M̧anit eo an Kraist
Jemaron̄ kaurōki m̧anit ko ad rem̧m̧antata an laļ in im lukkuun bōk koņaad ilo m̧anit eo ej n̄an indeeo me ej itok jān gospel eo an Jisōs Kraist.
Laļ in ej juon laļ em̧m̧anmōn jej jokwe ie im ajeje, juon kapijuknen n̄an elōn̄ kain armej ro, kajin ko, m̧anit ko, im bwebwenato ko—rej erekrekļo̧k n̄an bukwi laļ ko im taujin kurub ko, kajjojo iaer rem̧weie ilo m̧anit. Armej elōn̄ men ko rej aikuj uteej būruweer kake im kam̧m̧oolol. Men̄e ej juon m̧anit in ekkatak m̧wil—men kein ko im jej jermatmat n̄ani kōn m̧anit ko jej rūttoļo̧k kaki—remaron̄ jerbal āinwōt juon kajoor eļap ilo mour ko ad, emaron̄ barāinwōt, ilo iien ko, erom̧ juon kaban̄ban̄ eļap.
Emaron̄ āinwōt bwe m̧aniteo elukkuun kar ļap kaorōke ilo ad ļōmņak im ilo m̧wilid eo me enej pen n̄an ukōte. En̄in, āliktata, ta eo eļap jej en̄jake im jān men eo jej en̄jake juon kile kadkadid. Emaron̄ erom̧ baj juon kareel eo ekajoor me jemaron̄ in likjab in loe bwe armej rekar kōm̧m̧an m̧ōjņo̧ ak likjab ilo m̧anit ko ad make, m̧akoko in joļo̧k jet iaan imminene ko an ro jemād. Juon kijejeto ilo iminene im m̧anit eo ekar rūttotak kake emaron̄ tōlļo̧k n̄an m̧akoko in bōk m̧anit eo eaorōkļo̧k—jekdoon ļōmņak—kadkad, im m̧wil ko rem̧m̧an an Anij.
Ikar jeļā kajeen juon em̧m̧aan em̧m̧an jet iiō ko rem̧ootļo̧k, eo ekar jipan̄ kōmeļeļeiki pedped in katak in kōn likjab in meļeļe kōn m̧anit. Ikar ioone jino in tata ilo Singapore ke kar jitōn̄ eō n̄an erom̧ rūkaki in loļo̧k m̧ōko n̄an baam̧le eo an. Juon rikaki in kaļōj an kajin Sanskrit im Tamil, ekar lukkuun in itok jān turōk in India. Kōrā eo pāleen eaiboojoj im ļaddik ro ruo nejin rekar membōr in Kabun̄ in, ak e ejjan̄in kar kobatok barāinwōt ron̄jake eļap n̄an katak ko an gospel eo. Ekar m̧ōņōņō kōn wāween eo kōrā eo pāleen im ļaddik ro nejin rekar ejaake im kar rie er ilo aer pād im bōk eddo ko ilo Kabun̄ in.
Ke ikar kajjitōk ippān bwe in katakin e pedped in katak ko an gospel in im kwaļo̧k n̄an e tōmak ko ad ippān, ekar jino m̧akoko. Ekar bōk jidik iien n̄an n̄a bwe in kile etke ekar m̧akoko: ekar en̄jake bwe kōm̧m̧ane wāween in enaaj kōm̧m̧an bwe en erom̧ riwiakake jolet ko an etto, armej ro an, im bwebwenato eo an! N̄an ļōmņak eo an make, enaaj erom̧ eo ej kakkure men otemjej kar ippān, men otemjej baam̧le eo rekar katakin n̄an erom̧, jolet in lāmorān eo an, India. Ium̧win allōn̄ ko tok jet, kōm̧ kar maron̄ kōnono kōn unin kōnono kein. Ikar lukkuun kauteeje (jab bwilōn̄) jān wāween an gospel eo an Jisōs Kraist kar maron̄ kōppeļļo̧k mejān n̄an juon loļo̧kjeņ eo eoktak.
Ilo enan̄in aolep m̧anit ko kōm̧m̧an in armej, ewōr juon men em̧m̧an im nana maron̄ loe ie, men ko remaron̄ kalōk eok im men ko remaron̄ rube eok.
Elōn̄ iaan jorrāān ko an laļ in rej waļo̧k jān ekkeitak ko ikōtaan ļōmņak kein roktak im m̧anit eo ej ejaak jān m̧anit eo aer. Ak enan̄in aolep poktak im jorrāān ko renaaj m̧ōkaj aer jako eļan̄n̄e laļ in enaaj bōke lukkuun manit eo, eo me jej aolep jolete ejjab juon tōre ejjab etto. M̧anit in ej wanlikļo̧k n̄an mour eo ad ilo mour eo m̧okta. Kar m̧anit eo an Adam im Inōk. Ekar m̧anit eo me ekar jutak kōn katak ko an Rilo̧mo̧o̧r eo ilo ioļap in iien, im ej pād n̄an aolep kōrā ro im em̧m̧aan ro bar juon alen ilo raan ko ad. Elukkuun kabwilōn̄lōn̄. Ej men eo eļaptata an aolep m̧anit ko im ej itok jān karōk in m̧ōņōņō eo eļap, karōk jān Anij im rie im bōbrāe jān Kraist. Ej kakobaik ijjelo̧kin rube. Ej kōmour ijjelo̧kin kakkure.
