Jelm̧ae Ilju im Jekļaj eo kōn Tōmak
Ilju im jekļaj enaaj maron̄ aiboojoj n̄an ro otemjej rej m̧aanjabpopo im ro rej wōnm̧aanļo̧k im m̧aanjabpopo n̄an erom̧ kein jerbal ko ilo pā ko pein Irooj.
Joteen in ekar juon iien jeban maron̄ meļo̧kļo̧k. Sister ro jeiū im jatū jitōn bōro, ij uteej bwe imaron̄ pād ippāmi. Emakijkij aō ļōmņak kōn kom̧ ilo kar allōn̄ kein rej jem̧ļo̧kļo̧k. Kom̧ lōn̄ļo̧k jān ralitōk milien ro rekajoor. Kom̧ij jab wōt nōm̧ba ko wōt ak kajoor in jetōb eo n̄an ukōt laļ in. Ikar lale ami kōm̧m̧ane baj menin ilo iien ajedeed in nan̄inmej in.
Jet iami rej kab loe er make ilo aer kappukot mennin aikuj ko rejabwe ak juon jerbal ekāāl. Elōn̄ rekar katakin ajri ro im wate jikin ko ipeļaakier. Jet rekar karuwaineneik mijenede ro n̄an m̧ōko ālkin an m̧ōkaj aer ro̧o̧l ilo ejjeļo̧k kar kōtmāne, ak ro jet rekar ukōt m̧ōko im̧ōmi n̄an jikin kamminene ko an mijenede. Kom̧ ar kōjerbal technology n̄an kobaļo̧k ilo online ippān baam̧le im ro m̧ōttami, jerbal in karejar n̄an ro otemjej rekar makeļo̧k iaer, im n̄an katak Itok, Ļoor Eō ippān ro jet. Kom̧ ar loe wāween ko rekāāl n̄an kōm̧m̧an bwe Jabōt en lan̄lōn̄. Im kom̧ ar kōm̧m̧an mask in kōjparok ko—milien iaer!
Kōn būruwōn tūriamo im iakwe, būruwō ej iwōj n̄an elōn̄ kōrā ro ipeļaakin laļ in me jitōn bōro ro aer rekar jako. Kōmij liajļaļ ippemi. Im kōmij jar kōn kom̧. Kōmij nōbar im jar kōn aolep jerbal im kijejeto n̄an kōjparok ājmour an ro jet.
Kom̧ jiron̄ ro kom̧ij barāinwōt kabwilōn̄lōn̄. Men̄e social media ej ibwijleplep kōn iakwelel, elōn̄ iami rekar loe wāween ko n̄an rōjan̄ ro jet im kwaļo̧k meram eo an Rilo̧mo̧o̧r eo.
Sister raņ, kom̧ are lukkuun jabbieon! Ij bwilōn̄ kōn kajoor im tōmak eo ami. Kom̧ ar kwaļo̧k bwe ilo iien ko reppen, kwoj aikuj pere im wōnm̧aanļo̧k wōt. Ij iakwe kom̧, im kallim̧uri kom̧ bwe Irooj ej iakwe kom̧ im Ej loe jerbal eo eļap kom̧ij kōm̧m̧ane. Kom̧ em̧m̧ool! Bar juon alen, kom̧ ar kam̧oole bwe kom̧ij lukkuun kōjatdikdik eo an Israel!
Kom̧ij kōņake kōjatdikdik eo me Būreejtōn Gordon B. Hinckley ekar lewaj n̄an kom̧ ke ekar kwaļo̧k kadkad in “Baam̧le Eo: Juon Naan in Kean̄ n̄an Laļ in,” 25 iiō ko remootļo̧k ilo Jeptōm̧ba in 1995 kweilo̧k eo eļap an Doulul eo an Kōrā ro. 1 Elukkuun aorōk bwe ekar kāālet n̄an kwaļo̧k kadkad in naan in kean̄ in eaorōk n̄an kōrā ro jeid im jatid an Kabun̄ in. Ilo kōm̧m̧ane wāween in, Būreejtōn Hinckley ekar kwaļo̧k aorōk in kareel eo ejjeļo̧k enej bōk jikin ilo kōrā ro ilo karōk eo an Irooj.
