Ekkatak Enaan ko jān Kweilo̧k eo Eļap

Katak ko an rikanaan ro remour im ritōl ro jet an Kabun̄ in rej letok tōl ko reim̧we ilo ad kappukot n̄an bōk koņaad ilo jerbal in an Irooj. Ilo Jabōt ko kein karuo im kemān ilo kajjojo allōn̄, būreejtōnji ko an doulul eo an elder ro im Doulul eo an Kōrā ro rej kāālet juon ennaan an kweilo̧k eo ekōnono kake, pedped ioon aikuj ko an membōr ro im tōl eo jān Jetōb. Ilo jet iien, bisop eo ak stake būreejtōn eo emaron̄ in barāinwōt kwaļo̧k juon ennaan. Ilo aolepān, Ritōl ro raikuj kōmejajaik ennaan ko jān ro uwaan Būreejtōnji eo Kein Kajuon im Doulul eo an Jon̄oulruo Rijilōk ro. Ijowōt ke, jabdewōt ennaan jān kweilo̧k eo ekāāl tata maron̄ in ekōnono kake.

Ritōl im rūkaki ro rej aikuj kappukot wāween ko n̄an kōketak membōr ro n̄an riiti ennaan ko kar kāleti m̧okta jān iien eo.

N̄an meļeļe ko rellōn̄ļo̧k kōn kweilo̧k ko an doulul eo an elder ro im Doulu eo an Kōrā ro, lale Bok in Bōk Meļeļe: Jerbal in Kabun̄ eo an Jisōs Kraist im Armej ro Rekwojarjar ilo Raan Ko Āliktata, 8.2.1.2, 9.2.1.2, ChurchofJesusChrist.org.

Kōppopo n̄an Katakin

Kajjitōk ko ilaļ renaaj jipan̄ rūkaki ro ilo aer kōpooj n̄an kōjerbal enaan ko ilo kweilo̧k eo eļap n̄an katakin.

Ta eo rikōnono eo ekōnaan bwe jān meļeļe kake? Ta katak ko ilo gospel in liin ak ļein ej kajjieon̄ in katakin? Ekōjkan an pedped in katakin kein jerbal n̄an doulul eo ad ak Doulul eo an Kōrā ro?
Eoon ta ko rikōnono in ej kōjerbale n̄an jipan̄ ennaan in an? Ewōr ke eoon ko jet jemaron̄ riiti n̄an kōļapļo̧k meļeļe ko ad? (Komaron̄ ello ilo enaan ko āliktata ilo ennaan eo ak ilo Topical Guide eo.)
Ta kajjitōk ko komaron̄ kajjitōk bwe en jipan̄ membōr ro lin̄ūri ennaan in? Kajjitōk ta ko enaaj jipan̄ er loe aorōk ko an ennaan eo ilo mour ko aer, ilo baam̧le ko aer, im ilo jerbal eo an Irooj?
Ta eo imaron̄ kōm̧m̧ane n̄an karuwaineneiktok Jetōb eo n̄an kweilo̧k eo ad? Ta eo imaron̄ kōjerbal n̄an kōdepakpakļo̧k iien ekōnono eo, ekoba bwebwenato ko, waanjon̄ak ko, al ko, ak pija? Ta eo rikōnono eo ekar kōjerbale?
Rikōnono eo ekar ke leļo̧k juon karuwainene? Elmen aō jipan̄ membōr ro en̄jake ikdeleel n̄an kōm̧m̧ani karuwainene ko?

Ļōmņak ko n̄an M̧akūtkūt ko

Ewōr wāween ko n̄an jipan̄ membōr ro ekkatak jān enaan ko an kweilo̧k eo eļap. Erein ej jejjo waanjon̄ak ko; emaron̄ wōr jet ļōmņak ko renaaj em̧m̧anļo̧k n̄an Doulul eo ak kōrā ro.

