Dāpij Oktak eo
Kōn Jisōs Kraist, ej letok kajoor n̄an kōj n̄an kōm̧m̧ani oktak ko ejjeļo̧k jem̧ļo̧kier. Ilo ad ettā im elļo̧k n̄an E, enaaj kaddōkļo̧k maron̄ eo ad n̄an oktak.
Sister ro, ej juon iien m̧ōņōņō n̄an pād ippemi.
Pijaikļo̧k juon armej ej etal n̄an m̧ōn wia n̄an wiaki juon m̧weik. Eļan̄n̄e enaaj kōļļaik kajier eo eļapļo̧k jān jon̄an wōnen m̧weik eo, kajier eo enaaj leļo̧k an bwe.
Kiin̄ Benjamin ekar katakin armej ro an ilo Amedka jem̧aan kōn kōjeraam̧m̧an ko reļļap jej bōki jān ad Rilo̧moor, Jisōs Kraist. Eaar kōm̧anm̧an lan̄, laļ im men otemjeļo̧k raibojoj jej mōņōņō kaki. 1 Kōn iakwe in Pinmuur eo An, Ej kwaļo̧k juon iaļ n̄an kōj n̄an lo̧mo̧o̧r jān jerawiwi im mej. 2 Ilo ad kwaļo̧k ad kam̧oolol n̄an e ilo ad niknik im mour kōn kien ko An, ej m̧ōkaj im kōjeram̧m̧an kōj, kōtļo̧k bwe mūri ko ad rein ped Ippen.
Ekar letok n̄an kōj eļap, eļapļo̧k jān wōnen ta eo jemaron̄ karool e n̄an E. Kiiō, ta eo jemaron̄ leļo̧k n̄an E, eo ekar kōļļā wōnen jerawiwi ko ad? Jemaron̄ leļo̧k n̄an E oktak. Jemaron̄ leļo̧k n̄an E ad oktak. Emaron̄ oktak in ļōmņak, oktak in imenene, ak juon oktak in iaļ eo jej jibarōke. N̄an ukōtļo̧k kōn jon̄an eo ekar kōllā wonen n̄an kōj kajojo, Irooj ej kajjitōk ipped n̄an oktak in buruer. Oktak eo ej kajjitōk ippād kake ejjab n̄an em̧m̧an eo An, ak n̄an em̧m̧an eo ad. Kiiō, āinwōt riwia eo ilo mōn wia eo ekar bōke bwe eo an jej kōroolļo̧k, Rilo̧mo̧o̧r in jouj eo ad ej kajjitōk ipped n̄an bōke wōt oktak eo.
Ālkin ron̄jake naan ko kōnono jān Kiin̄ Benjamin, armej ro an raar lam̧ōj, kwaļo̧k bwe būrueer ekar oktak im ba, “Kōnke Jetōb eo an Irooj Ekajoor Bōtata, eo Eaar jerbali juon oktak ekajoor ilo kōm, … bwe kōmin jab bar itok wōt in kōm̧m̧ani men ko renana, ak kōm̧m̧an em̧m̧an wōt.” 3 Jeje ko rekwojarjar rej jab ba bwe rej kaju erom̧ wāppen, ijeļo̧kin, ikdeelel eo aer n̄an oktak ekar kōm̧m̧an bwe ren em̧akūt. Oktak in būrueer ej melele in bwe n̄an kōtļo̧k m̧wil ko m̧okta an juon em̧m̧aan im kōrā im etartar ilo Jetōb Kwojarjar ilo aer kajeon erōm eļapļo̧k āinwōt Jisōs Kraist.
Būreejtōn Henry B. Eyring ekar katakin: “M̧ool in oktak ej pedped ioon kappukot ilo ejjeļo̧k wōneen ilo tōmak, ippān eļap jerbal im jidik metak. Innem ej Irooj eo enaaj kōtļo̧k … kabūļon̄ļon̄ in karreo im oktak.” 4 Kobaik jerbal eo ad ippān maron̄ eo an Riļo̧moor n̄an kwo oktak kōj, jej erom̧ armej ro rekāāl.