Kiiō, ikōņaan jeļā ta eo kom̧ ar ekkatak ilo iiō in. Em̧ōj ke ami lukkuun epaakeļo̧k Irooj, ak kom̧ij ke en̄jake ami ettoļo̧k jān E? Im ewi wāween an m̧akūtkūt ko kiiō lewaj ami en̄jake kōn ilju im jekļaj eo?
Kar kwaļo̧ke, bwe Irooj ekar kōnono kōn raan kein ad ilo naan ko rejjab kam̧ōņōņō. Ekar kakkōļ bwe ilo raan ko ad “būruon armej [renaaj kalikjab] er” 2 im bwe aaet rikāālet eo enaaj pād ilo kauwōtata in m̧oņ. 3 Ekar jiron̄ļo̧k Rikanaan Josep Smith bwe “aenōm̧m̧an [naaj] bōke jān laļ” 4 im ko̧kkure ko renaaj itok ioon armej. 5
Aaet Irooj em̧ōj an kar letok juon loļo̧kjeņ kōn ewi jon̄an an kabwilōn̄lōn̄ epepen in. Ekar im̧we Rikanaan Josep Smith n̄an kwaļo̧k “jerbal eo ilo … raan kein āliktata, ej juon eo eļap an aorōk. … An aiboojoj eļap jān kōmeļeļe, im dettan an aiboojoj eļļā jān men otemjej.” 6
Kiiō, dettan emaron̄ jab naan eo komaron̄ kāālete n̄an kōmeļeļeik jejjo allōn̄ ko rej m̧ootļo̧k! Ewi wāween ad jelm̧ae jim̧or kanaan kein rekabūrom̧ōjm̧ōj im aiboojoj eo kōnono kaki kōn raan kein ad? Irooj ekar jiron̄ kōj ekōjkan im ļam waan, ak bwilōn̄, lōke: “Eļan̄n̄e kom̧ij pojak kom̧ jamin mijak.” 7
Ej juon kōjeram̧m̧an! Ej juon iaan ko me remaron̄ lukkuun ukōt wāween ad kalimjōk ilju im jekļaj. Ikar ron̄ juon naan in kam̧ool em̧wilaļ an kōrā kwaļo̧k būruwōn bwe ajedeed in nan̄inmej eo, koba ippān juon m̧akūtkūt in laļ ilo Salt Lake Valley, ekar jipan̄ e kile bwe ekar pojak āinwōt an ļōmņak ekar. Ke ikar kajjitōk eļan̄n̄e ekar kōnono kōn kakwoņkwoņ m̧ōn̄ā ak naan in kam̧ool eo an, ekar ettōn̄ im ba, “Aaet!”
Eļan̄n̄e m̧aanjābpopo ej kii eo n̄an dāpij wōt tōre in bōk eddo im ilju im jekļaj eo ad kōn tōmak, ewi wāween ad maron̄ em̧m̧an ad m̧aanjābpopo?
N̄oul iiō ko, rikanaan ro an Irooj rekar rōjan̄ kōj n̄an kakwōņkwōņ m̧ōn̄ā, aibōj, im jāān ilo jikin kakwōņkwōņ ko n̄an juon iien aikuj. Ajedeed in nan̄inmej in rainin ekar kōkajoorļo̧k māletlet eo an kōkapilōklōk in. I kōketak kom̧ n̄an bōk bun̄tōn ko n̄an maron̄ pojak in aikuj in kanniōk. Ak aaet eļapļo̧k aō inepata kōn m̧aanjābpopo eo ami ilo jetōb im en̄jake.
