Kōtļo̧k Bwe En Wāppen an Kijenmeje Jerbal eo, im Likūt E Menin Lan̄lōn̄!
N̄e jej kōjerbal kijenmej, tōmak eo ad ej ļapļo̧k. Ilo an tōmak eo ad ļapļo̧k, lan̄lōn̄ eo ad ej barāinwōt.
Ruo iiō ko rem̧ootļo̧k, ļaddik eo ediktata jatū, Chad, em̧ōj an diwōjļo̧k n̄an rōn̄ōļ eo. An em̧m̧akūtļo̧k n̄an turājet eo ilo rōn̄ōļ eo ekar rube būruwōn kōrā eo pāleen im ej jatū, Stephanie, ajri ruo reddik nejin, Braden im Bella, barāinwōt aolep ro jet ilo baam̧le eo. Jekar loe kaenōm̧m̧an ilo naan ko an Elder Neil L. Andersen ilo kweilo̧k eo eļap wiik eo m̧okta jān an Chad kar mej: “Ilo mālijjon̄ ko an laļ in reļļap, kijenmej bun̄ m̧aanļo̧k, im kajoor in kemour eo an Rilo̧mo̧o̧r eo enaaj bōkwaj n̄an kom̧ meram, meļeļe, aenōm̧m̧an, im kōjatdikdik.” (“Wounded,” Liaona, Nov. 2018, 85).
Ewōr ad tōmak ilo Jisōs Kraist, jej jeļā bwe jenaaj kobaļo̧k ippān Chad bar juon alen, ak ad luuji an pād ippād ekōmettak! Elōn̄ ro em̧ōj aer luuji ro rejitōn bōro ippāer. Epen menin bwe jen kijenmej im kōttar iien eo jenaaj bar ioon doon.
Juon iiō ālkin an kar mej, kōm kar en̄jake juon kōto̧ ekilmej ej pinej kōm̧. Kōm̧ kar pukot kōjparok ilo ekkatak jeje ko am rekwojarjar, jar kōn eļapļk en̄jake ko, im etal n̄an tampeļ eo emakijkijļo̧k. Naan kein jān al in ej bōk en̄jake ko am ilo iien in: “Raan eo ke ej joraanļo̧k, laļ in ej ruj, kōdo̧ in bon̄ in maron̄ eo rej em̧m̧akūtļo̧k” (“The Day Dawn Is Breaking,” Hymns, no. 52).
Baam̧le eo am ekar ļōmņak bwe 2020 enaaj juon iiō in ijjino ekāāl. Kōm kar ekkatak katak ko an Itok, Ļoor Eō katak eo ilo bok in Kaliim̧ur Ekāāl jān Jemes ilo Nobōm̧ba in 2019 eo iien eo juon unin kōnono ekar make waļo̧k n̄an kōm. Jemes, jebta 1, eoon 2 ej kōnono, “Ro jatū, kom̧win likūt e men in lan̄lōn̄ otemjej n̄e mālejjon̄ kajju wāweir rej kōļ kom̧ (Joseph Smith Translation, Jemes 1:2 [in Jemes 1:2, footnote a]). Ilo am kōņaan kōppeļļo̧k juon iiō ekāāl, juon jon̄oul iiō kāāl, kōn lan̄lōn̄, kōm̧ kar pepe bwe ilo 2020 kōm̧ naaj “likūt e men in lan̄lōn̄.” Ekar kajoor am en̄jake kake bwe Kūrijm̧ōj eo ļo̧k kōm kar leļo̧k menin leļo̧k ko n̄an ro jeim im jatim jiln̄ūj ko me raar ba ilo letal ko remeej “Likūt E Men In Lan̄lōn̄.” Iiō in 2020 em̧ool enaaj juon iiō in lan̄lōn̄ im lem̧ōņōņō.
Ekwe, en̄in jej pād ilo—2020 ijjelo̧k ekar bōktok ajedeed in COVID-19 ipeļaakin laļ in, wāween kien kien im pejnej rejjab bōjrak, elōn̄ļo̧k jorrāān ko waļo̧k jān laļ, apan̄ ko kōn jeraam̧m̧an an juon laļ. Jemedwōj Ilan̄ emaron̄ kōtļo̧k ad iien n̄an kejōkļo̧kjeņ im pukot an meļeļe in kijenmej im kāālet eo ad jej kile n̄an kāālet lan̄lōn̄.