Ke ikar dik, ikar pijaikļo̧k n̄a make ij etetal ilo iaļ eo aō lōn̄ļo̧k, n̄an kōttōpar eo aō n̄an mour indeeo. Kajjojo iien ij kōm̧m̧ane ak ba juon men ebwōd, ij en̄jake aō wōtļo̧k ilo iaļ eo, innem bar jino ial eo aō jān jinoin. Ej āinwōt aō jok ilo juon iaan bo̧k ko ilo juon ikkure an ajri etan Chutes im Ladders eo ej kawōtļak kwe laļ ļo̧k jān lōn̄tata n̄an jinoin tata ilo ikkure eo! Ekar kabweerer! Ak ilo aō kar jino melele kōn katak ko an Kraist 5 im elmen kilen kōjerbali ilo mour eo aō kajojo raan, ikar loe kōjatdikdik.
Jisōs Kraist em̧ōj an letok n̄an kōj wāween ko n̄an wōnm̧aanļo̧k n̄an oktak. Ej karuwaineneik kōj n̄an kōmmālmel tōmak ilo E, eo ej kadeel kōj n̄an ukweļo̧k ——“ eo tōmak im ukeļok ej bōktok juon oktak in bōro.” 6 Ilo ad ukweļo̧k im oktak būruer n̄an E, jebōk eļapļo̧k ikideelel n̄an kōm̧m̧ane im mour kōn bujen ko rekwojarjar. Jej niknik n̄an jemļo̧kin n̄an kōjerbali katak kein ilo mour ko ad im karwainene Irooj n̄an ukōt kōj. Niknik n̄ān jemļo̧kin meļeļe in oktak n̄an indeeo. Imeļeļe kiiō bwe ijjab jino jān jinoin ippān kajojo bwōd ko, ak bwe kōn kajojo kajeon, ij wōnm̧aanļo̧k wōt ilo jerbal eo aō n̄an oktak.
Ewōr juon jantōj ekareel ilo un kōnono eo an Doulul eo an Jiron̄ ro, “Ij jeram̧m̧an kōn menin letok eo an ukweļo̧k im kappukote n̄an em̧m̧anļo̧k kajjojo raan.” 7 Ij jar bwe jen kaorōk menin letok in aibojooj im bwe ewōr ad kōnaan n̄an kappukot oktak. Jet iien oktak ko jej aikuj kōm̧m̧ani rej ped ippān jerawiwiw ko reļļap. Bōtaab ekkā, ad kajjieon̄ n̄an kōkm̧anm̧anļo̧k wōn kōj n̄an juon wōt ippān m̧wil ko an Jisōs Kraist. Kāālet ko ad kajjojo raan enaaj jiban̄ kōj ak kakkure wōnm̧aanļo̧k eo ad. Edik ak edim, kōm̧m̧an oktak enaaj jipan̄ kōj em̧m̧anļo̧k. Lale kwar ebweer. Oktak ej juon jerbal eo ebōk iien. Ij kam̧oolol bwe ilo apan̄ ko n̄an oktak, Irooj ej kijenmej ippād.
Kōn Jisōs Kraist, ej letok kajoor n̄an kōj n̄an kōm̧m̧ani oktak ko ejjeļo̧k jem̧ļo̧kier. Ilo ad ettā im elļo̧k n̄an E, enaaj kaddōkļo̧k maron̄ eo ad n̄an oktak.
Kakobaba ilo ad ajeej kajoor eo an Pinmuur eo an Riļo̧moor, Jetōb Kwojarjar enaaj jipan̄ im tōl kōj ilo ad kate kōj. Emaron̄ jipan̄ kōj jeļā ta oktak ko jej aikuj kōm̧m̧ani. Jemaron̄ barāinwōt loe jipan̄ im rōjan jān kōjeram̧m̧an eo an priesthood, jar, jitļo̧k, im etal n̄an tampel.
Āinwōt, ro uwaan baamle ko jej lōke, ritōl, im ro m̧ōttad remaron̄ jipan̄ ilo ikdeleel eo ad n̄an oktak. Ke ekar ruwalitōk iiō detta, ļaddik eo jeiū, Lee, im n̄a kar bōk am̧ro iien ippān ro m̧ōttam ikkure ilo ra ko ilo wōjke eo an ro rej jokwe itūrūm̧. Ekar lukkuun em̧m̧an ippāmro ippān doon ippān ro m̧ōttam ilo ellōr in wōjke eo. Juon raan, Lee ekar wōtļo̧k jān wōjke in im pūlak pein. Ilo an kar pūlak pein ekar pen n̄an an maron̄ tallōne wōjke eo ippān make. Bōtaab mour eo ilo wōjke eo ekar jab āinwōt jinoin ilo an jab kar ped ijo. Jet iaamean ekar dapiji jān lik ilo an ro jet kanōke pā eo ejjab pulak, im ilo ejjab lap jerbal, Lee ekar bar rooltok n̄an wojke eo. Pein ekar pūlak wōt, ak ekar pād ippān bar juon alen ilo am̧ mōņōņō ippān ro m̧ōttam ilo an kammo̧mo̧ik pein.