Ilo wāween in, jemaron̄ in ekkatak eļap jān Kiaptin Moronai. Āinwōt juon jeban ritariņae ro an RiNipai, ekar jelm̧ae jum̧ae ko rekajoor me rekar kajoorļo̧k, ļapļo̧k ilo oran, im nana ļo̧k. Kōn menin, Moronai ekar kōpooje armej ro an ilo wāween ko jilu raorōk.
Juon, ekar jipan̄ er kōm̧m̧ani jikin ko me remaron̄ lo kōjparok ie—“jikin kone ko” ekar ņaetaer. 8 Ruo, ekar kōpooj “koļmānļo̧kjeņ ko an armej ro n̄an m̧ool n̄an Irooj.” 9 Im jilu, ekar jab bōjrak in kōpooje armej ro an—ilo ānbwin ak jetōb. 10 Jen ļōmņak kōn pedped in katak kein jilu.
Pedped in Katak Juon: Kōm̧m̧ane Jikin Kone ko
Moronai ekar kōkajoorļo̧k aolep bukwōn ko an Rinipai ro kōn kom̧laļ ko, em̧ ko, im waaļ ko. 11 Ke Rileman ro rekar itok ņae er, rekar “bwilōn̄ eļap, kōnke wāween katakin ko an Moronai ilo kōpooje jikin kone ko aer“ 12
Ejja āinwōt, ilo an ko̧kkure ko waļo̧k ipeļaakid, jej aikuj in kōm̧m̧ane jikin ko me kōj jej lo kōjparok ie, jim̧or ilo ānbwin im jetōb. N̄e m̧weo im̧ōm̧ ej juon jikin tōmak—ijo me Jetōb ko rej jokwe ie—m̧weo imōm̧ ej erom̧ jikin eo kein kajuon an likōbpejn̄ak.
Barāinwōt, stake ko an Zaion rej juon “jikin kone jān ļan̄ ko” 13 kōnke jikin kein rej tōl jān ro rej kabwijer kii ko an priesthood im kōjerbal mālim eo an priesthood. Ilo am̧ wōnm̧aanļo̧k im ļoor kapilōk in an ro Irooj ekar kōmālim eok n̄an tōl eo, kwonaaj en̄jake am̧ pād ilo kōjparok eļapļo̧k.
Tampeļ eo—m̧weo im̧ōn Irooj—ej jikin kone ejjeļo̧k āinwōt. Ijeņ, kom̧ kōrā ro jatu im jeiū rej bōk mennin letok kwojarjar eo ippān kajoor in priesthood kōn bujen ko an priesthood rekwojarjar kwoj kōm̧m̧ani. 14 Ijeņ, baam̧le ko am̧ rej liāp n̄an indeeo. Men̄e ilo iiō in, n̄e deļo̧n̄e tampeļ ko ad ewōr jon̄an, mennin letok kwojarjar eo am̧ ej lewaj n̄an kom̧ kajoor eo an Anij ilo am̧ kauteeje bujen ko am̧ Ippān.
Āinwōt baj ba, juon jikin kone ej jabdewōt jikin komaron̄ en̄jake an Jetōb Kwojarjar eo im ej tōl jān E. 15 N̄e Jetōb Kwojarjar eo ej pād ippem, komaron̄ katakin m̧ool eo, aaet n̄e ej jutak kake n̄an leļo̧k meļeļe ko. Im ilo am̧ kejōkļo̧kjeņ kōn kajjitōk kein raorōk kōn gospel eo ilo juon jikin bōk m̧adenļo̧k.
Ij karuwaineneik kom̧, kōrā ro jeiū im jatū, n̄an kōm̧m̧ane juon em̧ me ej juon jikin kone. Im ij kōkāāle kajjitōk in aō n̄an kom̧ n̄an kōļapļo̧k ami meļeļe kōn kajoor in priesthood im bujen ko an tampeļ im kōjeraam̧m̧an ko. An lōn̄ jikin kone n̄an kom̧ eo me komaron̄ kone enaaj jipan̄ kom̧ jelm̧ae ilju im jekļaj eo kōn tōmak.