Gospel eo an Jisōs Kraist ej katakin kōj bwe ewōr unin mour in. Ad pād ijin ejjab baj jān juon meļeļe eļap kōn jide ak bōd! Jej pād ijin kōn juon un.
M̧anit in ej dumej ilo naan in kam̧ool eo bwe Jemedwōj Ilan̄ ej mour, bwe em̧ool E ej mour im iakwe kōj kajjojo, kajjojo iaad. Kōj jej An “jerbal im [An] aiboojoj.” 1 Manit in ej rōjan̄ meļeļe eo kōn aorōk in kajjojo. Ejjeļo̧k juon nōbar in jekjek ak kadkad in armej. Kōj jej, ālkin men otemej, jej jem jān jem jati, jetōb ajri ro nejin jemed im jined ilan̄—lukkuun. Ejjeļo̧k kaljōkļo̧k ak “kōj ņae er” ilo ļōmņak ilo men eo eļaptata an aolep m̧anit ko. Kōj jej aolep “kōj.” Kōj jej aolep “er.” Jej tōmak bwe kōj jej eddo im bōk eddo n̄an kōj make, n̄an doon, Kabun̄ in, im laļ in ad. Eddo im bōk eddo rej jon̄ak ko raorōk ilo eddōkļo̧k eo ad.
Iakwe erreo an Kraist, kea eo em̧ool āinwōt Kraist, ej pedped in katak ko an m̧anit in. Jej en̄jake inepata kōn aikuj ko an armej ro ad, ilo kanniōk im jetōb, im m̧akūtkūt ekkar n̄an en̄jake kein. Menin ej joļo̧k kaljōkļo̧k im matōrtōr.
Jej lan̄lōn̄ kōn juon m̧anit in revelesōn, ekar pedped wōt ioon naan an Anij āinwōt an rikanaan ro bōke (im ej jerbal n̄an kōj kajjojo kōn Jetōb Kwojarjar eo). Aolep armej remaron̄ jeļā ankilaan im ļōmņak eo an Anij.
M̧anit in ej bōbrae pedped eo an anemkwoj. Maron̄ eo n̄an kāālet elukkuun aorōk n̄an eddōkļo̧k eo ad im m̧ōņōņō eo ad. Kāālet ilo jim̧we eo eaorōk.
Ej juon m̧anit in ekkatak im katak. Jej pukot jeļāļo̧kjeņ im māletlet im men eo em̧m̧antata ilo men otemjej.
Ej juon m̧anit in tōmak im pokake. Tōmak ilo Jisōs Kraist ej pedped eo jinoin tata an m̧anit eo ad im pokake katak ko An im kien ko ej tōprak eo. Men kein rej kwaļo̧k jeļā eo ad make.
Ej juon m̧anit in jar. Jej tōmak bwe Anij ejjab wōt ron̄jake kōj ak barāinwōt ej jipan̄ kōj.
Ej juon m̧anit in bujen ko im kain̄i ko, jon̄ak in m̧wil ko routeej, kaarmejete, jeorļo̧k bōd im ukweļo̧k, im kea kōn tampeļ in ānbwin ko ad. Aolepān kam̧ool kein rej n̄an kallim̧ur eo ad n̄an Anij.
Ej juon m̧anit ej kien jān priesthood eo, mālim eo n̄an m̧akūtkūt ilo etan Anij, kajoor eo an Anij n̄an kōjeraam̧m̧an ajri ro Nejin. Ej kōkm̧anm̧anļo̧k im kōmaron̄ kajjojo armej n̄an erom̧ armej ro rem̧m̧anļo̧k, ritōl ro, m̧am̧a ro, baba ro, im ro m̧ōttan—im ej ko̧kwojarjar e m̧weo.
Kabwilōn̄lōn̄ eo em̧ool ej pooļe ilo menin, rūttotata in aolep m̧anit, kar kōm̧m̧an jān tōmak ilo Jisōs Kraist, kajoor in priesthood eo, jar, em̧m̧anļo̧k an juon make, oktak eo em̧ool, im jeorļo̧k bōd.
Ej juon m̧anit in jerbal in mijenede. Aorōk in jetōb ko eļap.
Ilo m̧anit eo an Kraist, kōrā ro rej ebbōkak lōn̄ļo̧k n̄an jekjek ko aer rejejjet im indeeo. Rejjab ettāļo̧k jān em̧m̧aan ro, āinwōt ilo elōn̄ m̧anit ko ilo laļ in rainin, ak rej jem̧jerā ko relikio im jon̄an wōt juon ijin im ilo laļ eo ej itok.