Bok in Jemed jān iien eo ekar letok n̄an kōm̧ juon meļeļe ekāāl. Jemes, jebta 1, eoon 3 im 4 ej wōnm̧aanļo̧k wōt:
“Jeļā menin, bwe kajjieon̄e tōmak eo am̧ ebōk kijenmej.
“A en weeppān an kijenmej jerbal, bwe kom̧win weeppān wōt im iiō im enjeļo̧k ami aikuj.”
Ilo kijejeto ko ad n̄an pukot lan̄lōn̄ ilo ilubwilijin mālijjon̄ ko ad, jekar meļo̧kļo̧k bwe wōr kijenmej ej kii eo n̄an kōtļo̧k bwe mālijjon̄ kein ren jerbal n̄an em̧m̧an eo ad.
Kiin̄ Benjamin ekar katakin kōj n̄an likūtļo̧k armej eo ilo piktokin im erom̧ “juon erikwōjarjar kōn pinmuur eo an Kraist Irooj, im erom āinwōt juon fajri, ettā, ineem̧m̧an, ettā bōro, kem̧m̧aanwa, obrak kōn iakwe, m̧ōņōņō in ajeļo̧k e n̄an aolep men” (Mosaia 3:19).
Jebta 6 in Preach My Gospel ej katakin m̧wil ko raorōk an Kraist me jemaron̄ in bōke: “Kijenmej ej maron̄ eo n̄an nikniki rum̧wijļo̧k eo, jorrāān eo, jum̧ae eo, ak en̄taan ilo ejjeļo̧k illu, kūtōtō, ak an̄ļape juon men. Ej maron̄ eo n̄an kōm̧m̧ane ankilaan Anij im errā kōn iien eo An. N̄e jej kijenmej, kwoj dāpij wōt kajoor in kipel eo im ko me rej maron̄ jelm̧ae wāween eo epen im kōjatdikdik” ( Preach My Gospel: A Guide to Missionary Service, rev. ed. [2019], 126).
Jerbal eo ewāppen an kijenmej emaron̄ barāinwōt kōmeļeļeiki ilo mour eo an juon iaan rijilōk ro an Kraist etto, Saimōn armej in Canaan eo. Zealots rekar juon kūru in Riju ro rekajoor rekar jum̧ae kien eo an Rirom. M̧akūtkūt ko an Zealot rekar rie ilo kōnono kakkure ņan Rirom, rikōnono ro aer rej Rijew ro, im Risadducees ro ilo aer rubrubi m̧weiū ko raorōk an armej im kobaļo̧k ilo m̧akūtkūt ko jet n̄an jipan̄ kōttōbar eo aer (lale Encyclopedia Britannica, “Zealot,” britannica.com). Saimon armej in Canaan eo ekar juon Zealot (lale Luk 6:15). Pija in ilo kōļmenļo̧kjeņ eo am̧ an Saimōn kajjieon̄ in kareel im kipel Rilo̧mo̧o̧r eo bwe en bōk kiin m̧anm̧an armej ippān, tōl juon kūrub in ritariņae, ak kōm̧m̧ane juon jorrāān ilo Jerusalam. Jisōs eaar katakin:
“Em̧ōņōņō ro rej rittā bōro, bwe renaaj jolōt e laļ. …
“Em̧ōņōņō ro rej tūriam̧okake, bwe renaaj bōk tūriam̧o. …
“Em̧ōņōņō ro rej kōm̧m̧an aenōm̧m̧an: bwe naaj ņa etaer ro nejin Anij” (Matu 5:5, 7, 9).
Saimōn emaron̄ kar kauteej im katak ko an kōn itok limo im jeļā, ak jeje ko rekwojarjar rej kwaļo̧k bwe jān kareel eo ekajoor im waanjon̄ak eo an Rilo̧mo̧o̧r eo, jibadbad eo an ekar oktak. An rikalooran Kraist ekar erom̧ jibadbad eo ioļaptata in kijejeto in mour eo an.