Pedped in Katak Ruo: Kōpooj Kōļmenļo̧kjeņ eo Ami n̄an Mool n̄an Anij
Jekar bōk eddo in juon būrojāāk eļap n̄an lem̧aanļo̧k mour im maron̄ Salt Lake Temple.
Jet rekar kajjitōk aikuj in n̄an bōk jon̄ak ko retōr jān jon̄an. Ijoke, ke Salt Lake Valley ekar jorrāān jān juon m̧akūtkūt in 5.7-magnitude jinoin kar iiō in, tampeļ in erūtto ekar lukkuun m̧akūtkūt jon̄an jilel eo an statue eo an enjeļ Moronai ekar wōtlo̧k! 15
Ejja āinwōt pedped eo an Salt Lake Tampeļ bōlen aikuj in kajoor n̄an jutak ņan ļan̄ ko, pedped ko ilo jetōb rej aikuj in pen. Innām, n̄e m̧akūtkūt in laļ ko rej den̄ōt mour ko ad, jemaron̄ jutak n̄an “pen im dim” kōnke tōmak eo ami. 17
Irooj ekar katakin kōj n̄an kōļapļo̧k ad tōmak ilo ad kappukot “jeļā, aaet jān katak im barāinwōt jān tōmak.” 18 Jej bōk kōkajoorļo̧k in tōmak eo ad ilo Jisōs Kraist ilo ad kajjieon̄ kōjparoki kien ko An im “keememej E iien otemjej.” 19 Eļapļo̧k, ad tōmak ej ļapļo̧k aolep iien jej kōjerbal tōmak eo ad ilo E. En̄in ej ta meļeļein katak jān tōmak.
N̄an waanjon̄ak, kajjojo iien ej wōr ad tōmak n̄an pokake kakien ko an Anij—aaet men̄e meļeļe ko rebun̄bun̄ rej kajejtokjeņ kōj—ak kajjojo iien jej jenliklik jān kam̧ōņōņō eo ak wāween ļōmņak eo me kōjeraam̧m̧an bujen eo rube, jej kōjerbal tōmak eo ad, ilo juon wāween ej kōļapļo̧k tōmak eo ad.
Eļapļo̧k, jejjo men ko rej kalōk eļapļo̧k tōmak jān an waļo̧k wōt ilo Bok in Mormon eo. Ejjeļo̧k bar juon bok ej kam̧ool kōn Jisōs Kraist kōn kain kajoor im alikkar rot in. Rikanaan ro an, āinwōt kar im̧we jān Irooj, ekar loe raan kein ad im kar kālet katak ko im m̧ool ko renaaj jipan̄ kōj eļaptata. Bok in Mormon eo ej ad peba in tōl n̄an maron̄ mour ilo raan ko āliktata.
Aaet, jikin kone eo ad eļaptata ej itok ilo ad leļo̧k kōj make n̄an Jemedwōj Ilan̄ im Jisōs Kraist! Mour eļan̄n̄e ejjeļo̧k Anij ej juon mour eobrak kōn mijak. Mour eļan̄n̄e ewōr Anij ej juon mour eobrak kōn aenōm̧m̧an. En̄in ej unin an kōjeraam̧m̧an ko ilo jetōb itok n̄an ro rej tiljek. Bōk revelesōn ko ad make ej juon iaan kōjeraam̧m̧an ko reļļaptata.
Irooj ekar kallim̧ur bwe eļan̄n̄e jenaaj kajjitōk, jemaron̄ bōk “revelesōn ioon revelesōn.” 20 Ij kallim̧ur bwe ilo ami kōļapļo̧k maron̄ eo ami n̄an bōk revelesōn, Irooj enaaj kōjeraam̧m̧an kom̧ kōn tōl eo eļapļo̧k n̄an mour eo am̧ im mennin leļo̧k rellōn̄ an Jetōb eo.
