armej m̧uri ippem.
“Im jab kadeļo̧n̄ kōm ilo kapo, a lo̧mo̧o̧ren kōm jān eo e nana. Bwe Am aelōn̄, im kajoor, im aiboojoj indeeo. Amen.” 6
Jar in, aibojooj, āliji elōn̄ alen jān ippān rikūriijtin ro, ej kalikkar bwe ekkar im jejjet n̄an kajju kajjitōk ippān “Jememwōj i lan̄, En Kwōjarjar Etam̧” n̄an uwaak ko kōn ta ko rej kaeinepataik kōj. Kōn menin, jen jar n̄an bōk tōl ekwojarjar.
Ij kūr kom̧ n̄an jar iien otemjej. 7 Jar kōn baam̧le eo am̧. Jar kōn ritōl ro an laļ ko. Jar kōn armej ro reperan ro me rej pād im̧aan tata ilo pata ko rainin ņae nan̄inmej im jorrāān ko waļo̧k ilo an armej iiaio, jukjuk in pād ko, politic, ak kij in nan̄inmej in me ejelōt aolep armej ro ilo peļakin laļ in: rim̧weie im rijeram̧ōl, ajri im rūtto jim̧or.
Rilo̧mo̧o̧r ekar katakin kōj bwe jen jab kōm̧m̧an jon̄an armej ro jej jar kake er. Ekar ba, “Kom̧in yokwe ro ri kōjdate kom̧, jouj n̄an ro rej kanejnej e kom̧, im jar kōn ro rej ikkure kake ko̧m̧ im matōrtōr kom̧.” 8
Ioon debwāāl eo ilo Calvary, ijo Jisōs ekar mej kōn jerawiwi ko ad, E ekar mour kōn ta eo ekar katakin ke Ekar jar, “Jema, Kwōn joļo̧k ruier; bwe re jaje ta eo rej kōm̧m̧ane.” 9
Jar kōn bōro em̧ool kōn ro me jej ļōmņak ad rikōjdat ej kwaļo̧k tōmak eo ad bwe Anij emaron̄ ukōt buruōd im buruōn ro jet. Jar rōt kein rej aikuj kōkajoorļo̧k ad ņa mejļan n̄an kōm̧m̧an jabdewōt oktak ko me rekkar ilo mour ko ad, baam̧le ko ad, im jukjukin pād ko.
Jekdo̧o̧n ia eo kwoj jokwe ie, ta kajin eo kwoj kōjerbale, ak apan̄ ko kwoj jelm̧ae, Anij ej ron̄ im uwaake eok ilo wāween eo An make, im ekkar n̄an Ankilaan make. Kōnke jej ajri ro Nejin, jemaron̄ kepaak E n̄an kappukot jipan̄, jokne, im juon ikdeleel ekāāl n̄an kōm̧m̧an juon oktak em̧m̧an ilo laļ in.
Jar kōn jim̧we, aenōm̧m̧an, kōn rijeram̧ōl, im rinan̄inmej ro, rejjab bwe. Ālkin jej bukwelōlō lo jar, jej aikuj bar jerkak im kōm̧m̧ane ta eo jemaron̄e n̄an jipan̄—n̄an jipan̄ jim̧or kōj make im ro jet. 10
Jeje ko rekwojarjar robrak kōn waanjon̄o̧k in armej in tōmak ro rekar kobaik jar ko im jerbale n̄an kōm̧m̧an juon oktak ilo mour ko aer make im ilo mour ko an ro jet. Ilo Bok in Mormon, n̄an waanjon̄o̧k, jej riit kōn Inōs. Em̧ōj lukkuun etale bwe “tarrin ruo m̧ōttan jilu in bok eo an ekadu ej kōmeļeļeik juon jar ak elōn̄ kain jar ko, im ko jet rej kwaļo̧k ta ko ekar kōm̧m̧ani ilo an kar bōk uwaak ko n̄an jar ko an” 11
Elōn̄ waanjon̄o̧k ko kōn wāween an jar kōm̧m̧an juon oktak ilo bwebwenato in Kabun̄ in ad make, jino jān jar eo jinointata an Josep Smith ilo juon bukwin wōjke epaake m̧weō m̧ōer kōm̧m̧an jān alal ilo jibūriin̄ ilo 1820. Kappukot jeorļo̧k bōd im tōl an jetōb, jar eo an Josep ekar kōpelļo̧k lan̄ ko. Rainin jej jeram̧m̧an kōn Rikanaan Josep im jet iaan em̧m̧aan im kōrā ro retiljek im Rekwojarjar ilo Raan ko Āliktata ro rekar jar im jerbal n̄an kajutak Kabun̄ eo an Jisōs Kraist im Armej ro Rekwōjarjar ilo Raan Ko Āliktata.