Ilo ad kōm̧m̧an im kōjparok bujen ko ippān Anij, Rilo̧mo̧o̧r eo emaron̄ jipan̄ kōj n̄an “bar ļotak; aaet, ļotak jān Anij, boktak jān jekjek in cļōn̄ im wōtlo̧k eo aer, n̄an jekjek eo ejim̧we, im bōk lo̧mo̧o̧ren jān Anij, im erom m̧aan im kōrā ro nejin” (Mosaia 27:25).
Iaan aolep riiaio ro rōbanban, kabun̄ ko, im kijejeto in jerbal ko an kien ko, kōm̧m̧an bwe rikaļooren Jisōs Kraist en erom̧ iaio eo ad eļap im eaorōk ej ekkejeltok ippān juon doulul. “Bwe ijo m̧weiōm̧ ej pād, barāinwōt būruwōm̧ enaaj pād ie” (Matu 6:21). Jen barāinwōt jab meļo̧kļo̧k, aaet ālkin an kar rijilōk ro retiljek “kōm̧anm̧an ankilaan Anij,” er “[rekar] aikuj kijenmej” (Hibru 10:36).
Āinwōt kajjieon̄ tōmak eo ad en jerbale kijenmej ilo kōj, n̄e jej kōjerbal kijenmej, tōmak eo ad ej ļapļo̧k. Ilo an tōmak eo ad ļapļo̧k, lan̄lōn̄ eo ad ej barāinwōt.
M̧aaj eo ļo̧k, leddik eo nejūm̧ kein karuo, Emma, āinwōt elōn̄ mijenede ro ilo Kabun̄ in, ekar pād ilo juon iien makeļo̧k iaan. Elōn̄ mijenede ro rekar ro̧o̧ltok n̄an kapijuknen. Elōn̄ mijenede ro rekar kōttar ia ko rej bar kūr er n̄ani. Elōn̄ rekar jab bōk kōjeraam̧m̧an in tampeļ ko aer m̧okta jān aer em̧m̧akūtļo̧k n̄an jikin jerbal ko aer. Kom̧ em̧m̧ool, elder ro im sister ro. Kōmij iakwe kom̧.
Emma im kōmpānien eo an ilo Netherland rekar aer kōmālij ko ekar ļap aer jerbal ilo wiik ko jinoin—rekar jelm̧ae apan̄ ko reppen rekōm̧m̧an jan̄ ilo elōn̄ wāween ko. Kōn wōt iien ko rem̧m̧an rekadu n̄an jelm̧ae armej im jabwe n̄an pād inamōj, Emma ekar pedped wōt ioon kajoor eo eļap an Anij. Kōm̧ kar jar ippān ilo online im kajjitōk ewi wāween am maron̄ jipan̄. Ekar kajjitōk ippem n̄an onļain ippān ro m̧ōttan me ekar katakin er online!
Baam̧le eo am ekar jino onļain, juon illo̧k juon, ippān ro m̧ōttan Emma ilo Netherlands. Kōm̧ kar kajjitōk ippāer bwe ren kobatok ippām̧ kajjojo wiik, onļain, kaklipļo̧k ekkatak eo an baam̧le ilo Itok, Ļoor Eō. Floor, Laura, Renske, Freek, Benjamin, Stal, im Muhammad aolep rekar erom̧ ro m̧ōttam̧. Jet iaan ro m̧ōttam̧ jān Netherlands rekar deļo̧n̄ “ilo akōjām eo erānin̄” (3 Nipai 14:13). Ro jet kar kwaļo̧k n̄an er “iaļ eo, im aidik in akōjām eo, ijo rej aikuj deļo̧n̄” (2 Nipai 31:9). Er rej ro jeid im jatid ilo Kraist. Kajjojo wiik kōm̧ij “likūt e men in lan̄lōn̄” ilo am jerbal ippān doon ilo eddōkļo̧k eo am ilo iaļen bujen eo.
Jej kōm̧m̧an bwe“en weeppān an kijenmej jerbal” (Jemes 1:4) ilo am jab maron̄ ioon doon ilo nemein armej āinwōt baam̧le ko an ward n̄an juon season. Ak jemaron̄ likūt e men in lan̄lōn̄ an eddōkļo̧k ilo tōmak an baam̧le eo am ilo kōjerbal technology ko rekāāl im Itok, Ļoor Eō katak jān Bok in Mormon eo.