Ekōnono ilo kūrup ko. Ajije ro membōr kūrup jidik ko, im jitōn̄ kajjojo kūrup ko n̄an riiti im ekōnono kōn kajjojo ennaan ko reoktak ilo kweilo̧k eo. Innām kajjitōk ippān kajjojo kūrup n̄an kwaļo̧k m̧ool ko rekar ekkatak. Ak komaron̄ kōm̧m̧an kurup ippān armej eo ekar ekkatak jān jākjōn ko reoktak im kōtļo̧k bwe ren katakin doon ta ko rekar ekkatak.
Uwaaki kajjitōk ko. Karuwaineneik membōr ro n̄an uwaaki kajjitōk ko āinwōt in kōn ennaan eo jān kweilo̧k eo: Ta katak ko rem̧ool ilo gospel in jekar loe ilo ennaan in? Elmen ad kōjerbal m̧ool kein? Ta karuwainene ko im kōjeraam̧m̧an em̧ōj kallim̧ur kaki me kar litok? Ta eo ennaan in ej katakin kōj kōn jerbal ko Anij ekōnaan bwe jān kōm̧m̧ani?
Kwaļo̧k kout ko. Karuwaineneik membōr ro n̄an kwaļo̧k kout ko jān ennaan ko jān kweilo̧k eo me ej im̧we er n̄an kakūrm̧ool eddo ko aer ilo jerbal eo an lo̧mo̧o̧r. Kōketak er bwe ren maron̄ lale elmen aer maron̄ kwaļo̧k kout kein n̄an kōjeraam̧m̧an juon armej, barāinwōt ro rej iakwe er im armej ro rej jerbal in karejar n̄an er.
Kwaļo̧k juon kein katak. Moktata, karuwainene jejjo membōr ro n̄an boktok juon men jān m̧weo me remaron̄ katakin kōn ennaan ko an kweilo̧k eo. Ilo iien kweilo̧k ko, kajjitōk ippān membōr ro n̄an kōmeļeļeik elmen an men in iookļo̧k ennaan eo.
Kapooj juon katak n̄an katakin ilo mōko. Kajjitōk ippān membōr ro bwe ren jerbal ilo ruo kumi n̄an kōpooj juon katak n̄an nokon in jota an baam̧le pedped wōt ioon ennaan jān kweilo̧k in. Ewi wāween ad kōm̧m̧an bwe ennaan kein ren wōr tokjāer n̄an baam̧le ko ad? Elmen ad naaj kwaļo̧k ennaan kein n̄an ro jej jerbal in karejar n̄an er?
Kwaļo̧k en̄jake ko. Riit ippān doon jet iaan naan ko jān ennaan ko ilo kweilo̧k eo. Kajjitōk ippān membōr ro n̄an kwaļo̧k jet waanjon̄ak ko ilo jeje ko rekwojarjar im jān mour ko aer me ej kwaļo̧k im rie katak ko rej katakin ilo naan kein.
Ekkatak kōn juon eoon. Karuwainene membōr ro n̄an riiti juon eoon ekkar n̄an ennaan eo jān kweilo̧k eo. Kajjitōk ippāer n̄an kōnono kōn ekojkan an katak ko ilo enaan eo jipan̄ er n̄an eļapļo̧k meļeļe ko ilo eoon in.
Pukot juon uwaak. Kajjojo iien, kōm̧m̧ani jet kajjitōk ko remaron̄ uwaak ilo am̧ kōjerbale ennaan ko ilo kweilo̧k eo. Kalimjōk kajjitōk ko me rej im̧we ļōmņak em̧wilaļ ak jerbal eo an pedped in katak ko an gospel eo (lale Teaching in the Savior’s Way [2016], 31–32). Innem kōtļo̧k bwe membōr ro ren kāālet juon kajjitōk im kappukot uwaak ko ilo ennaan eo. Karuwaineneik er bwe ren kōnono kōn uwaak ko aer ilo kurup ko.
Pukot juon ennaan ekadu. Karuwaineneik membōr n̄an kappok ilo ennaan ko ilo kweilo̧k eo, kappukot ennaan ko rekadu me ewōr meļeļe in n̄an er. Kajjitōk ippāer bwe ren kwaļo̧k ennaan eo ekadu im ta eo rekar katak jān e. Ekōjkan an katak kein jipan̄ kōj kattōbrak jerbal eo an Irooj?
Ejaake juon men. Karuwaineneik membōr ro n̄an kōm̧m̧ane juon poster ak bookmark eo ewōr naan ko rekadu jān ennaan eo jān kweiļo̧k eo. Leļo̧k n̄an er iien em̧m̧an n̄an kwaļo̧k ta eo rekar kōm̧m̧ane.

Kōn elōn̄ļo̧k ļōmņak ko n̄an ekkatak im katakin jān ennaan ko an kweilo̧k eo eļap, lale “Ideas for Learning and Teaching from General Conference” loe ium̧win Kweilo̧k Eo Eļap ilo Gospel Library eo.