Ekkā aō ļōmņak kōn jar ko an kōrā ro ritōmak āinwōt Mary Fielding Smith, kōn jipan̄ eo an Anij, ekar peran ilo an kar tōl baam̧le eo an jān ko̧kkure ko reļļap ilo Illinois n̄an jokne eo ilo kom̧laļ eo, ijo baam̧le eo an rekar jeram̧m̧an ie ilo mour in jetōb im kanniōk jim̧or. Ālkin aō bukwelōlō im jar ilo m̧ool, innem ekar lukkuun kate n̄an eļļā ioon apan̄ ko im kōjeraam̧m̧an baam̧le ko an.
Jar enaaj lōn̄aj kōj im kepaak kōj ippān doon āinwōt kajjojo armej, āinwōt baam̧le ko, āinwōt juon kabun̄, im āinwōt juon laļ. Jar enaaj im̧we scientist ro im jipan̄ er lo uno im kein kōmour ko me enaaj kōjem̧ļo̧k nan̄inmej in ekapopo. Jar enaaj kaenōm̧m̧an ro em̧ōj an jako ro rejitōnbōro ippāer. Enaaj tōl kōj ilo ad jeļā ta eo n̄an kōm̧m̧ane n̄an kōjparok kōj make.
Ro jeiū im jatū, ij rōjan̄ bwe kwon kōttan ruoiki am̧ wūjlepļo̧k ilo jar. Ij rōjan̄ kom̧ n̄an jar ilo ao̧d eo am̧i, ilo aolep raan n̄e kwoj etetal, ilo m̧weo im̧ōm̧, ilo ward ko am̧i im aolep iien ilo buruōm̧. 12
Ilo etan ritōl ro an Kabun̄ eo an Jisōs Kraist im Armej ro Rekwojarjar ilo Raan Ko Āliktata, ij kam̧m̧oolol kom̧ kōn jar ko ami kōn kōm. Ij rōjan̄ kom̧ n̄an wōnm̧aanļo̧k wōt im jar bwe jemaron̄ bōk im̧we im revelesōn n̄an tōl Kabun̄ in ilo iien ko reppen.
Jar emaron̄ ukōt mour ko ad. Ketak kōn jar kōn m̧ool in bōro, jemaron̄ em̧m̧anļo̧k im jipan̄ ro jet n̄an kōm̧m̧ane ejja āindein wōt.
Ijeļā kōn kajoor in jar jān en̄jake eo aō make. Raan ko ļo̧k ikar make iaaō ilo opiij eo aō. Ej kab kar m̧ōj aō etal im taktō kōn peiū. Ekar mao̧, ebbōj, im ekar lukkuun metak. Ke ikar jijet ikkijeen tebōļ eo, ikar jab mije ta eo me elukkuun aorōk kōnke ikar m̧ad kōn metak in.
Ikar bukwelōlō im jar im kajjitōk ippān Irooj n̄an jipan̄ eō mije wōt bwe in maron̄ kadedeikļo̧k jerbal eo aō. Ikar jutak im jepļaak n̄an mijel in pepa ko ioon tebōļ eo aō. Em̧ōkaj an allikar im mije ekar itok n̄an kōļmenļo̧kjeņ eo aō, im ikar maron̄ kadedeikļo̧k men ko raorōk rekar pād im̧aaō.
Tarpok ko rej waļo̧k ilo laļ in remaron̄ kamijak ilo ad ļōmņak kōn elōn̄ jorrāān im apan̄ ko. Ak ej aō naan in kam̧ool ekajoor bwe eļan̄n̄e jenaaj jar im kajjitōk ippān Jemedwōj Ilan̄ kōn kōjeraam̧m̧an ko jej aikuji im tōl, jenaaj jeļā wāween ko jemaron̄ kōjeraam̧m̧an baam̧le ko ad, ro rūtūrir, jukjuk in pād ko, im barāinwōt laļ ko me jej pād ie.
Rilo̧mo̧o̧r ekar jar innem E ekar “etetal im kōm̧m̧an em̧m̧an” 13 ilo an naajdik rijeramōl ro, leļo̧k peran im jipan̄ n̄an ro ri aikuj, im loļo̧k er ilo iakwe, jeorļo̧k bōd, aeņōm̧m̧an, im kakkije n̄an aolep ro rej itok n̄an E. E ej wōnm̧aanļo̧k wōt im jipan̄ kōj.
Ij karuwaineneik aolep membōr ro an Kabun̄ in, barāinwōt ro rūtūrir im ro m̧ōttad jān tōmak ko jet ipeļaakin laļ in, n̄an kōm̧m̧an āinwōt an Rilo̧mo̧o̧r kar kapilōk rikaļoor ro An: “A kwom̧in ekil im jar iien otemjej” 14 kōn aeņōm̧m̧an, kōn kaeņōm̧m̧an, kōn kōjparok, im kōn iien ko rem̧m̧an n̄an jipan̄ doon.
Jon̄an an kajoor menin jar im an ļap aikuji jar in tōmak ko ad ilo Anij im eo Nejin Jitōnbōro ilo laļ in rainin! Jen keememej im kam̧m̧oolol kōn kajoor in jar. Ilo etan Jisōs Kraist, amen.