M̧anit in ej kōmālim ko̧kwojarjarļo̧k eo an baam̧le. Baam̧le ej iunit eo im̧aantata an indeeo. Wāppen eo an baam̧le ej aorōk an jabdewōt kaarmejete kōnke, āinwōt kar katakin, “ejjeļo̧k bar juon jeraam̧m̧an emaron̄ kōļļāiki likjab eo ilowaan m̧weo.” 2 M̧weo ej ijo im jerbal ko ad rem̧m̧antata rej kōm̧m̧an ie im ijo lem̧ōņōņō eo ad eļaptata ej pād ie.
Ilo m̧anit eo an Kraist, ewōr jibadbad—im jibadbad im tōl eo n̄an indeeo. M̧anit in ej kea kōn men ko raorōk im ejjeļo̧k jem̧ļo̧kier! Ej itok jān gospel eo an Jisōs Kraist, eo ej indeeo, im ej kōmeļeļeik etke, ta im ia eo epād ijo jej pād ie. (Elikio, im likjab.) Kōnke kōn tōprak ko an m̧anit in jān jerbale katak ko an Rilo̧mo̧o̧r eo ad im ej jipan̄ letok juon uno in kōmour eo laļ in ad ej lukkuun in aikuji.
Ej juon kōjeraam̧m̧an n̄an erom̧ m̧ōttan wāween in eļap im uteej an mour! N̄an erom̧ m̧ōttan, manit eo eļaptata an aolep manit ko, enaaj aikuji juon oktak. Rikanaan ro rekar katakin bwe emenin aikuj n̄an likūt itulikid jabdewōt m̧anit ko ad rem̧o̧r ko rejjab jejjet ippān manit eo an Kraist. Ak bwe ejjab meļeļein bwe jej aikuj likūt itulik men otemjej. Rikanaan ro rekar barāinwōt kwaļo̧k bwe jej ruwainene, juon im aolep, n̄an bōktok tōmak eo an im kapāāl ko im jeļāļo̧kjeņ ko—aolep men eo ej em̧m̧an ilo mour ko ad im ilo m̧anit ko ad kajjojo—ippād wōj, im kōtļo̧k bwe Kabun̄ eo en “kobaikļo̧k n̄an e” jān ennaan eo an gospel eo. 3
Kabun̄ eo an Jisōs Kraist im Armej ro Rekwojarjar ilo Raan Ko Āliktata ejjab juon jukjuk in pād in Western ak juon m̧anit in Amedka eo ekabwilōn̄lōn̄. Ej juon kabun̄ ipeļaakin laļ in, āinwōt ekar aolep iien āindein in wōt. Eļapļo̧k jān menin, ej ekwojarjar in lan̄. Membōr ro rekāāl jān peļaakin laļ in rej bōktok karbab eo an, ļap eo an, im kalimomo ilowaan baam̧le eo ej eddōkļo̧k. Armej ro Rekwojarjar aolep jikin rej kōjeraam̧m̧an im kauteej wōt jolet eo aer make, ak kiiō rej barāinwōt m̧ōttan juon eļap an aorōk. M̧anit eo an Kraist ej jipan̄ kōj n̄an loe kōj make āinwōt lukkuun wōn kōj, im n̄e jej loe jān māj in loļo̧kjeņ ko ejjeļo̧k jem̧ļo̧kier, rekar en̄jake kōn wāppen, ej jerbale n̄an kōļapļo̧k maron̄ eo ad n̄an kakūrm̧ool karōk in m̧ōņōņō eo eļap.
Kōn menin ta eo ekar waļo̧k n̄an eo m̧ōtta? Ekwe, ekar ekkatak katak ko im kar kobatok ilo Kabun̄ in. Baam̧le eo an rekar liāp n̄an iien im aolep indeeo ilo Sydney Temple. Ekar joļo̧k jidik—im bōk jibadbad n̄an men otemjej. Ekar loe bwe emaron̄ in wōt kōjeraam̧m̧an bwebwenato eo an, im m̧ōņōņō wōt kōn rūtto ro jibūn im jim̧aan, al ko an im eb ko im jeje ko, m̧ōn̄ā ko kijen, āne eo āneen im armej ro an. Ekar loe bwe ejjeļo̧k jorrāān rej jelet men eo em̧m̧antata ilo m̧anit eo an ilo manit eo eļaptata iaan aolep M̧anit ko. Ekar loe bwe bōktok ta eo ej jejjet ippān m̧ool eo im jim̧we eo jān mour eo an m̧okta n̄an mour eo an ekāāl ej jerbal wōt n̄an kōkōm̧anm̧anļo̧k jem̧jerā eo an ippān Armej ro Rekwojarjar im n̄an jipan̄ kobaik aolep āinwōt juon ilo jukjuk in pād an lan̄.
Jemaron̄, ilo m̧ool, aolep kauteeje m̧anit eo ad em̧m̧antata im maron̄ wōt lukkuun bōk koņaad ilo m̧anit eo etto aer aolep—m̧anit eo jinointata, eļaptata, ejjeļo̧k jem̧ļo̧kin me ej itok jān gospel eo an Jisōs Kraist. Ej juon jolet eo ekabwilōn̄lōn̄ jej aolep jaake ippān doon. Ilo etan Jisōs Kraist, Amen.