Pukōt Lan̄lōn̄ ilo Kraist
Wāween eo em̧m̧antata n̄an lo m̧ōņōņō ilo laļ in ej kobatok ippān Kraist n̄an jipan̄ ro jet.
Irooj ejjab kajjitōk ippān jodikdik ro nejin Priesthood eo an Aaron n̄an kōm̧m̧an aolep men, ak ta eo Ej kajjitōk ej n̄an im̧we.
Jet iiō remootļo̧k, baam̧le eo am̧ eaar dipļo̧ke ta eo elōn̄ baam̧le ko rej iooni ilo laļin. Ļaddik eo nejūm ediktata, Tanner Christian Lund, ekar kāānjōr. Ekar juon armej em̧m̧an, āinwōt ekkā ratimjuon iiō ro. Ekar māletlet im kametōrtōr im, ilo ejja iien eo wōt ekar juon jetōb eaorōk. Ej juon ļaddik bōt im em̧m̧an. Ke ekar dik im aolep raan ekōn kabwilōn̄ kom̧ro kōn jim̧ōr an mālōtļōt im kametōrtōr, kōm̧ kar ļōmņak n̄e erūttoļo̧k enaaj juon rikanaan ak juon rikoot bank. Ijoke, ekar likūt juon kōkaļļe ilo laļ in.
Innām eaar jino nan̄inmej. Ilo iiō ko jilu, taktō ro raar kajjieon̄ in lo̧mo̧o̧ren e, ekoba kōm̧akut ruo ņōņņōņmeej jen diin, ijo im ekar bōk nim̧onia ie, ekōm̧m̧an bwe en pād 10 wiik ilo an kōjerbal akjijen. Ekabwilōn̄lōn̄, bwe ekar mour jidik ium̧win jidik iien, innām kāānjōr eo an eaar bar waļo̧k.
Mokta jen an jako, kāānjōr eo Tanner eaar jelet dii ko diin, ak men̄e uno in metak ko rekajoor, ekar metak wōt. Emaron̄ to jen peet eo. Juon jibbon̄ in Jabōt, jinen, Kalleen, ekar itok n̄an ruum̧ eo an im lale m̧okta jen an baam̧le eo etal im jar. Liin ekar ilbōk ke ej lo ke ekar kepooj e make im kar jijet m̧anin peet eo an, metak ilo an batini jōōt eo an. Kalleen eaar jijet itūrin. Liin eaar ba, “Tanner,” “kwoj m̧ool komour n̄an etal im jar? Bōlen kwon pād wōt m̧wiin rainin im kakkije.”
Eaar kalimjōk laļ. Eaar juon tikōn. Eaar wōr juon an doulul. Im ewōr juon an jerbal.
“Ij aikuj ke ajije kwojkwoj eo rainin.”
“Ekwe, jeļā ro jet remaron̄ bōk jikum̧.”
“Aaet,” eaar ba, “ak … ij lo an armej ro reitok n̄an eō ilo aō leto-letak kwojkwoj eo. Ij tōmak ejipan̄ er.”
Innām Kalleen eaar jipan̄ batini jōōt eo an im lukwōj tae eo an, im raar ettōr n̄an m̧ōn jar eo. Alikkar, jet men raorōk raar waļo̧k.
Iaar itok n̄an jar ālkin juon kweilo̧k m̧oktaļo̧k im iaar ilbōk ke ij lo an Tanner jijet ilo jea eo an tikōn ro. Kalleen eaar m̧ōkaj in ba n̄an n̄a ta unin an kar pād ijeņ im ta eo ekar ba: “Ejipan̄ armej ro.”
Im iaar bar lale an tikōn ro jibadōkļo̧k tabōļ in kwojkwoj eo. Eaar m̧al m̧aanļo̧k iturin bar juon tikōn ke pris ro rej leļo̧k tōre in pilawā ko n̄an er. Innām Tanner eaar ipōr neen ļo̧k n̄an ijo jikin im dāpdep ilo jea eo n̄an kōkankan e ilo an leļo̧k kwojkwoj eo.
Enan̄in aolep ro ilo m̧ōņjar eo raar kalimjōk e, kilen metak ilo an kōm̧m̧ane ijo kuņaan. Tanner eaar kwaļo̧k kilen an kōm̧m̧ane, em̧akūt jidik jen jea n̄an jea—eaar menokadu bōran—pinej jenkwan Rilo̧mo̧o̧r ilo wāween an tikōn ro kōm̧m̧ane. An tikōn in kajoor āinbwiinin men̄e ekar metak, jorāān, im m̧ōjņo, kōņaan en̄taan n̄an leļo̧k kōkaļļein Pinmuur eo an Rilo̧mo̧o̧r n̄an mour ko ad.
Lo elmen an ļōmņak n̄an erom juon tikōn ekōm̧m̧an bwe en oktak ad ļōmņake—kwojkwoj eo, kōn Rilo̧mo̧o̧r, im kōn tikōn ro im rūkaki ro im pris ro.