Pedped in Katak Jilu: Jamin Bōjrak Maanjabpopo
Aaet n̄e men ko rej em̧m̧an, Kiaptin Moronai ekar wōnm̧aanļo̧k in kōpooj armej ro an. Ej jāmin bōjrak. Ej jāmin ju būruwōn.
Rikapo eo ej jāmin bōjrak an jum̧ae. Kōn menin, jej jab maron̄ bōjrak jān m̧aanjābpopo! An ļapļo̧k ad un̄n̄are peid jej—ilo ānbwin, en̄jake, im jetōb—jej m̧aanjābpopoļo̧k n̄an kakkure ko rekōtare an Setan.
Kōrā eo jeiū im jatū, kom̧ij kapāāl ilo kōm̧m̧an jikin kone ko n̄an kom̧ make im ro kom̧ij iakwe er. Eļapļo̧k, ewōr ippemi juon mennin letok ekwojarjar me ej kōmaron̄ ami kalōk tōmak ilo ro jet ilo wāween ko rekajoor. 21 Im kom̧in jab bōjrak. Kom̧ ar kwaļo̧ke bar juon alen ilo iiō in.
Jouj, wōnm̧aanļo̧k wōt! Ami tiljek ilo tōlarōke m̧weo im̧ōm̧i im kajutak tōmak ilo būruwōn ro kwoj iakwe enaaj menin nōbar eo m̧admōde n̄an epepen ko rej itok.
Kōrā ro jeiū im jatū, eļap ijo ippād n̄an reim̧aanļo̧k n̄ani! Irooj ekar likūti kom̧ ijin rainin kōnke Ekar jeļā bwe kom̧ ewōr ami maron̄ n̄an kōm̧akūtkūti meļeļe ko reppen an m̧ōttan ko āliktata an raan kein āliktata. Ekar jeļā bwe kom̧ naaj maron̄ jepjep menwami kōn karbab eo an jerbal in An im maron̄ kōņaan in jipan̄ bōk m̧aantak.
Ijjab bar bwe raan ko im̧aan renaaj pidodo, ak ij kallim̧uri kom̧ bwe ilju im jekļa enaaj maron̄ aiboojoj n̄an ro rej m̧aanjābpopo im ro rej wōnm̧aanļo̧k im m̧aanjābpopo n̄an erom̧ kein jerbal ro ilo pā ko pein Irooj.
Ro jeiū im jatū rejitōn bōro, jen jab baj nikniki wōt ilo iien in. Jen jelm̧ae ilju im jekļaj kōn tōmak! Iien ko rōkapokpok rej iien ko rem̧m̧an n̄an ad eddōkļo̧k ilo jetōb. Rej iien ko n̄e kareel eo ad emaron̄ in aikuj eļapļo̧k depļo̧ke jān iien ko remeļak.
Ij kallim̧ur bwe ilo ad kōm̧m̧ane jikin kone ko, kōpooje ļōmņak ko ad n̄an maron̄ m̧ool n̄an Anij, im jāmin bōjrak in m̧aanjābpopo, Anij enaaj kōjeraam̧m̧an kōj. E enaaj “aaet, jon̄an bwe E [naaj] kōnono aenōm̧m̧an n̄an jetōb ko am, im [naaj] letok n̄an kōm eļap tōmak, im [maron̄] kōm̧m̧an bwe kōmin kōjatdikdik kōn lo̧mo̧o̧ren eo am ilo E.” 22
Ilo ami m̧aanjābpopo n̄an jelm̧ae ilju im jekļaj eo kōn tōmak, kallim̧ur kein renaaj ami! Ij lukkuun kam̧ool, kōn aō iakwe n̄an kom̧, im aō lōke ilo kom̧, ilo etan ekwojarjar Jisōs Kraist, amen.