Ekkā aō kijor ļōmņak kōn en̄jake eo aō ilo aō kar ikkure ilo wōjke in āinwōt iaan m̧akūtkūt ko am ilo gospel eo an Jisōs Kraist. Ilo ellōr in ra ko an gospel in, jej lemōņōņō kōn elōn̄ kōjeram̧m̧ān ko ej itok ippān kallim̧ur ko ad. Jet remaron̄ kar wōtlo̧k jān kōjpāroke eo an kallim̧ur ko aer im aikuj jipan̄ eo ad n̄an bar tallōn̄e kōjpāroke eo an ra ko an gospel in. Emaron̄ nej pen n̄an er n̄an rool tok make iaar. Jemaron̄ ke kakwonkwon e jidik ijo im lelōn̄tak jidrik ijiō n̄an jipan̄ er ilo aer lemōņōņō ilo mottā in ad?
Eļan̄n̄e kwoj en̄taan kōn juon jorāān in wōtlo̧k, jouj kōtļo̧k bwe ro jet ren jipan̄ eok rool n̄an kallim̧ur ko am̧ im kōjeraam̧m̧an ko rej lewaji. Rilo̧mo̧o̧r eo emaron jipan̄ kōmour im ukōt eok ilo am̧ jepool jān ro rej iakwe eok.
Ekkā ao ioone ro mōtta etto aō bar lo er ilo elōn̄ iiō ko. Jet iien rej ba, “Āinwōt kwojan̄in de oktak!” Kajjojo iien ij ron̄ men in, ij ettōn̄ dikdik, kōnke ij kōjatdikdrik em̧ōj aō oktak ilo iiō ko rem̧ootļo̧k. Ij kōjatdikdik ikar oktak jān inne! Ij kōjatdikdik eļapļo̧k jidrik aō jouj, dikļo̧k aō ekajet, im eļapļo̧k iakwe. Ij kōjatdikdik emōkajļo̧k aō uwaak n̄an aikuj ko an ro jet, im ij kōjatdikdik ke imaron̄ kijenmejļo̧k jidrik.
Em̧m̧an ippa etetal aitok ilo tōl ko tūrin m̧weo im̧ō. Ekkā, an dekā jidik ko rōļo̧k ilo jori eo aō ilo aō etetal ilo iaļ eo. Ejjab to, ij pōjrak im juļo̧k jān lowaan jori eo aō. Ak ekabwilōn̄ eō kōn ewi to in aō kōtlo̧k bwe metak in en pād ippa m̧okta jān aō pojrak im joļo̧k jān an abūņōņō.
Ilo ad etetal ilo iaļ in kallim̧ur eo, jet iien jej bōkii dekā ko ilo jori ko ad āinwōt imenene ko renana, jerawiwi, ak nana mwil. Ne emōkajļo̧k ad joļo̧ki jān mour eo ad, enaaj ļapļo̧k mōņōņō ilo ial eo ad ilo mour in.
Jerbale oktak eo ebōk eļap jerbal. Ijjab kōņaan pijaikļo̧k aō pojrak ilo iaļ eo ļo̧k ilo aō nej bar kaneke jori ko aō im dekā ko rekōmetak im kabōņōņō me ikar joļo̧ke. Ijjab kōņaan kar kōm̧m̧ane men in eļap jān juon babbub eo me enaaj kāālet n̄an oktak n̄an ānbwinin eo m̧okta.
Ij kam̧ool bwe kōn Jisōs Kraist, jemaron̄ kajieon̄ oktak. Jemaron̄ kakwonkwon e iminene ko ad, kajim̧we ļōmņak ko ad, im kōkm̧anm̧anļo̧k wōn kōj n̄an erom̧ āinwōt E. Im kōn jipan̄ eo An, jemaron dāpij oktak eo. Ilo etan Jisōs Kraist, amen.