O Faamanuiaga Taua o le Sefuluai

Saunia e Kimberly Jensen

O faamanuiaga ou te maua mai le totogiina o le sefuluai e le pei o le manai mai le lagi, ae ou te mautinoa lava e oo mai na faamanuiaga.

Ou te lagona e pei lava foi soo se taimi ou te faalogo ai i molimau e uiga i le totogiina o le sefuluai, e masani lava ona aofia ai aafiaga faavavega, e faataumaoi i le lalolagi.

Ou te faafetai mo nei molimau, ae ou te lei mauaina muamua lava lenei ituaiga o aafiaga.

Ia ae peitai, ou te lei maua lava le tuitui mai a le Agaga ia te au i luga o le ulu, a le o le — e masani ona sili atu lava ona taua.

Ou te totogi le sefuluai i taimi uma. Ou te lei manatu lava e le totogia, i le amataga lava sa faamoemoeina e ou matua, ona ou alu atu lea i le kolisi ona sa ou lagona le musumusuga. Ma ina ua ou faaipoipo ma amata ona maua ni fanau, sa ou faaauau ai pea ona sa ou faatuatua ia Iesu Keriso ma se molimau mausali o faamanuiaga e mafai ona maua mai i le totogiina atoa o le sefuluai.

Pe a ou totogiina lau sefuluai, e sologa lelei lava mea uma. E lava ma totoe a matou meaai i taimi uma. O nei mea e iu ina maua i se tau maualalo nai lo le mea ou te manatu o le a i ai, pe e mafai foi ona ou mauaina ni pepa tala oloa po o ni kuponi. Ae na tuuina mai, e tatau ona ou galue mo na mea — e manaomia ai le taumafai ma le faatuatua. Tatou te sefe ma ola fuafua lelei ma tatou paketi. Peitai pe a fai atu ma faia mea uma, i le faaiuga o le aso, ou te iloa lava o le a lelei mea uma ona sa totogi lau sefuluai ma ou faia le mea sili ou te mafaia ona tuu atu lea o mea uma i aao o le Atua.

A o ou mafaufau i tua i ou aafiaga ma le pogai ua ou maua ai se molimau malosi i le sefuluai, sa ou mafaufau i se mea uiga ese. Ia te au lava ia, o faamanuiaga o le sefuluai e le pei o le manai mai le lagi. Ou te le tau lava ina ia maua ni siaki se tele i totonu o le meli po o ni taumafataga e ese mai se tasi sa musuia e aumai ia te au se mea. E faapei lava o le taimi na fafagaina ai e Iesu le 5,000 (tagai Mataio 14:14–21). Sa ofoina atu e se alii talavou meaai uma na ia te ia. Sa tuuina atu e le Faaola le faafetai i le Atua ona ia fafagaina ai lea o tagata uma, i le na o le lima potoi areto ma i’a e lua. Ma sa ofoofogia le maoona o tagata uma, ma sa i ai meaai na totoe.

Sa i ai ni nai vaiaso ou te lei mautinoa po o le a le mea ou te ai aua sa manaomia ona ou fafagaina lou aiga. Ae peisea’ī o taimi uma e lava ma totoe. E le maua fua mai meaai. Ae ua faamalieina au i se vaega itiiti ma e faapena foi lou toalua. Ou te le maua se tupe faaopoopo, ae e mafai ona ou faasoasoa lelei mea ua matou maua ia umi atu.

E ofoofogia le auala e galue ai le Tama Faalelagi ma i tatou ma mea tatou te manaomia. E eseese uma tagata. E eseese uma manaoga o tagata. Ma e eseese foi o tatou faamanuiaga. E ofoofogia le silafia e Ia o o tatou manaoga, i le faaletino ma le faaleagaga. Ua faamanuiaina au i le totogiina o lau sefuluai. Ou te manao ia e iloa le na mea.

O Le A se Mea e Mafai Ona Ou Faia?

“E pei ona tatou aoao soo atu ma molimau atu e uiga i le tulafono o le sefuluai, tatou te faamamafa lava ia faamanuiaga faaletino tuusao, faagaeetia, ma faigofie ona iloaina ia tatou te mauaina. Ma e mautinoa lava o ia faamanuiaga o loo maua. Ae o nisi o ia faamanuiaga eseese tatou te maua pe a tatou usiusitai i lenei poloaiga e le mafaamatalaina ae taua. O ia faamanuiaga e faatoa mafai ona tatou iloatinoina pe afai tatou te gauai atu i ai ma mataala faaleagaga (tagai 1 Korinito 2:14). …

“O nisi taimi atonu tatou te ole atu i le Atua mo le manuia, ma Ia tuu mai ai ia i tatou le malosi faaletino ma faalemafaufau. Atonu tatou te ole atu mo le uluola, ae tatou mauaina le vaaiga faateleina ma le faateleina o le onosai, pe tatou te faatoga atu mo le tuputupu a’e ae faamanuiaina i tatou i le meaalofa o le alofatunoa. Atonu Na te foai mai ia i tatou le talitonuga maumaututu ma le mautinoa a o tatou tauivi e ausia ni sini agavaa. Ma a tatou augani atu mo se toomaga mai faigata faaletino, faalemafaufau ma faaleagaga, atonu Na te faateleina lo tatou naunautaiga ma le onosai.

“Ou te folafola atu a tatou usiusitai ma tausia le tulafono o le sefuluai, e moni lava o le a toina pupuni o le lagi ma sasaa mai faamanuiaga faaleagaga ma faaletino. …

“Ou te molimau atu a tatou gauai atu faaleagaga ma le toto’a, o le a faamanuiaina i tatou i mata e manino atili le vaai, o taliga e lelei atili le faalogo, ma loto e malamalama atoatoa atili i Ona ala, Ona manatu, ma Ana faamanuiaga lemafaamatalaina ma taua i o tatou olaga.”

Elder David A. Bednar o le Korama a Aposetolo e Toasefululua, “O Pupuni o le Lagi,” Ensign po o le Liahona, Nov. 2013, 17--18.