Emakijkij im jejjetin kijejeto ko ami ilo jerbal in—men̄e ilo tōre kein kom̧ij en̄jake bwe ejjab lukkuun ļap ami tōprak—enaaj ukot mour ko ami, mour an baam̧le ko ami, im laļ in” (“Go Forward in Faith,” Liaona, Māe 2020, 114).
Ijo me jej kōm̧m̧ane bujen ko rekwojarjar ippān Anij—ilo tampeļ eo—ekilōk ium̧win jidik iien. Ijo me jej kōjparok bujen ko rekwojarjar ippān Anij—ilo m̧weo—eppeļļo̧k. Ewōr ad juon iien em̧m̧an ilo m̧weo n̄an ekkatak im kejōkļo̧kjeņ kōn aiboojoj eo em̧m̧an an bujen ko an tampeļ eo. Men̄e ilo ad jab maron̄ deļo̧n̄e jikin in ekwojarjar “bōro ko … renaaj kanooj m̧ōņōņō āinwōt waļo̧k in akōjeraam̧m̧an ko me naaj lutōkleplepļo̧k,” (Katak im Bujen Ko 110:9).
Elōn̄ rekar luuji jerbal ko aer; ro jet rekar luuji iien ko rem̧m̧an. Jej lan̄lōn̄, ijoke, iturājet in Būreejtōn Nelson, eo ekar ba: “Joortak in jitlo̧k eo letok kōn jipan̄ jān membōr ro ad ekar lukkuun kōļapļo̧k, barāinwōt mennin letok ko kōn jipan̄ n̄an jāān ko an humanitary. … Ippān doon jenaaj anjo̧ jān iien in epen. Irooj enaaj kōjeraam̧m̧an kom̧ ilo ami wōnm̧aanļok im kōjeraam̧m̧an ro jet”(Russell M. Nelson’s Facebook page, post from Aug. 16, 2020, facebook.com/russell.m.nelson).
“Koṃwin peran” ej juon kien jān Irooj, jab n̄an mijak (Matu 14:27).
Jet iien ejjeļo̧k aer kijenmej n̄e jej ļōmņak jej “kōm̧m̧ane aolep men ejim̧we ke” im jej jāmin wōt bōk kōjeraam̧m̧an eo jej kōņaan. Inōk ekar etetal ippān Anij ium̧win 365 iiō ko m̧okta jān an e im armej ro an oktak. Jilu bukwi im jiljinn̄oul ļalem iiō kajjieon̄ kōm̧m̧ani aolep men ko rejim̧we, im innān ekar waļo̧k! (Lale Katak im Bujen Ko 107:49.)
Jako eo an ļaddik eo jatū Chad ekar itok jejjo āllōn̄ ko ālkin kar kōtļok kōm̧ jān am tōl Utah Ogden Mission. Ekar kabwilōn̄lōn̄ bwe iien eo kōm̧ kar jokwe ilo Tūrōk in California, jān aolepān 417 mijen ko, kōm maron̄ kar jerbal ilo iiō 2015, kōm̧ kar bōk kūr n̄an tūiiōn̄ in Utah. Mission home eo ekar 30 minit ettōr jān m̧weo im̧ōn Chad. Kāānjōr eo an Chad ekar jerbale jān taktō ro ālkin am kar bōk jerbal eo n̄an mijen eo am. Aaet men̄e ilo jekjek ko kōm̧ij kajjieon̄, kōm̧ ar jeļā bwe Jemedwōj Ilan̄ ekar ļōmņak kōn kōm̧ im ej jipan̄ kōm̧ loe lan̄lōn̄.
Ij kam̧ool kōn pinmuur eo, ko̧kwojarjar, ettā, im kajoor eo elan̄lōn̄ an Rilo̧mo̧o̧r Jisōs Kraist. Ij kam̧m̧ool bwe n̄e jej jar n̄an Jemedwōj Ilan̄ ilo etan Jisōs, Enaaj uwaake kōj. Ij kam̧ool bwe ilo ad ron̄jake, eo̧ron̄, im keron̄jake ainikien Irooj im rikanaan eo em̧our, Būreejtōn Russell M. Nelson, jejjab maron̄ “kōtļo̧k bwe en wāppen an kijenmeje” im “jerbal eo likūt e men in lan̄lōn̄.” Ilo etan Jisōs Kraist, Amen.