Iaar bwilōn̄ kōn kabwilōn̄lōn̄ eo me eaar im̧we e n̄an kōm̧m̧ane wōt ilo kajoor ilo jibbon̄on eo n̄an peran bar jidik, kūr eo edik n̄an jerbale, im kōn kajoor im maron̄ eo ippān aolep jodikdik ro nejid ilo aer iuun er make n̄an uwaake kūr eo an rikanaan eo n̄an bōnbōn ippān ritariņae ro an Anij n̄an kobatok ilo jerbal in lo̧mo̧o̧r im mour ilo aiboojoj eo eutiejtata.
Aolep iien n̄e tikōn eo ej bōk juon tōre in kwojkwoj, jej keememej bwebwenato eo ekwojarjar kōn Kōjota eo Āliktata, ilo Gethsemane, ilo Calvary, im ilo lōb eo. Ke Rilo̧mo̧o̧r eaar ba n̄an Rijilōk ro An, “Kōm̧m̧an men in ilo ememej Eō,” 1 E ekar bar kōnono n̄an kōj kajjojo. E ekar bar kōnono kōn ejjeļo̧k jem̧ļo̧kin kabwilōn̄lōn̄ eo me E enaaj kepooje n̄an tikōn ro ilju im jakļaj, rūkaki ro, im pris ro renaaj kwaļo̧k kōkkaļe eo An im kūr ro Nejin n̄an bōk menin letok in pinmuur eo An.
Aolep kōkkaļļein kwojkwoj eo ej jitōn̄ļo̧k kōj n̄an menin letok in. Jej ļōmņak kōn pilawā eo ke E ekar ruje—im bwe pilawā eo pris ro im̧aan rej, juon ilo̧k juon, ruje. Jej ļōmņak kōn meļeļein in dān eo ekwojarjar, m̧okta im kiiō, ilo an kwojkwoj eo waļo̧k jen lon̄iin pris ro reddik n̄an būruwōd im n̄an lan̄, kōkāāl bujen ko me rej kobaik kōj n̄an lukkuun kajoor in lo̧mo̧o̧r eo an Kraist. Jemaron̄ ļōmņak kōn ta meļeļein n̄e juon tikōn ej bōk kōkkaļe eo ekwojarjar n̄an kōj, jutak āinwōt ijo Jisōs en kar jutak n̄e E enkar pād ijeņ, letok n̄an lōn̄aj edodo ko ad im metak ko ad.
Jeraam̧m̧an, likao ro im jiron̄ ro rejjab aikuj nan̄inmej n̄an lo lan̄lōn̄ im jibadbad n̄an jerbal n̄an Rilo̧mo̧o̧r.
Elder David A. Bednar eaar kwaļo̧k bwe n̄an kajoor im āinwōt mijinede ro, jej aikuj kōm̧m̧ane ta eo mijinede ro rej kōm̧m̧ane, innām, “ļain im bar ļain im jidik ijin jidik ijuweo, … [je] maron̄ jidik jidik āinwōt mijinede ro … Rilo̧mo̧o̧r ekōņaan.” 2
Ejjeļo̧k oktak, n̄e jej kōņaan “āinwōt Jisōs,” 3 jej aikuj kōm̧m̧ane ta eo Jisōs ekar kōm̧m̧ane, im ilo juon jentōj, Irooj ekar kōm̧eļeļeiki ta eo Ekar kōm̧m̧m̧ane: Ekar ba, “Bwe lo, en̄in ej jerbal eo Aō im aiboojoj eo Aō—n̄an kakūrm̧ool jab wabanban im mour indeeo an armej.” 4
Mijen eo an Rilo̧mo̧o̧r eaar aolep iien im naaj wōt jerbal n̄an Jemen n̄an lo̧mo̧o̧r ro Nejin.
Im wāween eo em̧m̧antata n̄an lo m̧ōņōņō ilo laļ in ej kobatok ippān Kraist n̄an jipan̄ ro jet.
En̄in ej pedped in tōmak eo me ekar im̧we burookram̧ eo an Ajri ro im Jodikdik ro.
Aolep m̧akūtkūt ko an Ajri im Jodikdik ro im aolep katak ko an Ajri ro im Jodikdik ro ej n̄an jipan̄ ro rem̧m̧an ded erom̧ āinwōt Jisōs ilo aer kobatok Ippān ilo jerbal in lo̧mo̧o̧r in An im mour ilo aiboojoj eo eutiejtata.
Būrookram̧ eo an Ajri ro im jodikdik ro ej juon kein jerbal n̄an jipan̄ aolep ajri in Būraimere im jodikdik ro n̄an eddōkļo̧k ilo rikaļooraņ im n̄an bōk juon tōmak eobrak kōn visōn kōn elmen wāween m̧ōņōņō. Remaron̄ itok im bōk kūņaer n̄an ikdeleel kōn iaļ eo im tōlļo̧k me enaaj bōk er ilo iaļen bujen in, ijo renaaj peptaij im kapen kōn menin letok eo an Jetōb Kwojarjar im ejjab etto pād doulul ko ak kūlaaj ko an Doulul eo an Jiron̄ ro, ijo renaaj jipan̄ ro jet en̄jake m̧ōņōņō n̄an leļo̧k jerbal in jipan̄ āinwōt Kraist. Renaaj kōm̧m̧ani kōttōbar ko, reļļap ak reddik, me enaaj bōk peļan n̄an mour ko aer im jipan̄ er erom̧ eļapļo̧k āinwōt Rilo̧mo̧o̧r. N̄an Kōkajoorļo̧k Jodikdik ro kweilo̧k ko relļap im māākjin ko ilo, eo Jera, im Gospel Living app eo enaaj jipan̄ er lukkuun lo lan̄lōn̄ ilo Kraist Renaaj bōk kūņaer ilo kōjeraam̧m̧an ko n̄an kabwijer peba in mālim an tampeļ ekadu kitien n̄an en̄jake jetōbin Ilaija kōn im̧we eo an Jetōb Kwojarjar ilo aer pukot kōjeraam̧m̧an ko an tampeļ im menmenbwij an baam̧le. Naaj tōl er kōn kōjeraam̧m̧an ko an petriak. Ilo tōrein, renaaj lo aer make etal n̄an tampeļ ko n̄an bōk menin letok kwojarjar eo kōn kajoor im n̄an lo lan̄lōn̄ ijeņ ilo aer ekkekel indeeo, ippān, baam̧le ko aer.
Kōn nan̄inmej in im jorrāān, ebōktok lukkuun kallim̧ur eo ekāāl ilo burookram̧ eo an Ajri ro im Jodikdik ej juon jerbal eo ej wōņm̧aanļo̧k wōt—ak ewōr menin ekairir kake. Jodikdik ro nejid rejjab aikuj kōttar an laļ kajim̧weik make m̧okta jen aer jeļā kajjeen Rilo̧mo̧o̧r. Jet rej kōm̧m̧ani kālet ko kiiō me remaron̄ kar jab kōm̧m̧ane n̄e rekar meļeļe kadkad eo aer em̧ool—im An.
Im āindein kūr eo em̧ōkaj jān aolep ro nejin Anij ej bwe “aolep ren ro̧o̧ltok!”
Mam̧a im baba ro, ļaddik ro nejum̧ aikuj am̧ jipan̄ er kiiō kiiō āinwōt ilo m̧okta ke raar ļōmņaki men ko edik tokjāer āinwōt pāāj im pin. Mam̧a im baba ro, ritōl ro an priesthood im Doulul eo an Jiron̄ ro, eļan̄n̄e jodikdik ro nejimi rej apan̄, Ajri im Jodikdik ro renaaj jipan̄ bōktok er n̄an ippān Rilo̧mo̧o̧r, im bwe Rilo̧mo̧o̧r eo enaaj bōktok aenōm̧m̧an n̄an er. 5
Būreejtōnji ro an doulul im kūlaaj, karōke im bōk jikum̧ ilo jerbal in an Irooj.
Bisop ro, kōbaik kii ko am̧ ippān būreejtōn ro an doulul ko, im doulul ko am̧—im ward eo am̧—enaaj oktak.
Im n̄an kom̧ diktak in epepen in, ij kam̧ool, āinwōt juon eo ejeļā bwe kom̧ij ļaddik ro im leddik ro rejitenbōro nejin Anij, im Ewōr juon an jerbal bwe kom̧in kōm̧m̧ane.
Ilo am̧ kakūrm̧ool eddo eo am̧, kōn aolepān būruōmi, ami maron̄, lōmņak im kajoor, kwonaaj itok n̄an iakwe Anij im kōjparok bujen ko im leke priesthood eo An ilo am̧ jerbal n̄an kōjeraam̧m̧an ro jet, ijjinoe ilo m̧weeo im̧ōm̧.
Ij jar bwe kwonaaj kajjieon̄, ilo kajoorļo̧k erreeo ilo tōrein, n̄an jerbal, kōjerbal tōmak, ukweļo̧k, im kakm̧anm̧anļo̧k kajjojo raan, n̄an kakarbab n̄an bōk kōjeraam̧m̧an ko an tampeļ im n̄iknik lan̄lōn̄ me ej itok wōt jen gospel eo an Jisōs Kraist. Ij jar bwe kwonaaj pojak in erom̧ mijinede eo etiljek, em̧m̧aan ak kōrā eo ettā, baba ak m̧am̧a eo ej iakwe me rekar kallim̧uri eok ke kwonaaj erom̧ juon rijilōk eo em̧ool an Jisōs Kraist.
Kōm̧m̧an bwe kwon kepooj laļin n̄an jepļaaktok eo an Rilo̧mo̧o̧r n̄an karuwaineneik aolep n̄an itok n̄an Kraist im bōk kōjeraam̧m̧an ko an Pinmuur eo An. Ilo etan Jisōs Kraist, amen.